ସବୁଜ ଜହର ପଛରେ ମହିଳା ଗ୍ୟାଙ୍ଗ; କୁଆଡ଼େ ଲମ୍ବିଛି ଚେର?

କନକ ବ୍ୟୁରୋ: ଗଞ୍ଜେଇ ଚୋରା ଚାଲାଣର ନୂଆ ତରିକା । ଯାତ୍ରୀବାହୀ ବସରେ ଗଞ୍ଜେଇ ଚୋରା ଚାଲାଣ କରୁଛନ୍ତି ମହିଳା । ସୂଚନା ପାଇ ମହିଳା ଗ୍ୟାଙ୍ଗକୁ ଠାବ କରିଛି କୋଟିନାଡ଼ା ପୁଲିସ୍ । ଯାତ୍ରୀବାହୀ ବସରୁ ୬୩ କିଲୋ ଗଞ୍ଜେଇ ଜବତ କରି କନ୍ଧମାଳ ଜିଲ୍ଲାର ୫ ମହିଳା ଓ ଜଣେ ପୁରୁଷକୁ ଗିରଫ କରିଛି କୋଟିନଡା ପୁଲିସ । 

ପୁଲିସ୍ ସୂଚନା ମୁତାବକ ବସରେ ଗଞ୍ଜେଇ ଯାଉଥିବାର ଖବର ପାଇଥିଲା । ଏହାପରେ ଆସିକାରୁ କୋଦଳା ଯାଉଥିବା ବସକୁ କଲେଜ ଛକ ଠାରେ ଅଟକାଇଥିଲେ ଏବଂ ସେଥିରୁ ଗଞ୍ଜେଇ ଗ୍ୟାଙ୍ଗଠୁ ବିପୁଳ ପରିମାଣର ଗଞ୍ଜେଇ ଜବତ କରିଛି ପୁଲିସ୍ । 

ପୂର୍ବରୁ ମଧ୍ୟ ଗଞ୍ଜେଇ ଚାଲାଣ ରାକେଟ୍‌ରେ ସୁନ୍ଦରୀ ମହିଳାଙ୍କ ସମ୍ପୃକ୍ତି  ଖବର ସାମ୍ନାକୁ ଆସିଥିଲା । ୨୦୨୧ରେ ୩ ଜଣ ମହିଳା ମାଫିଆଙ୍କୁ କେନ୍ଦ୍ରାଞ୍ଚଳ ଅବକାରୀ ଗୁଇନ୍ଦା ବିଭାଗ ନିର୍ଗୁଣ୍ତି ରେଳ ଷ୍ଟେସନ୍‌ ନିକଟରୁ ଗିରଫ କରିଥିଲା । ସେମାନଙ୍କ ନିକଟରୁ ୧୧ ଲକ୍ଷ ଟଙ୍କାର ୧ କ୍ବିଣ୍ଟାଲ ୫ କେଜି ଓଜନର ଗଞ୍ଜେଇ ଜବତ ହୋଇଥିଲା । ଉକ୍ତ ମହିଳା ମାଫିଆମାନେ ପଶ୍ଚିମବଙ୍ଗ ବୋଲି ଜଣାପଡ଼ିଥିଲା । ଏମାନେ ସମସ୍ତେ ନିଜ ନିଜ ସ୍ବାମୀଙ୍କ ସହିତ ବିବାହ ବିଚ୍ଛେଦ କରିବା ପରେ ଏଭଳି ମାଫିଆଗିରି ଆରମ୍ଭ କରି ଦେଇଥିଲେ । କିନ୍ତୁ ମାଟ୍ରିକ ଫେଲ୍‌ ଏହି ମହିଳାମାନେ ଏଭଳି ଅନ୍ତଃରାଜ୍ୟ ମାଫିଆ କାରବାରରେ ନିୟୋଜିତ ହେବା ଖବର ସେତେବେଳେ ଚାଞ୍ଚଲ୍ୟ ଖେଳାଇଥିଲା । ୨୦୧୮ରୁ ଆଜି ପର୍ଯ୍ୟନ୍ତ ଗଞ୍ଜେଇ ଓ ବ୍ରାଉନ୍‌ସୁଗାର ମାମଲାରେ ମୋଟ ୨୦ରୁ ଅଧିକ ମହିଳାଙ୍କୁ ଗିରଫ କରାଯାଇଥିବା ସୂଚନା ମିଳିଛି ।