ଚୋର ଦେଉଛି ଚକ୍‌ମା, ପୁଲିସ ଭକୁଆ

କନକ ବ୍ୟୁରୋ : ସମାନ ଷ୍ଟାଇଲ, ସମାନ ଚୋର । ଦେହରେ ଟାଟୁ, ହାତରେ ବଳା । ସମାନ ଢଙ୍ଗରେ ଚୋରି କରୁଛନ୍ତି ୩ ଜଣିଆ ଚୋର ଦଳ । ବାଲେଶ୍ବର ସୁପ୍ରତିକ ଲାଇଫ ଷ୍ଟାଇଲ କମ୍ଲେକ୍ସରେ ତିନିଟି ଘରେ କଳାକନା ବୁଲେଇଲେଣି । ଗତ ମାସ ୨୫ ତାରିଖ ରାତିରେ ବାସୁଦେବପୁର ମ୍ୟୁନିସିପାଲଟି ଚେୟାରମ୍ୟାନ ନିବେଦିତା ବେହେରାଙ୍କ ଘର ତାଲା ଭାଙ୍ଗି ୯ ଲକ୍ଷ ଟଙ୍କା ଓ ସୁନାଗହଣା ଲୁଟି ନେଇଥିଲେ । ରବିବାର ରାତିରେ ପୁଣି ଆଉ ୨ଟି ଘରୁ ଚୋରି କରିଛି ଏହି ଗ୍ୟାଙ୍ଗ । ଘରେ କେହି ନଥିବାର ସୁଯୋଗ ନେଇ କଳାକନା ବୁଲାଇ ଦେଇଛନ୍ତି । 

ସିସିଟିଭି ଫୁଟେଜରେ ପୂରା ଚିତ୍ର କଏଦ ହୋଇଛି । ଜଣେ ଚୋର ଦେହରେ ଟାଟୁ ଅଛି, ଆଉ ହାତରେ ବଳା ପିନ୍ଧିଛି । ଚୋର ମାନେ ଲାଗାତାର ବି-୩୦, ବି-୨୩ ଓ ବି-୧୫ ଘରୁ ଚୋରି କରିଛନ୍ତି । ପୁଲିସ ଆସିଲା, ସିସିଟିଭି ଯାଞ୍ଚ କଲା । ହେଲେ କିଛି ବି ସୁରାକ୍ ପାଇଲାନି ପୁଲିସ । ତିନି ଜଣିଆ ଚୋର ଗ୍ୟାଙ୍ଗ ବାରମ୍ଵାର ଏହି ଅଞ୍ଚଳରୁ ଚୋରୀ କରୁଥିବା ବେଳେ ପୁଲିସ ତତ୍ପରତା ଦେଖାଉନଥିବା ଅଭିଯୋଗ କରିଛନ୍ତି କଲୋନୀ ବାସୀ । ସଦର ଥାନା ପାଖରେ ରହିଛି କଲୋନୀ । ହେଲେ ଅପରାଧୀଙ୍କୁ ନାହିଁ ପୁଲିସ ଭୟ । ଆଖିରେ ଆଙ୍ଗୁଠି ଗେଞ୍ଜି କରୁଛନ୍ତି ସିରିଜ୍‌ ଲୁଟ୍‌ । ଯାହା ପୁଲିସର ପାରିବାପଣିଆ ଉପରେ ପ୍ରଶ୍ନଚିହ୍ନ ଛିଡ଼ା କରିଛି ।