ଭୟରେ ଥରୁଛି ତାମିଲନାଡୁ । ଆସନ୍ତା ୧୨ରୁ ୧୬ ଘଣ୍ଟା ମଧ୍ୟରେ ଭୟଙ୍କର ରୂପ ନେବ ସାମୁଦ୍ରିକ ଝଡ଼ ‘ଫାନୀ’, ଦକ୍ଷିଣ ଆନ୍ଧ୍ରକୁ ମଧ୍ୟ ସତର୍କ ରହିବାକୁ ପରାମର୍ଶ ।
କନକ ବ୍ୟୁରୋ: ତାମିଲନାଡୁ ପାଇଁ ସତର୍କ ଘଣ୍ଟି । ଆସନ୍ତା ୧୨ରୁ ୧୬ ଘଣ୍ଟା ମଧ୍ୟରେ କରାଳ ରୂପ ନେବ ବାତ୍ୟା ‘ଫାନୀ’ । ତେବେ ଭାରତୀୟ ପାଣିପାଗ ବିଭାଗ ତରଫରୁ ମିଳିଥିବା ସୂଚନା ମୁତାବକ, ସାମୁଦ୍ରିକ ଝଡ଼ ‘ଫାନୀ’ ବର୍ତ୍ତମାନ ଉତ୍ତର-ପୂର୍ବ ଦିଗରେ ଗତି କରୁଛି । ଯାହାକି ଆସନ୍ତା ୧୨ରୁ ୧୬ ଘଣ୍ଟା ମଧ୍ୟରେ ଭାରତ ମହାସାଗରକୁ ଛୁଇଁବା ପରେ ଭୟଙ୍କର ରୂପ ଧାରଣ କରିପାରେ ବୋଲି ତାମିଲନାଡୁ ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା କି, ଏହା ପ୍ରଭାବରେ ଆସନ୍ତା କାଲିଠାରୁ ପବନର ବେଗ ଧିରେ ଧିରେ ବଢ଼ିବାକୁ ଥିବାବେଳେ ମଙ୍ଗଳବାର ସୁଦ୍ଧା ପବନର ବେଗ ଘଣ୍ଟାକୁ ୧୪୦ରୁ ୧୫୦ ହୋଇପାରେ ବୋଲି ସୂଚନା ମିଳିଛି । ଏପରିକି କେରଳର ବିଭିନ୍ନ ସ୍ଥାନରେ ସୋମବାର ଓ ମଙ୍ଗଳବାରରେ ବର୍ଷା ମଧ୍ୟ ହୋଇପାରେ ।
ଅନ୍ୟପଟେ ତାମିଲନାଡୁ ଓ ଆନ୍ଧ୍ରପ୍ରଦେଶର କେତେକ ସ୍ଥାନରେ ଏହି ଝଡ଼ ବର୍ଷା ହେବାର ସମ୍ଭାବନା ଅଛି । ତେଣୁ ମତ୍ସ୍ୟଜୀବୀମାନଙ୍କୁ ସମୁଦ୍ର ଭିତରକୁ ନ ଯିବାକୁ ବାରଣ କରିବା ସହ ସତର୍କ ରହିବାକୁ ପରାମର୍ଶ ଦିଆଯାଇଛି । ଅପରପକ୍ଷେ ଆଞ୍ଚଳିକ ପାଣିପାଗ କେନ୍ଦ୍ର ତରଫରୁ ମିଳିଥିବା ସୂଚନା ମୁତାବକ ସାମୁଦ୍ରିକ ଝଡ଼ ଫାନୀ ଦ୍ୱାରା ଓଡ଼ିଶାକୁ କିଛି ବିପଦ ନାହିଁ । କିନ୍ତୁ ଏହାର ପ୍ରଭାବରେ ଦକ୍ଷିଣ ଓଡିଶାର ବିଭିନ୍ନ ସ୍ଥାନରେ ବର୍ଷା ହୋଇପାରେ ବୋଲି ଆଞ୍ଚଳିକ ପାଣିପାଗ ବିଭାଗ ତରଫରୁ ସତର୍କ ସୂଚନା ଦିଆଯାଇଛି ।