ବିଜେଡି ନେତାଙ୍କ ଛାତି ଧଡ଼ଧଡ଼: ଅବଶିଷ୍ଟ ଆସନ ପାଇଁ ଆଶାୟୀଙ୍କ ଭିଡ଼ । କାହାକୁ ମିଳିବ, କାହାର କଟିବ ଟିକେଟ?
କନକ ବ୍ୟୁରୋ: ବୁଧବାରଦିନ ବିଜେଡି ୭୨ ବିଧାୟକ ପ୍ରାର୍ଥୀ ଓ ୧୫ ଲୋକସଭା ପ୍ରାର୍ଥୀଙ୍କ ନାଁ ଘୋଷଣା କରିଛି । ଅନେକ ଚର୍ଚ୍ଚିତ ଆସନରେ ନାଁ ଘୋଷଣା ହୋଇନାହିଁ । ଯେକୌଣସି ମୁହୂର୍ତରେ ବାକି ୭୫ ବିଧାନସଭା ଆସନ ଗୁଡ଼ିକ ପାଇଁ ପ୍ରାର୍ଥୀ ଘୋଷଣା ହୋଇପାରେ । ଏଥିପାଇଁ ଅନେକ ନେତାଙ୍କର ଏବେଠାରୁ ଛାତି ଧଡ଼ଧଡ଼ ହେଲାଣି । କାହାର ଟିକେଟ୍ କଟିବ, କିଏ ବାଦ୍ ପଡ଼ିବ, ତାକୁ ନେଇ ନେତା ଦ୍ୱନ୍ଦ୍ୱରେ । ଘୋଷଣା ହୋଇନଥିବା ଆସନରେ ଆଶାୟୀ ଆଜି ନବୀନ ନିବାସକୁ ଆସିଛନ୍ତି । ଏହାଛଡା ଟିକେଟ୍ ପାଇବା ପରେ ସୁପ୍ରିମୋଙ୍କୁ ଧନ୍ୟବାଦ ଜଣାଇବା ପାଇଁ ସାଂସଦ ଓ ବିଧାୟକ ପ୍ରାର୍ଥୀ ନବୀନ ନିବାସ ପଂହଚିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମ ପର୍ଯ୍ୟାୟ ପ୍ରାର୍ଥୀ ଘୋଷଣା ପରେ ଏବେ ଯେକୌଣସି ମୁହୁର୍ତରେ ଘୋଷଣା ହୋଇପାରେ ବିଜେଡିର ୨ୟ ପର୍ଯ୍ୟାୟ ପ୍ରାର୍ଥୀ ତାଲିକା । ଘୋଷଣା ହେବାକୁ ଥିବା ଅବଶିଷ୍ଟ ୭୫ ବିଧାନସଭା ଏବଂ ୬ଟି ଲୋକସଭା ଆସନ ପାଇଁ ଏବେ ଅନେକ ବିଜେଡି ନେତାଙ୍କ ଛାତି ଧଡ଼ଧଡ଼ । କାହାକୁ ମିଳିବ ଟିକେଟ୍? ଏବଂ କିଏ ବାଦ୍ ପଡ଼ିବେ ତାକୁ ନେଇ ନେତା ଦ୍ୱନ୍ଦ୍ୱରେ । ଏହି ଦ୍ୱନ୍ଦ୍ୱ ଭିତରେ ନବୀନ ନିବାସ ପହଂଚିଛନ୍ତି ଟିକେଟ ଆଶାୟୀ । ଦ୍ୱିତୀୟ ପର୍ଯ୍ୟାୟରେ ବଡ଼ ବଡ଼ ନେତା ଏବଂ ବହୁ ଚର୍ଚ୍ଚିତ ଆସନ ପାଇଁ ଟିକେଟ୍ ଘୋଷଣା ହେବାକୁ ରହିଛି । ଏଭଳି ସ୍ଥିତିରେ ବଡ଼ଚଣା ବିଧାୟକ ଅମର ଶତପଥୀ, ଆନନ୍ଦପୁର ବିଧାୟକ ଭାଗିରଥୀ ସେଠୀ, କୋରେଇ ବିଧାୟକ ଆକାଶ ଦାସନାୟକଙ୍କ ସମେତ ଅନେକ ପରିଚିତ ନେତା ନବୀନ ନିବାସକୁ ଆସିଥିଲେ ।
ନବୀନ ନିବାସରେ କେବଳ ଯେ, ଟିକେଟ ଆଶୟୀ ନେତାଙ୍କ ଭିଡ଼ ଥିଲା ତାହା ନୁହେଁ, ବରଂ ଟିକେଟ୍ ପାଇବା ପରେ ସୁପ୍ରିମୋଙ୍କୁ ଧନ୍ୟବାଦ ଜଣାଇବା ପାଇଁ ପହଂଚିଥିଲେ ସାଂସଦ ଓ ବିଧାୟକ ପ୍ରାର୍ଥୀ । ଆଉ ଏହି ଧନ୍ୟବାଦ ଅର୍ପଣ ପର୍ବ ସମୟରେ ସାମ୍ନାକୁ ଆସିଛି ବିଜେଡି ଟିକେଟ୍ କସରତର କିଛି ଚିତ୍ର । ଯେଉଁମାନଙ୍କୁ ବିଜେଡି ଦଳୀୟ ଟିକେଟ ଦିଆଯାଉଛି । ସେମାନଙ୍କ ପ୍ରୋଫାଇଲ୍କୁ କେମିତି ଅନୁଧ୍ୟାନ କରାଯାଉଛି । ସାମ୍ନାରେ ରଖାଯାଇଥିବା ଫାଇଲ୍ ହିଁ ବୟାନ କରୁଛି । ନେତାଙ୍କ କାମର ଫାଇଲ୍ ଏବଂ ସଂଗଠନ ପାଇଁ କରିଥିବା କାମର ଲେଖା ଜୋଖା ପରେ ପ୍ରଥମ ପର୍ଯ୍ୟାୟ ପାଇଁ ଟିକେଟ୍ ଚୁଡ଼ାନ୍ତ ହୋଇଥିଲା । ଆଉ ଯେଉଁମାନେ ୨୦୨୪ ଲଢ଼େଇ ପାଇଁ ଟିକେଟ୍ ପାଇଛନ୍ତି, ସେମାନେ ଧନ୍ୟବାଦ ଦେବା ପାଇଁ ନବୀନ ନିବାସରେ ପହଂଚିଛନ୍ତି । ଟିକେଟ ପାଇଥିବା ପ୍ରାର୍ଥୀ ଏବେ ଗ୍ରାଉଣ୍ଡ ଜିରୋକୁ ଯାଇ ୨୪ ଲଢ଼େଇ ପାଇଁ ପ୍ରସ୍ତୁତି ଆରମ୍ଭ କରିଥିବା ବେଳେ ଟିକେଟ ଆଶାୟୀ ଥିବା ନେତା ଏବେ ଦ୍ୱିତୀୟ ପର୍ଯ୍ୟାୟ ଘୋଷଣାକୁ ଅପେକ୍ଷା କରିଛନ୍ତି ।