ଦୁଃଖ ଦେଇଗଲା ‘ବୁଲବୁଲ୍’: ବର୍ଷାରେ ଜଗତସିଂହପୁର,କେନ୍ଦ୍ରାପଡ଼ା, ଯାଜପୁର ଓ କେନ୍ଦୁଝରର ଅନେକ ଅଂଚଳରେ ଉଜୁଡିଲା ଫସଲ, ବିଲରେ ଶୋଇଛି ଧାନଗଛ
ବ୍ୟାପକ ଫସଲନଷ୍ଟ; ଜଣକର ମୃତ୍ୟୁ ଅଭିଯୋଗ
କନକ ବ୍ୟୁରୋ: ସାମୁଦ୍ରିକ ବାତ୍ୟା ବୁଲବୁଲ୍ ଉଜାଡି ଦେଇଗଲା ଚାଷୀଙ୍କ ସୁନାର ଫସଲ । ଲଗାଣ ବର୍ଷା ଯୋଗୁଁ ଜଗତସିଂପୁର ଜିଲ୍ଲାରେ ନଷ୍ଟ ହୋଇଛି ଶହ ଶହ ହେକ୍ଟରର ଧାନ ଫସଲ ।ଧାନକେଣ୍ଡା ଧରିଥିବା ବେଳେ ବର୍ଷା ପବନ ଯୋଗୁଁ ବିଲରେ ଶୋଇଛି ଧାନ ଗଛ । ସେହିପରି କେନ୍ଦ୍ରାପଡ଼ା ମହାକାଳପଡ଼ା ବ୍ଲକରେ ବ୍ୟାପକ ଧାନଫସଲ ନଷ୍ଟ ହୋଇଛି । ଲଗାଣ ବର୍ଷା ଓ ପବନରେ ଧାନ ଗଛ ସବୁ ନଷ୍ଟ ହୋଇଛି । ଯାହାକୁ ନେଇ ଚାଷୀ ଏବେ ଚିନ୍ତାରେ । ସେହିପରି କେନ୍ଦୁଝର ହାଟଡ଼ିହି ବ୍ଲକର ପ୍ରାୟ ୩୧ଟି ପଂଚାୟତରେ ଧାନ ଫସଲ ନଷ୍ଟ ହୋଇଛି । ଏହି ସମୟରେ ବିଶେଷ କରି ଧାନ ଫୁଲ ଦେଇଥାଏ ।
Kanak News is now on WhatsApp
Join and get latest news updates delivered to you via WhatsApp
ପବନ ବର୍ଷାର ମାଡ ଖାଇବା ପରେ ଏଥର ଧାନ ଫସଲ ମାଡ ଖାଇଯିବ ବୋଲି ଚାଷୀ ଆଶଙ୍କା କରୁଛନ୍ତି । ସେପଟେ ଯାଜପୁରରେ ଧାନ ସହିତ ବିଭିନ୍ନ ପନିପରିବା ଚାଷ ବୁଲବୁଲ୍ ପ୍ରଭାବିତ ହୋଇଛି । ଧାନ କିଆରିରେ ଏବେ ୩ ରୁ୪ ପୁଂଟ୍ ଉଚ୍ଚତାରେ ପାଣି ଜମିଥିବାରୁ ଧାନ ଗଛ ଅନେକ ଅଂଚଳରେ ବୁଡି ଯାଇଛି । ଏମିତିରେ ଫସଲ ନଷ୍ଟ ହେଲେ ଧାର କରଜ କରି ଚାଷୀ କରିଥିବା ଚାଷୀ କେମିତି ଋଣ ସୁଝିବ ତାକୁ ନେଇ ଚିନ୍ତାରେ ପଡିଛି ଚାଷୀ ।
ସେପଟେ ବାତ୍ୟା ଯୋଗୁଁ କେନ୍ଦ୍ରାପଡ଼ା ଜିଲ୍ଲା ରାଜକନିକା ବ୍ଳକରେ ଜଣଙ୍କର ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଗଜରାଜପୁର ଗାଁରେ ଗଣେଶ୍ୱର ମଳିକ ନାମକ ୭୨ ବର୍ଷର ଜଣେ ବୃଦ୍ଧଙ୍କର ମୃତ୍ୟୁ ହୋଇଛି । ଘରେ ସେ ଶୋଇଥିବା ବେଳେ ପବନରେ ଉଡି ଆସି ଏକ ଆଜବେଟସ୍ ଖଣ୍ଡ ତାଙ୍କ ଉପରେ ପଡ଼ିଥିଲା ବୋଲି କହିଛନ୍ତି ଗ୍ରାମବାସୀ । ଗଣେଶ୍ୱରଙ୍କ ଛାତି ଉପରେ ଆଜବେଟସ୍ ମାଡ଼ ହେବାରୁ ତାଙ୍କର ମୃତ୍ୟୁ ହୋଇଥିବା ଅଭିଯୋଗ ହୋଇଛି । ତେବେ ପ୍ରଶାସନ ପକ୍ଷରୁ କୁହାଯାଇଛି ଯେ ପୋଷ୍ଟମର୍ଟମ ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ।