ସିଭିୟର ସାଇକ୍ଲୋନିକ୍ ଷ୍ଟର୍ମର ରୂପ ନେଲା ‘ଫୋନି’ । ଓଡିଶା ଓ ଆନ୍ଧ୍ର ଉପକୂଳ ଦେଇ ଗତି କରିବ ବାତ୍ୟା । ୭ଟି ରାଜ୍ୟକୁ ଆଡଭାଇଜରି ଜାରି ।
କନକ ବ୍ୟୁରୋ : ଭାରତୀୟ ସ୍ୟାଟେଲାଇଟ୍ ଦ୍ୱାରା ନିଆଯାଇଥିବା ଚିତ୍ର ସାଇକ୍ଲୋନ ଫୋନିର ବାସ୍ତବ ସ୍ଥିତି ଦର୍ଶାଉଛି । ଚେନ୍ନାଇ ଠାରୁ ୮୪୦ କିଲୋମିଟର ଏବଂ ମଛଲିପଟନମ ଠାରୁ ୯୯୦ କିଲୋମିଟର ଦୁରରେ ଥିବା ଏହି ବାତ୍ୟା, ସିଭିୟର ସାଇକ୍ଲୋନିକ ଷ୍ଟର୍ମର ରୁପ ନେଇ, ଘଂଟାକୁ ପ୍ରାୟ ୧୧ କିଲୋମିଟର ବେଗରେ ଭାରତର ପୂର୍ବ ଉପକୁଳ ଆଡକୁ ମୁହାଁଇଛି । ଅର୍ଥାତ ତାମିଲନାଡୁ ଆନ୍ଧ୍ରପ୍ରଦେଶ ଓ ଓଡିଶା ଉପକୁଳ ଦେଇ ଏହି ବାତ୍ୟା ଗତି କରିବ । ପାଣିପାଗ ବିଭାଗର କହିବାନୁସାରେ, ୩୦ ତାରିଖ ଆର୍ଥାତ ଆସନ୍ତାକାଲି ସୁଦ୍ଧା ଏହି ଭେରି ସିଭିୟର ସାଇକ୍ଲୋନିକ ଷ୍ଟର୍ମର ରୁପ ନେବ ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ପାଣିପାଗ ବିଭାଗ ଆକଳନ କରିଛି ମେ ୦୨ ତାରିଖ ସୁଦ୍ଧା ଏହି ବାତ୍ୟା ଏକ୍ସଟ୍ରିମଲି ସିଭିୟର ସାଇକ୍ଲୋନିକ ଷ୍ଟର୍ମର ରୁପ ନେବ । ଏହି ସମୟରେ ପବନର ଗତି ୧୭୦ରୁ ୧୯୫ କିଲୋମିଟର ପର୍ଯ୍ୟନ୍ତ ହୋଇପାରେ ବୋଲି ଆକଳନ କରାଯାଉଛି । ତେବେ ୩ ତାରିଖ ବେଳକୁ ଏହାର ପ୍ରଭାବ ଧିରେ ଧିରେ ହ୍ରାସ ପାଇବ । କିନ୍ତୁ ବାତ୍ୟା କେଉଁଠି ମାଡ କରିବ କିମ୍ବା ଲ୍ୟାଣ୍ଡଫଲ କରିବ ତାହା ସ୍ପଷ୍ଟ ହୋଇନାହିଁ । ପୂର୍ବରୁ ଏହି ବାତ୍ୟା ତାମିଲନାଡୁରେ ଲ୍ୟାଣ୍ଡଫଲ କରିବ ବୋଲି କୁହାଯାଉଥିଲା । କିନ୍ତୁ ପରେ ପରେ, ଏହାର ଗତିପଥ ବଦଳି ଗଲା । ଏବେ ଏହା ପୂର୍ବ ଉପକୁଳ ଆଡକୁ ମୁହାଁଇ ଥିବାରୁ ଓଡିଶାରେ ଏହାର ପ୍ରଭାବ ପଡିବା ନିଶ୍ଚିତ ହୋଇଯାଇଛି । ତେବେ ବର୍ତମାନ ସମସ୍ତଙ୍କ ନଜର ଏହି ବାତ୍ୟା କେଉଁଠି ଲ୍ୟାଣ୍ଡଫଲ କରିବ । ଓଡିଶାରେ ଲ୍ୟାଣ୍ଡଫଲ କରିପାରେ କି? ଏଭଳି ସମ୍ଭାବନା ଉପରେ ମଧ୍ୟ ନଜର ରଖାଯାଇଛି ।
ସେପଟେ ଏନଡିଆରଏଫ ଏବଂ ଭାରତୀୟ କୋଷ୍ଟଗାର୍ଡକୁ ସଂପୂର୍ଣ୍ଣ ପ୍ରସ୍ତୁତ ରଖାଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଟ୍ୱିଟ କରି ସଂପୃକ୍ତ ବିଭାଗ ଗୁଡିକୁ ସତର୍କ ରହିବାକୁ ନିର୍ଦ୍ଦେଶ ଦେଇଛନ୍ତି । ଏଥିସହ ପ୍ରଭାବିତ ହେବାକୁ ଥିବା ରାଜ୍ୟସହ ମିଶି କାମ କରିବାକୁ ପରାମର୍ଶ ଦେଇଛନ୍ତି । ବଙ୍ଗେପସାଗରରେ ବାତ୍ୟାର ଏହି ସ୍ଥିତି ପାଇଁ ମତ୍ସ୍ୟଜୀବୀ ମାନଙ୍କୁ ସମୁଦ୍ର ଭିତରକୁ ନଯିବା ପାଇଁ ଭାରତୀୟ ପାଣିପାଗ ବିଭାଗ ପରାମର୍ଶ ଦେଇଛି ।
ବାତ୍ୟା ଫୋନି ଏକ ବିରଳ ବାତ୍ୟା ବୋଲି ଜଣାପଡିଛି । ବିଷୁବ ରେଖା ଉପରେ ସୃଷ୍ଟି ହୋଇଥିବା ଏହି ବାତ୍ୟା ଶ୍ରୀଲଙ୍କା ଉପକୂଳରୁ ଡେଇଁ ଭାରତ ଦକ୍ଷିଣ ଉପକୂଳରେ ପହଂଚିଛି । ଏହା ଧିରେ ଧିରେ କର୍ଣ୍ଣାଟକ, ତାମିଲନାଡୁ ଉପକୂଳ ଡେଇଁ ଉତ୍ତର ପଶ୍ଚିମ ଦିଗରେ ଗତି କରୁଛି । ଏହା ଆନ୍ଧ୍ର ଉପକୂଳ ଡେଇଁ ଓଡିଶା ଉପକୂଳରେ ଗତି କରିବାର ସମ୍ଭାବନା ରହିଛି । ତେବେ ଏହା ଓଡିଶା ଉପକୂଳରେ ଛୁଇଁଲେ ଏକ ବିରଳ ଘଟଣା ହେବ । ପ୍ରଥମତଃ ମେ’ ମାସରେ ପ୍ରଥମ ଥର ପାଇଁ ଏଭଳି ଏକ ବାତ୍ୟା ଓଡିଶା ଆସୁଛି । ଦ୍ୱିତୀୟତଃ ଏତେ ଦୀର୍ଘ ବାଟ ଅତିକ୍ରମ କରି ଓଡିଶା ଉପକୂଳକୁ ବାତ୍ୟା ଆସିବା ମଧ୍ୟ ଏକ ବିରଳ ଘଟଣା ବୋଲି କହିଛନ୍ତି ସ୍ୱତନ୍ତ୍ର ରିଲିଫ କମିଶନର ।