ମରଣମୁହଁରେ ଛାଡ଼ିଦେଲା ବୟଫ୍ରେଣ୍ଡ

କନକ ବ୍ୟୁରୋ: ଯେତେ କଡ଼ା ଭାଷାରେ ନିନ୍ଦା କଲେ ବି କମ୍ ପଡ଼ିବ । ପୁଣି ମଣିଷ ପାଲଟିଲା ପିଶାଚ । ନର ରାକ୍ଷସଙ୍କ ଯୌନ ଉତ୍ପୀଡ଼ନର ଶିକାର ହେଲେ ଯୁବତୀ । ଜଘନ୍ୟ…ସାଂଘାତିକ…ସମ୍ବେଦନଶୀଳ ଘଟଣା । ମେଡିକାଲ ପରି ସ୍ଥାନରେ ଯେବେ ଗଣଦୁଷ୍କର୍ମ ହେଲା ତାହା କେତେ ସଙ୍ଗିନ ଆପଣମାନେ ଉଣାଅଧିକେ ବୁଝୁଥିବେ । ଗତବର୍ଷ କୋଲକାତାର ଆରଜିଏଚ୍‌ ମେଡିକାଲ କଲେଜରେ ଜଣେ ଛାତ୍ରୀଙ୍କୁ ଦୁଷ୍କର୍ମ ପରେ ହତ୍ୟା ଘଟଣାକୁ ନେଇ କୋଲକାତା ଜଳିଥିଲା । ପୂରା ଦେଶରେ ଏହାକୁ ନେଇ ଆକ୍ରୋଶ ଦେଖାଯିବା ପରେ ପୁଣି ଥରେ ସମାନ ଘଟଣା ଘଟିଛି ପଶ୍ଚିମବଙ୍ଗରେ ।

Advertisment

ପୁଣି ବଦନାମ ହେଲା ବଙ୍ଗ
ସେହି ମେଡିକାଲ ଛାତ୍ରୀ, ସେହି ଦୁଷ୍କର୍ମ
ସେଥର ବଙ୍ଗର ଝିଅ, ଏଥର ଓଡ଼ିଶାର…
ଗଣଦୁଷ୍କର୍ମର ଶିକାର ହେଲେ ଡାକ୍ତରୀ ଛାତ୍ରୀ
ଆଇସିୟୁ ବେଡ୍‌ରେ ମରଣ ସହ କରୁଛନ୍ତି ସଂଘର୍ଷ

ଆରଜି କର ହସ୍ପିଟାଲ କଥା ମନରୁ ନଲିଭୁଣୁ, ପଶ୍ଚିମବଙ୍ଗରେ ଗଣଦୁଷ୍କର୍ମର ଶିକାର ହୋଇଛନ୍ତି ଜଣେ ଓଡ଼ିଆ ଡାକ୍ତରୀ ଛାତ୍ରୀ । ମେଡିକାଲ ଆଇସିୟୁରେ ମୃତ୍ୟୁ ସହ ସଂଘର୍ଷ କରୁଛନ୍ତି ପୀଡ଼ିତା । ଏହାକୁ ନେଇ କଲେଜ କ୍ୟାମ୍ପସରେ ପ୍ରବଳ ଉତ୍ତେଜନା । ସାରା ଦେଶରେ ହଇଚଇ ସୃଷ୍ଟି ହୋଇଛି । ପଶ୍ଚିମବଙ୍ଗ ବର୍ଦ୍ଧମାନ ଜିଲ୍ଲାର ଦୁର୍ଗାପୁରରେ ଏଭଳି ଉଦବେଗଜନକ ଘଟଣା ଘଟିଛି । ଘରୋଇ ମେଡିକାଲ କଲେଜରେ ପଢୁଥିଲେ ସମ୍ପୃକ୍ତ ଓଡ଼ିଆ ଛାତ୍ରୀ । MBBS ଦ୍ବିତୀୟ ବର୍ଷର ଛାତ୍ରୀଙ୍କ ସହ ଗଣଦୁଷ୍କର୍ମ ଅଭିଯୋଗ ହୋଇଛି । ପୀଡ଼ିତାଙ୍କ ଘର ବାଲେଶ୍ବର ଜିଲ୍ଲା ଜଳେଶ୍ବର ଅଞ୍ଚଳରେ । ପଶ୍ଚିମବଙ୍ଗ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି । ଘଟଣାକୁ ନେଇ ମେଡିକାଲ କଲେଜ କ୍ୟାମ୍ପସ୍ ସମେତ ଦୁର୍ଗାପୁରରେ ଉତ୍ତେଜନା ପ୍ରକାଶ ପାଇଛି । ଆଉ ଏହାରି ଭିତରେ ଗତକାଲି ୩ ଅଭିଯୁକ୍ତଙ୍କୁ ଗିରଫ କରିଛି ପୁଲିସ୍‌ ।

କେମିତି ଘଟିଥିଲା ଏହି ଦୁର୍ଘଟଣା ?

