ହୀରା ପଥର ବ୍ୟବସାୟରୁ ଗୁଳିକାଣ୍ଡ : ଆନ୍ଧ୍ରକୁ ଲମ୍ବିଛି କେଳେଙ୍କାରୀର ଲମ୍ବା ଚେର

କନକ ବ୍ୟୁରୋ : ଗତ ମଙ୍ଗଳବାର ରାତିରେ ହୀରା ପଥର ବ୍ୟବସାୟୀ ବାଳକୃଷ୍ଣ ଆଚାରୀଙ୍କୁ ଗୁଳିମାଡ଼ ଘଟଣାରେ ପୁଲିସ ହାତରେ ଲାଗିଛି ଗୁରୁତ୍ୱପୂର୍ଣ୍ଣ ସୁରାକ। ଗୁଳିମାଡ଼ରେ ଆହତ ବାଳକୃଷ୍ଣଙ୍କ ନାଁରେ ମାଳମାଳ ଅଭିଯୋଗ । କୋଟି କୋଟି ଟଙ୍କାର ଠକେଇ କରିଥିବା ଅଭିଯୋଗ ହୋଇଛି ପୁଲିସ ପାଖରେ । ତେଣୁ ସେ ଦିଗକୁ ବି ତଦନ୍ତ କରିବା ନେଇ ବ୍ରହ୍ମପୁର ଏସ୍‌ପି ସ୍ପଷ୍ଟ କରିଛନ୍ତି । ହନୁମାନ ଟଙ୍କା ଓ ହୀରା ପଥର ବ୍ୟବସାୟର ସିଣ୍ଡିକେଟ୍‌ କେଉଁଯାଏ ଲମ୍ବିଛି, ତାହା ଖୋଜିବା ଏବେ ପୁଲିସ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି ।

ସେପଟେ ପୁଲିସ ଖାପଚାରେ ଗୁଳିକାଣ୍ଡର ମୁଖ୍ୟ ଅଭିଯୁକ୍ତ । ହୀରା ପଥର ଯାଞ୍ଚ କରିବା ବାହାନାରେ ଲୁଟ୍‌ କରୁଥିବା ବେଳେ ଏହାକୁ ନେଇ ଗୁଳିମାଡ଼ ହୋଇଥିବା ପ୍ରାଥମିକ ତଦନ୍ତରେ ପୁଲିସ ଜାଣିବାକୁ ପାଇଛି । ତେବେ
କେତେ ଟଙ୍କାରେ ହୋଇଥିଲା ଡିଲ୍‌? 
କେଉଁଆଡ଼େ ଯାଇଥାନ୍ତା ହୀରାପଥର? 
ସିଣ୍ଡିକେଟ୍‌ରେ କିଏ କିଏ ସାମିଲ ଅଛନ୍ତି ? 
ଝାଳବୁହା ଜେରାରେ ଏଭଳି ଅନେକ ପ୍ରଶ୍ନର ଉତ୍ତର ଖୋଜିବାକୁ ଚେଷ୍ଟା ଚଳାଇଛି ବ୍ରହ୍ମପୁର ପୁଲିସ । ଗୋଟିଏ ପଟେ ଗୁଳିମାଡ଼ରେ ଆହତ ବାଳକୃଷ୍ଣ ଏବେ ବି ମେଡିକାଲ ବେଡ୍‌ରେ । ଅନ୍ୟପଟେ ତାଙ୍କ ନାଁରେ ଠକେଇ ଅଭିଯୋଗ ଥାନାରେ ପହଂଚିଲାଣି । ଦୁଇଟିଯାକ ମାମଲା ପୁଲିସ ପାଇଁ  ମୁଣ୍ଡବିନ୍ଧା ବଢ଼ାଇଥିଲା ବେଳେ କେବେ ରହସ୍ୟ ଉପରୁ ପରଦା ଉଠୁଛି ଦେଖିବାକୁ ବାକି ରହିଲା ।