କଟକ ବଡ ମେଡିକାଲରେ ବିଦ୍ୟୁତ୍ ବିଭ୍ରାଟ: ଅନ୍ଧାରରେ ରୋଗୀ ସେବା
କନକ ବ୍ୟୁରୋ: ବଡ ମେଡିକାଲରେ ବଡ ବିଭ୍ରାଟ । ବିଶ୍ୱସ୍ତରୀୟ ହେବାକୁ ଥିବା କଟକ ବଡ ମେଡିକାଲରେ ବିଜୁଳ ଗାଏବ ହୋଇଯିବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି । ଏସସିବିର ଏକାଧିକ ବିଭାଗରେ ଶୁକ୍ରବାର ଘଂଟା ଘଂଟା ଧରି ବିଜୁଳି ନଥିଲା । ଶନିବାର ପୁଣି ସମାନ ଅବସ୍ଥା ଦେଖିବାକୁ ମିଳିଥିଲା ନିଦାନ ବିଭାଗରେ । ଘଂଟାଏ କି ଦୁଇ ଘଂଟା ନୁହେଁ ପ୍ରାୟ ୬ ଘଂଟା ।
Kanak News is now on WhatsApp
Join and get latest news updates delivered to you via WhatsApp
ଘଂଟାଏ ନୁହେଁ କି ଦୁଇ ଘଂଟା ନୁହେଁ ଏସସିବିର ଏକାଧିକ ବିଭାଗରେ ଶୁକ୍ରବାର ଲାଗି ରହିଥିଲା ଏମିତି ସ୍ଥିତି । ଶୁକ୍ରବାର ପ୍ରାୟ ୧୦ଘଂଟା ବିଜୁଳି କଟିଯାଇଥିଲା । ଆଉ ଅନ୍ଧାରରେ ରହିଥିଲା, ମେଡିସିନ୍ ବିଭାଗର କିଛି ଅଂଶ ସମେତ ଚର୍ମ ରୋଗ ବିଭାଗ, ଆନାଟୋମି ୱାର୍ଡ ଓ ଶବ ସଂରକ୍ଷଣ ଗୃହ । ଏମିତି କି ପମ୍ପ ହାଉସରେ ଲାଇନ ନଥିବାରୁ ବିଭିନ୍ନ ୱାର୍ଡକୁ ଜଳ ଯୋଗାଣ ହୋଇ ପାରିନଥିଲା । ଫଳରେ ଚିକିତ୍ସା ସେବା ପ୍ରଭାବିତ ହୋଇଥିବା ବେଳେ ରୋଗୀ ମାନେ ହନ୍ତସନ୍ତ ହୋଇଛନ୍ତି । ଏପରିକି ମେଡିସିନ୍ ବିଭାଗରେ ରୋଗୀଙ୍କୁ ମୋବାଇଲ୍ ଲାଇଟ୍ରେ ଇଞ୍ଜେକ୍ସନ୍ ଦିଆଯାଉଥିବାର ଦୃଶ୍ୟ ସାମନାକୁ ଆସିଛି ।
ବଡ ମେଡିକାଲର ଏଭଳି ବିଦ୍ୟୁତ୍ ବିଭ୍ରାଟକୁ ନେଇ ରୋଗୀ ଓ ରୋଗୀ ସମ୍ପର୍କୀୟଙ୍କ ଭିତରେ ଅସନ୍ତୋଷ ବଢ଼ୁଥିବାବେଳେ, ଡିଜି ଲଗାଇ ବିଦ୍ୟୁତ୍ ଯୋଗାଣ କରାଯାଇଥିଲା । କିନ୍ତୁ ଶନିବାର ପୁଣି ସମାନ ଅବସ୍ଥା ଦେଖିବାକୁ ମିଳିଛି, ଅତି ଗୁରୁତ୍ୱପୂର୍ଣ୍ଣ ନିଦାନ ବିଭାଗରେ । ସକାଳୁ ପ୍ରାୟ ୬ଘଂଟା ପର୍ଯ୍ୟନ୍ତ ନିଦାନ ବିଭାଗର ବିଜୁଳି କଟି ଯାଇଥିଲା । ଯାହାଫଳରେ ନିଦାନ କେନ୍ଦ୍ରରେ ରକ୍ତ ପରୀକ୍ଷା ଓ ସିଟି ସ୍କାନ୍ ବନ୍ଦ ହୋଇଯାଇଥିଲା । ଅତି ଜରୁରୀ ପରୀକ୍ଷା ହୋଇନପାରିବାରୁ, ରୋଗୀ ଓ ରୋଗୀ ସମ୍ପର୍କୀୟ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି ।
ତେବେ ମେଡିକାଲରେ ବିଦ୍ୟୁତ୍ ବିଭ୍ରାଟ ହେବା କଥାକୁ ସ୍ୱୀକାର କରିଛନ୍ତି ଏସସିବି ଅଧ୍ୟକ୍ଷ । ବିଦ୍ୟୁତ ସମସ୍ୟାର ଯାଂଚ ପାଇଁ ଏସସିବି ମେଡିକାଲରେ ଟେକ୍ନିକାଲ ୟୁନିଟ ନଥିବା କଥା ପ୍ରକାଶ କରିଛନ୍ତି । କହିଛନ୍ତି, କଂଟ୍ରାକ୍ଟିରେ ଚାଲିଛି ବିଦ୍ୟୁତ୍ ପରିଚାଳନା । ତାଙ୍କ ଉପରେ ମେଡିକାଲ କର୍ତ୍ତୁପକ୍ଷଙ୍କ କୌଣସି ନିୟନ୍ତ୍ରଣ ନାହିଁ । ତେବେ ନିୟମିତ ମେଂଟେନାନ୍ସ ହେଲେ ଏପରି ବିଭ୍ରାଟ ହୁଅନ୍ତା ନାହିଁ । ।
ରାଜ୍ୟର ସବୁଠାରୁ ବଡ ମେଡିକାଲ କଟକ ଏସସିବି, ଯାହାକୁ ଏମ୍ସ ପ୍ଲସରେ ରୂପାନ୍ତରଣ କରିବାର ସ୍ୱପ୍ନ ଦେଖୁଛନ୍ତି ରାଜ୍ୟ ସରକାର, ସେହି ହସ୍ପିଟାଲରୁ ଆସଥିବା ଦୃଶ୍ୟ ପୂରା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।