କନକ ବ୍ୟୁରୋ : ସାଇକ୍ଲୋନ୍ ପରେ ସତ୍ୟବାଦୀର ଚିତ୍ର । ଯେଉଁ ହଜାର ହଜାର ନଡିଆ ଗଛ ସତ୍ୟବାଦୀର ସୌନ୍ଦର୍ଯ୍ୟ ବଢାଉଥିଲା, ସେହି ନଡିଆ ଗଛ ସବୁ ଏବେ ମାଟିରେ ଶୋଇପଡିଛି । ଫୋନିର ପ୍ରବଳ ଶକ୍ତିକୁ ମୁକାବିଲା କରିନପାରି ଅସହାୟ ହୋଇ ଏବେ ମାଟି କାମୁଡି ପଡିଛି । କେବଳ ସତ୍ୟବାଦୀ ନୁହେଁ ପିପିଲି, କଣାସ, ବ୍ରହ୍ମଗିରି ବ୍ଲକରେ ମଧ୍ୟ ଆକାଶ ସହ କଥା ହେଉଥିବା ଲମ୍ବା ଲମ୍ବା ନଡିଆ ଗଛ ଏବେ ମାଟିରେ ଶୋଇଛି ।
Advertisment
ପ୍ରଳୟ ପରେ ବଦଳି ଯାଇଛି ପୁରୀ ଜିଲ୍ଲା ସତ୍ୟବାଦୀର ଚିତ୍ର । ଉଜୁଡି ଯାଇଛି ନଡିଆ ଚାଷ । ଭାଙ୍ଗି ଯାଇଛି ହଜାର ହଜାର ନଡିଆ ଗଛ । ପୁରା ଛାରଖାର ହୋଇଯାଇଛି ନଡିଆ ବଗିଚା । ଯେଉଁ ଗଛ କରିବାକୁ ଚାଷୀକୁ ବର୍ଷ ବର୍ଷ ଲାଗିଯାଇଥିଲା ସେହି ଗଛ ମାତ୍ର କେଇ ଘଂଟାର ପବନରେ ଭାଙ୍ଗି ଛାରଖାର ହୋଇଯାଇଛି । ରହି ଯାଇଛି କିଛି ଅଧା ଭଙ୍ଗା ଗଛ । ଯେଉଁ କିଛି ଗଛ ବାତ୍ୟା କବଳରୁ ବର୍ତି ଯାଇଛି ତାହା ରୋଗିଣା ହୋଇଯିବାର ଭୟ ରହିଛି । ବାତ୍ୟା ଫୋନି ଚନ୍ଦଭାଗାରେ ମାଡ କରିବା ପରେ ପୁରା ପୁରୀ ଜିଲ୍ଲାକୁ ଖିନଭିନ୍ କରିଦେଇଛି । ଆଉ ବାତ୍ୟା ପରେ ସତ୍ୟବାଦୀ ନଡିଆ କ୍ଷେତର ଚିତ୍ର ଦେଖି ହତାସ ହୋଇ ପଡିଛନ୍ତି ସତ୍ୟବାଦୀର ଚାଷୀ ।
publive-imageଗତ ୩ ତାରିଖ ସକାଳୁ ସକାଳୁ ଆରମ୍ଭ ହୋଇଯାଇଥିଲା ଜୋରଦାର ପବନ । ସୁସୁ ଗର୍ଜନ କରି ମାଡି ଆସିଥିଲା ଝଡ ତୋଫାନ । ପବନର ବେଗ ଏତେ ଶକ୍ତିଶାଳୀ ଥିଲା ଯେ ନଡିଆ ଗଛରୁ ଗୋଟିଏ ପରେ ଗୋଟିଏ ବାଉଙ୍ଗା ଖସି ପଡିଥିଲା । ଏତିକିରେ ଥମିନଥିଲା ପ୍ରକୃତିର ତାଣ୍ଡବ । ପବନର ବେଗ ଆଗରେ ହାର ମାନି ମାଟିରେ ଶୋଇ ପଡିଲା ନଡିଆ ଗଛ । ଆଉ କେତେକ ଗଛର ମୁଳକୁ ମାଟି ଜାବୁଡି ଧରିଥିଲେ ସୁଦ୍ଧା ଅଧାରୁ ଭାଙ୍ଗି ଦେଇଛି ବାତ୍ୟା ଫୋନି । କେବଳ ମୂଳରୁ ଅଧା ଖଣ୍ଡିଆ ହୋଇ ଠିଆ ହୋଇଛି । ଆଉ ଏବେ ଉଜୁଡା କ୍ଷେତକୁ ପୁଣି ନଡିଆ ଚାଷ ପାଇଁ ପ୍ରସ୍ତୁତ କରିବା ଚାଷୀଙ୍କ ପାଇଁ କାଠିକର ପାଠ । କାରଣ ଉପୁଡି ଯାଇଥିବା ନଡିଆ ଗଛର ଚେରକୁ ମାଟିରୁ ଖୋଳି ବାହାର କରିବା ପରେ ପୁଣି ଥରେ ଚାଷ କରାଯାଇ ପାରିବ । ଏଥିପାଇଁ ଚାଷୀଙ୍କୁ ଅଧିକ ଖର୍ଚାନ୍ତ ହେବାକୁ  ପଡିବ ।
ବାତ୍ୟା ଫୋନି ତ ତାଣ୍ଡବ କରି ଚାଲିଯାଇଛି । ହେଲେ ଲୋକଙ୍କ ହାତରେ ଉଜୁଡା କ୍ଷେତ ଧରେଇ ହତାସ କରିଦେଇଛି । ପିଲା ଛୁଆଁଙ୍କୁ ଧାରି ନଡିଆ ବଗିଚାକୁ ସଫା କରିବାରେ ଲାଗିଛନ୍ତି ସତ୍ୟବାଦୀର ଚାଷୀ ପରିବାର । ଆଉ ଖାଁ ଖାଁ ଦିଶୁଥିବା ସତ୍ୟବାଦୀ ପୁଣିଥରେ ସବୁଜ ବନାନୀରେ ପରିଣତ ହେବାକୁ କେତେ ବର୍ଷ ଲାଗିବ ତାହା ସବୁଠୁ ବଡ ପ୍ରଶ୍ନ ।