ପାଟଣାଗଡ ପାର୍ସଲ ବୋମା ବିସ୍ଫୋରଣ ମାମଲାରେ ବଡ ତଥ୍ୟ । ସନ୍ଦେହରେ ଥିବା ଅଧ୍ୟାପକଙ୍କ ଘରୁ ମିଳିଲା ଅଧା ବ୍ୟାଗ୍ ବାରୁଦ ।
ପାଟଣାଗଡ ପାର୍ସଲ ବୋମା ବିସ୍ଫୋରଣ ଘଟଣାରେ ପୁଲିସକୁ ମିଳିଛି ବଡ ସୁରାକ । ଏହି ଘଟଣାରେ ପୁଲିସ ଅଟକ ରଖିଥିବା ସ୍ଥାନୀୟ କଲେଜର ଅଧ୍ୟାପକଙ୍କ ଉପରେ ସନ୍ଦେହ ବଢ଼ିଛି । ତାଙ୍କ ଘରୁ ପୁଲିସ ଅଧ ବ୍ୟାଗ୍ ବାରୁଦ ଜବତ କରିଛି । ଅଧ୍ୟାପକଙ୍କ ରାମପୁରସ୍ଥିତ ପୈତୃକ ଘରୁ ଏହି ବାରୁଦ ବ୍ୟାଗ୍ ଜବତ କରାଯାଇଛି । ଗତ ଫେବୃୟାରୀ ୨୩, ଆଜକୁ ଠିକ୍ ଦୁଇ ମାସ ପୂର୍ବରୁ ପାଟଣାଗଡରେ ଏକ ଅଜଣା ଗିଫ୍ଟ ପ୍ୟାକେଟ୍ ବିସ୍ଫୋରଣରେ ସୌମ୍ୟଶେଖର ନାମକ ନବବିବାହିତ ଯୁବକ ଏବଂ ତାଙ୍କ ସମ୍ପର୍କୀୟ ଜେଜେ ମା’ଙ୍କର ମୃତ୍ୟୁ ହୋଇଯାଇଥିଲା । ଏଥିରେ ଗୁରୁତର ଆହତ ହୋଇଥିଲେ ସୌମ୍ୟଶେଖରଙ୍କ ପତ୍ନୀ ରିମା ସାହୁ । ଚିକିତ୍ସା ପରେ ରିମା ଘରକୁ ଫେରି ଆସିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏହି ଗିଫ୍ଟ ପ୍ୟାକେଟ୍ କିଏ ପଠାଇଥିଲା ତାକୁ ନେଇ ଗତ ଦୁଇ ମାସ ଧରି ଅନ୍ଧାରରେ ବାଡି ବୁଲାଉଥିଲା ପୁଲିସ୍ । ଆଜି ଅଧ୍ୟାପକଙ୍କ ଘରୁ ବାରୁଦ ଜବତ ହେବା ଘଟଣା ପୁଲିସକୁ ବଡ ସୁରାକ ବୋଲି କୁହାଯାଉଛି ।ଏହି ଅଧ୍ୟାପକ ଜଣକ ସ୍ଥାନୀୟ ଭଇଁଷା କଲେଜର ଇଂରାଜୀ ଅଧ୍ୟାପକ । ପୁଲିସର କହିବା ଅନୁସାରେ ସେହି କଲେଜକୁ ସୌମ୍ୟଶେଖରଙ୍କ ମାଆ, ଅଧକ୍ଷ ହୋଇ ଆସିବା ପରେ ପୂର୍ବରୁ ଅଧ୍ୟକ୍ଷ ଥିବା ଏହି ଅଧ୍ୟାପକଙ୍କ ମଧ୍ୟରେ ବିବାଦ ଦେଖାଦେଇଥିଲା । ଏହି ବିବାଦକୁ ନେଇ ଏଭଳି ଘଟଣା ଘଟିଥାଇପାରେ ବୋଲି ଅଧ୍ୟାପକଙ୍କ ଅଟକ ରଖିଥିଲା ପୁଲିସ୍ ।
ରବିବାର ପାଟ୍ଟଣାଗଡ ପାର୍ସଲ ବୋମା ବିସ୍ଫୋରଣ ଘଟଣାରେ କ୍ରାଇମବ୍ରାଂଚକୁ ବଡ ସୁରାଗ ମିଳିବା ପରେ, ମେହେରପଡାରୁ ଭଇଁସା କଲେଜର ଇଂରାଜୀ ଅଧ୍ୟାପକଙ୍କୁ ଉଠାଇ ନେଇଥିଲା ଏହି ତଦନ୍ତକାରୀ ସଂସ୍ଥା । ଅଧ୍ୟାପକ ପୁଞ୍ଜିଲାଲ ମେହେରଙ୍କୁ ଲଗାତର