ରାଉରକେଲା ଷ୍ଟେସନରୁ ମିଳିଲା କୋଟି କୋଟି ଟଙ୍କା ! ୨ଟି ଟ୍ରଲି ବ୍ୟାଗରୁ ୨କୋଟି ୨୩ଲକ୍ଷ ଟଙ୍କା ଜବତ, କୁଆଡେ ଯାଉଥିଲା ଏତେ ପରିମାଣର ଟଙ୍କା ?
କନକ ବ୍ୟୁରୋ : ରାଉରକେଲା ଷ୍ଟେସନରୁ ଜବତ ହେଲା ୨କୋଟିରୁ ଅଧିକ ଟଙ୍କା । ୨ଟି ଟ୍ରଲି ବ୍ୟାଗରୁ ଏତେ ପରିମାଣର ଟଙ୍କା ଜବତ କରାଯାଇଛି । ଜବତ ଟଙ୍କା ମୋଟ ୨ କୋଟି ୨୩ ଲକ୍ଷ ଟଙ୍କା ହେବ । ଏହି ଘଟଣାରେ ୩ ଜଣ ଆନ୍ତଃରାଜ୍ୟ ଲୁଟେରାଙ୍କୁ ଆରପିଏଫ ଗିରଫ କରିି ଜିଆରପିକୁ ହସ୍ତାନ୍ତର କରିଛି । ଟଙ୍କା କେଉଁଠୁ ଆସିଲା ଓ କୁଆଡେ ଯାଉଥିଲା ସେ ନେଇ ଛାନଭିନ କରାଯାଉଛି । ଆସନ୍ତାକାଲି ଆରପିଏଫ ଏବଂ ଜିଆରପି ଏନେଇ ମିଳିତ ପ୍ରେସମିଟ୍ କରିବେ । ତେବେ ମିଳିଥିବା ସୂଚନା ଅନୁସାରେ, ଗତ ୧୯ ଜାନୁଆରୀରେ ଅହମଦାବାଦ ଜିଆରପିରେ ୩ ଲକ୍ଷ ଟଙ୍କାର ସୁନା ଗହଣା ଓ ଟଙ୍କା ଚୋରି ନେଇ ଅଭିଯୋଗ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଗତ ମାର୍ଚ୍ଚ ୩ତାରିଖରେ ବଡ ଧରଣର ନଗଦ ଟଙ୍କା ଚୋରି ନେଇ ହାୱଡା ଜିଆରପିରେ ଅଭିଯୋଗ ହୋଇଥିଲା । କୁହାଯାଉଛି, ନଗଦ ଟଙ୍କାର ପରିମାଣ ୨କୋଟିରୁ ଅଧିକ ହେବ । ଏନେଇ ଷ୍ଟେସନରେ ସିସିଟିଭି ଫୁଟେଜ୍ ଯାଂଚ୍ କରାଯାଇ ଜିଆରପିକୁ ତଥ୍ୟ ଦିଆଯାଇଥିଲା । ସେବେଠୁ ରାଉରକେଲା ଆରପିଏଫର ଏକ ଟିମ୍ ଘଟଣାର ତଦନ୍ତ କରୁଥିଲେ । ଅନ୍ୟପଟେ ଧରାପଡିଥିବା ଲୁଟେରା ଟଙ୍କା ଚୋରି କରିଥିବା ନେଇ ସ୍ୱୀକାର କରିଥିବା ଆରପିଏଫ ଅଧିକାରୀ କହିଛନ୍ତି । କିନ୍ତୁ ଜିଆରପି ଏନେଇ କିଛି ବି ସ୍ପଷ୍ଟ କରୁନାହିଁ । ସେପଟେ ନିର୍ବାଚନ ପୂର୍ବରୁ ଏତେ ପରିମାଣର ଟଙ୍କା ଜବତ ହେବା ଅନେକ ପ୍ରଶ୍ନ ଠିଆ କରିଛି ।