ପରୀ ହତ୍ୟା ମାମଲାକୁ ନେଇ ଦିନ ତମାମ ବନ୍ଦ ରହିଲା ବିଧାନସଭା । ଅରୁଣ ସାହୁଙ୍କ ଇସ୍ତଫା ଦାବିରେ ଅଡି ରହିଲେ ବିରୋଧୀ । ମନ୍ତ୍ରୀ କହିଲେ, ଘଟଣାକୁ ନେଇ କରାନଯାଉ ରାଜନୀତି, ଦୋଷୀ ଯିଏ ଥିବ ଦଣ୍ଡ ପାଇବ ।
କନକ ବ୍ୟୁରୋ : ପରୀ ମୃତ୍ୟୁ ମାମଲାରେ ଗୃହରେ ବିବୃତି ରଖିଛନ୍ତି କୃଷିମନ୍ତ୍ରୀ ଅରୁଣ ସାହୁ । ପରୀ ମୃତ୍ୟୁ ପ୍ରସଙ୍ଗରେ ଅଭିଯୁକ୍ତ ବାବୁଲି ନାୟକକୁ ସୁରକ୍ଷା ଯୋଗାଉଥିବା ଅଭିଯୋଗ କରି ଆଜି ବିରୋଧୀ ତାଙ୍କର ଇସ୍ତଫା ଦାବି କରିଥିଲେ । ଗୃହରେ ଉତ୍ତର ରଖି କୃଷି ମନ୍ତ୍ରୀ ଅରୁଣ ସାହୁ କହିଛନ୍ତି, ଯିଏ ଦୋଷ କରିଥିବ ସେ ନିଶ୍ଚୟ ଦଣ୍ଡ ପାଇବ, ଏହାକୁ ନେଇ ରାଜନୀତି କରାନଯାଉ ।
Kanak News is now on WhatsApp
Join and get latest news updates delivered to you via WhatsApp
ଅଭିଯୁକ୍ତକୁ ସୁରକ୍ଷା ଦେଉଥିବା ନେଇ ମନ୍ତ୍ରୀଙ୍କ ଭୂମିକା ଉପରେ ପ୍ରଶ୍ନ ଉଠାଇ ବିରୋଧି ଇସ୍ତଫା ଦାବି କରିବା ପରେ ଏ ଥିଲା ମନ୍ତ୍ରୀ ଅରୁଣ ସାହୁଙ୍କ ବିବୃତି । କିନ୍ତୁ ବିରୋଧି ଆକ୍ରମଣ ମୁଡରେ ଥିଲେ । କୌଣସି କଥା ତାଙ୍କୁ ସନ୍ତୁଷ୍ଟ କରୁନଥିଲା ।
୪ମାସ ତଳେ ଜୁଲାଇ ୧୪ ତାରିଖରେ ଏହି ନୀରିହ ୫ବର୍ଷର ଝିଅକୁ ହତ୍ୟା କରି ଏକ ଅଖା ଭିତରେ ଭର୍ତି କରି ଫୋପାଡି ଦିଆଯାଇଥିଲା । କିନ୍ତୁ ନୟାଗଡ ପୋଲିସ ୪ମାସ ପରେ ବି ଦୋଷୀ ପାଖରେ ପହଂଚିପାରିଲା ନାହିଁ କିମ୍ବା ହତ୍ୟାର କାରଣ ସମ୍ପର୍କରେ ବି କୌଣସି ସୁରାଗ ପାଇଲା ନାହିଁ । ସେପଟେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ତଦନ୍ତ ପ୍ରକ୍ରିୟାକୁ ନେଇ ପ୍ରଶ୍ନ ଉଠାଇଛନ୍ତି ।
ସେପଟେ ହାଇକୋର୍ଟରେ ଜନସ୍ୱାର୍ଥ ମାମଲା ରୁଜୁ କରିଛି ଭାରତୀୟ ବିକାଶ ପରିଷଦ । ପରୀ ହତ୍ୟା ଘଟଣାର ସିବିଆଇ ତଦନ୍ତ ପାଇଁ ଅନୁରୋଧ କରାଯିବା ସହିତ ପୀଡ଼ିତ ପରିବାରକୁ ୨୫ ଲକ୍ଷ ଟଙ୍କାର କ୍ଷତିପୂରଣ ଦେବାକୁ ଆବେଦନରେ ଦର୍ଶାଯାଇଛି ।