- ଶୁକ୍ରବାର ରାତି ପ୍ରାୟ ୮ଟା ୩୦ ବେଳେ କଲେଜ କ୍ୟାମ୍ପସ ବାହାରକୁ ଯାଇଥିଲେ ଯୁବତୀ
- ଜଣେ ପୁରୁଷ ବନ୍ଧୁଙ୍କ ସହ ଯାଇଥିବା ବେଳେ ପିଛା କରିଥିଲେ କିଛି ଦୁର୍ବୃତ୍ତ
- କ୍ୟାମ୍ପସ୍ ଗେଟ୍ ନିକଟରେ ତାଙ୍କୁ ନିଛାଟିଆ ଜାଗାକୁ ଟାଣି ନେଇଥିଲେ ଦୁର୍ବୃତ୍ତ
- ଜଙ୍ଗଲିଆ ଜାଗାରେ ଛାତ୍ରୀଙ୍କୁ ଗଣଦୁଷ୍କର୍ମ ଅଭିଯୋଗ
- ପୁରୁଷ ବନ୍ଧୁ ଯୁବତୀଙ୍କୁ ଏକୁଟିଆ ଛାଡ଼ି ଦୌଡ଼ି ପଳାଇଥିବା ଅଭିଯୋଗ
- ଘଟଣାରେ ପୁରୁଷ ବନ୍ଧୁଙ୍କ ସଂପୃକ୍ତିକୁ ନେଇ ଉପୁଜିଛି ସନ୍ଦେହ
- ପୀଡ଼ିତାଙ୍କ ଠାରୁ ମୋବାଇଲ୍ ଓ ୫ହଜାର ଟଙ୍କା ଛଡ଼ାଇନେଲେ ଦୁର୍ବୃତ୍ତ

ଦୁଷ୍କର୍ମ ଘଟଣାକୁ ନେଇ ଅଡ଼ୁଆରେ ଦିଦି
ସେବେ ବିଦ୍ରୋହ ହୋଇଥିଲା, ଏବେ ବି ବିଦ୍ରୋହ ହେଲା

ପଶ୍ଚିମବଙ୍ଗରେ ଘଟିଥିବା ଅଘଟଣକୁ ନେଇ ଦିଦିଙ୍କ ଉପରେ ଆଙ୍ଗୁଳି ଉଠିଲାଣି । ମୁଖ୍ୟମନ୍ତ୍ରୀ ନିଜେ ଜଣେ ମହିଳା ହୋଇଥିବାରୁ ବାରମ୍ବାର କାହିଁକି ଏମିତି ଘଟଣା ଘଟୁଛି ତାହାକୁ ନେଇ ନାନାପ୍ରଶ୍ନ ଉଙ୍କି ମାରୁଛି । ଖାଲି ଏତିକି ନୁହେଁ ବରଂ ଦିଦିଙ୍କ ଗଡ଼ରେ ଆଇନଶୃଙ୍ଖଳା ବିପର୍ଯ୍ୟସ୍ତ ବୋଲି ବିରୋଧୀ ସିଧାସିଧା କହିଛନ୍ତି । ଏପଟେ, ପଶ୍ଚିମବଙ୍ଗରେ ଓଡ଼ିଆ ଛାତ୍ରୀଙ୍କୁ ଗଣଦୁଷ୍କର୍ମ ଘଟଣାକୁ କଡ଼ା ନିନ୍ଦା କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଏହା ଅତ୍ୟନ୍ତ ନିନ୍ଦନୀୟ ଓ ପୀଡ଼ାଦାୟକ ବୋଲି ସୋସିଆଲ ମିଡିଆରେ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ । ଲେଖିଛନ୍ତି, ’ଏହି ଖବର ଶୁଣି ମୁଁ ଗଭୀର ଭାବେ ମର୍ମାହତ । ଏହି ସମ୍ବେଦନଶୀଳ ଘଟଣାରେ, ଅଭିଯୁକ୍ତମାନଙ୍କ ବିରୁଦ୍ଧରେ ଆଇନ ଅନୁଯାୟୀ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନେବା ପାଇଁ ମୁଁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଦୃଢ଼ ଦାବି ଜଣାଉଛି’ ।