ଜେରା କରିଥିଲେ କ୍ରାଇମବ୍ରାଂଚ ଅଧିକାରୀ । ତଦନ୍ତ ପ୍ରଭାବିତ ହେବା ଆଶଙ୍କାରେ ପୋଲିସ କୌଣସି ସୂଚନା ଦେଉନଥିଲେ ବି ଫେବ୍ରୁଆରୀ ୨୩ ତାରିଖରେ ପାର୍ସଲ ବୋମା ବିସ୍ଫୋରଣ ମାମଲାରେ ଅଧ୍ୟାପକଙ୍କ ସଂପୃକ୍ତି ସନ୍ଦେହରେ ଗୁଡାଇ ତୁଡାଇ ପ୍ରଶ୍ନ କରୁଥିଲେ ତଦନ୍ତକାରୀ ଟିମ୍ । ଆଉ ଏହାରି ଆଧାରରେ ଆଜି ବୋମା ନିଷ୍କ୍ରିୟକାରୀ ଦଳ ଅଧ୍ୟାପକଙ୍କ ଘରେ ଚଢାଉ କରି ଅଧ ବ୍ୟାଗ୍ ବାରୁଦ ଜବତ କରିଛି ।
ନଜର ପକାନ୍ତୁ ଏହି ବହୁଚର୍ଚ୍ଚିତ ବିସ୍ଫୋରଣ ଓ ମୃତ୍ୟୁ ମାମଲାରେ ଅଧ୍ୟାପକ ପୁଞ୍ଜିଲାଲ ମେହେରଙ୍କ ସଂପୃକ୍ତିକୁ ନେଇ ସାମ୍ନାକୁ ଆସିଥିବା ବଡ ଥିଓରୀ ଉପରେ । ପାଟ୍ଟଣାଗଡ ଭଇଁସା କଲେଜରେ କାର୍ଯ୍ୟନିର୍ବହୀ ଅଧ୍ୟକ୍ଷ ଥିଲେ ପୁଞ୍ଜିଲାଲ ମେହେର । ସ୍ଥାୟୀ ଭାବବେ ଅଧ୍ୟକ୍ଷ ପଦରେ ରହିବା ଲାଗି ତାଙ୍କର ଅଭିଳାଶା ରହିଥିବା ଚର୍ଚ୍ଚା । ତାଙ୍କ ସ୍ଥାନରେ ମୃତ ସୌମ୍ୟଶେଖରଙ୍କ ମାଆ ହୋଇଗଲେ କଲେଜ ଅଧ୍ୟକ୍ଷା । ଯେଉଁଥିପାଇଁ ଦୁହିଁଙ୍କ ଭିତରେ ଏକ ବଡଧରଣର ବିବାଦ ରହିଥିବା କୁହାଯାଉଛି । ଅନୁମାନ କରାଯାଉଛି ଏହି ଆଧାରରେ ପର୍ସଲ ବୋମା ପଠାଇ ପରିବାରକୁ ସଫା କରିଦେବା ଉଦ୍ଦେଶ୍ୟରେ ହତ୍ୟା ଷଡଯନ୍ତ୍ର ରଚିଥାଇପାରନ୍ତି ପୁଞ୍ଜିଲାଲ ମେହେର । ହେଲେ ବିବାଦ ସେଭଳି ଗୁରୁତର ନଥିଲା ବୋଲି କହିଛନ୍ତି ମୃତ ସୌମ୍ୟଶେଖରଙ୍କ ମାଆ ।
ଗତ ଫେବ୍ରୁଆରୀ ୨୩ ତାରିଖରେ ନବ ବିବାହିତ ଦମ୍ପତିଙ୍କ ପାଇଁ ପାଟ୍ଟଣାଗଡରେ ପହଂଚିଥିଲା ଜଣେ ଅଜଣା ବନ୍ଧୁଙ୍କ ପାର୍ସଲ ଉପହାର । ଯାହାକୁ ଖୋଲିବାବେଳେ ବାସ୍ଫୋରଣ ଯୋଗୁଁ ନବ ବିବାହିତ ବର ଓ ସଂପର୍କୀୟ ଜେଜେ ମାଆଙ୍କ ମୃତ୍ୟୁ ହୋଇଥିବାବେଳେ ଗୁରୁତର ହୋଇପଡିଥିଲେ ନବ ବିବାହିତ ବଧୁ । ରହସ୍ୟରେ ରହିଥିବା ସେହି ଅଜ୍ଞାତ ପ୍ରେରକର ଠିକଣା ପାଇବା ପୋଲିସ ପାଇଁ ବଡ ଚ୍ୟାଲେଞ୍ଜ ହୋଇ ରହିଛି । ଅନୁମାନ କରାଯାଉଛି, ଖୁବଶୀଘ୍ର ଏହି ମାମଲାର ପର୍ଦ୍ଦାଫାଶ କରିବ କ୍ରାଇମବ୍ରାଂଚ ।