ସବୁ ସୀମା ଟପିଲା ସୈତାନ; ଏଚ୍ଆଇଭି ଆକ୍ରାନ୍ତ ନାବାଳିକାଙ୍କୁ କଲା ଦୁଷ୍କର୍ମ

କନକ ବ୍ୟୁରୋ: ମହାରାଷ୍ଟ୍ରର ଲାଗୁରସ୍ଥିତ ଏକ ଶିଶୁ ଆଶ୍ରୟସ୍ଥଳୀରେ ଜଣେ ଏଚ୍ଆଇଭି ସଂକ୍ରମିତା ନାବାଳିକା ଦୁଇ ବର୍ଷ ଧରି ଦୁଷ୍କର୍ମର ଶିକାର ହୋଇ ଗର୍ଭବତୀ ହେବା ପରେ ତାଙ୍କୁ ଗର୍ଭପାତ କରାଇବାକୁ ବାଧ୍ୟ କରାଯାଇଥିବା ଅଭିଯୋଗ ହୋଇଛି । ୧୬ ବର୍ଷୀୟା ନାବାଳିକା ଜଣକ ଥାନାରେ ଅଭିଯୋଗ କରିଛନ୍ତି ଯେ, ୨୦୨୩ ଜୁଲାଇ ୧୩ରୁ ଚଳିତ ବର୍ଷ ଜୁଲାଇ ୨୩ ମଧ୍ୟରେ ଏଚ୍ଆଇଭି ସଂକ୍ରମିତ ଶିଶୁଙ୍କ ଆଶ୍ରୟସ୍ଥଳୀ ‘ସେବାଳୟ’ରେ ଜଣେ କର୍ମଚାରୀ ତାଙ୍କୁ ୪ ଥର ଦୁଷ୍କର୍ମ କରିଥିଲେ ।

ଅସୁସ୍ଥ ହେବା ପରେ ତାଙ୍କୁ ଡାକ୍ତରଖାନା ନିଆଯାଇଥିଲା, ଯେଉଁଠାରେ ପରୀକ୍ଷାରୁ ଜଣାପଡ଼ିଥିଲା ଯେ ସେ ୪ ମାସର ଗର୍ଭବତୀ ଅଛନ୍ତି । ଏହାପରେ ଅଭିଯୁକ୍ତ ଜଣେ ଡାକ୍ତରଙ୍କୁ ଅଣାଇ ନାବାଳିକାଙ୍କ ବିନା ଅନୁମତିରେ ଗର୍ଭପାତ କରାଇଥିଲେ ବୋଲି ଜଣେ ଅଧିକାରୀଙ୍କ ବୟାନ ଦେଇ ଏକ ନ୍ୟୁଜ୍ ଏଜେନ୍ସି ରିପୋର୍ଟ କରିଛି । ଏଥିସହ କାହାକୁ ଏକଥା ପ୍ରକାଶ ନ କରିବାକୁ ତାଙ୍କୁ ଧମକ ଦିଆଯାଇଥିଲା । ଏହାପରେ ନାବାଳିକା ଜଣକ ଅଧିକାରୀଙ୍କୁ ଚିଠି ଲେଖି ଅଭିଯୋଗ ବାକ୍ସରେ ପକାଇଥିଲେ । ତେବେ ଅନୁଷ୍ଠାନ କର୍ତ୍ତୃପକ୍ଷ ତାଙ୍କୁ ସାହାଯ୍ୟ ନ କରି ଚିଠି ଫାଡ଼ି ଦେଇଥିଲେ । ଗିରଫ ଅଭିଯୁକ୍ତମାନଙ୍କ ମଧ୍ୟରେ ସେବାଳୟର ପ୍ରତିଷ୍ଠାତା ରବି ବାପତଲେ, ଅଧୀକ୍ଷକ ରଚନା ବାପତଲେ ଓ କର୍ମଚାରୀ ଅମିତ ମହାମୁନି ଓ ପୂଜା ୱାଘିମାରେ ଅଛନ୍ତି । ଏହାର ୱେବସାଇଟ୍ ଅନୁଯାୟୀ, ସେବାଳୟରେ ୨୩ ଜଣ ପୁଅ ଓ ୭ ଜଣ ଝିଅ ରହୁଛନ୍ତି, ଯେଉଁମାନେ ସମସ୍ତେ ଏଚ୍ଆଇଭି ସଂକ୍ରମିତ ଅଟନ୍ତି । ଅନୁଷ୍ଠାନର ସମସ୍ତ କର୍ମଚାରୀ ମାଗଣାରେ କାମ କରୁଛନ୍ତି ବୋଲି ୱେବସାଇଟ୍‌ରେ କୁହାଯାଇଛି ।