ମହିଳାଙ୍କଠୁ କାର୍ଡ ଛଡ଼ାଇ ଏଟିଏମ୍‌ରୁ ଲୁଟ୍ : ଠକଙ୍କ ନୂଆ ଟ୍ରିକ୍

କନକ ବ୍ୟୁରୋ : ଆଖିରେ ଧୁଳି ଦେଇ ମହିଳାଙ୍କ ଠାରୁ ଲୁଟିନେଲେ । ତା’ ପୁଣି ଏଟିଏମ୍ କାର୍ଡ ସ୍ବାଇପ୍ କରି । ସୁନ୍ଦରଗଡ଼ରୁ ଏଟିଏମ୍ ଲୁଟ୍‌ର ନିଆରା ତରିକା । ଘଟଣାଟି ଥିଲା କିଛି ଏହିପରି, ସୁନ୍ଦରଗଡ଼ ଏସବିଆଇ ମୁଖ୍ୟ ଶାଖା ଏଟିଏମ୍... ମହିଳା ଜଣକ ଏଟିଏମରୁ ନିଜ ବାଲାନ୍ସ ଚେକ୍ କରିବା ପାଇଁ ଚେଷ୍ଟା କରୁଥିଲେ । ତାଙ୍କ ପଛରେ ଥଲେ ଜଣେ ନୀଳ ସାର୍ଟ ଚଷମା ପିନ୍ଧା ଯୁବକ ଓ ଧଳା ସାର୍ଟ ପିନ୍ଧା ଯୁବକ । ଅତି ଚାଲାକର ସହ ଦୁଇ ଯୁବକ ମହିଳାଙ୍କ ଟ୍ରାଞ୍ଜାକ୍ସନ ଉପରେ ନଜର ରଖିଥିଲେ । ଟ୍ରାଞ୍ଜାକସନ୍ ପରେ ଆଖି ପିଛୁଳାକେ ହାତ ବୁଲାଇ ମହିଳାଙ୍କ ଏଟିଏମ ଏକ୍ସଚେଞ୍ଜ କରିନେଲେ । ଏଟିଏମ୍ କାର୍ଡ ବଦଳାଇବା ପରେ ଅନ୍ୟଏକ ଏଟିଏମ୍ ମେସିନରେ ଯାଇ ମହିଳାଙ୍କ ଆକାଉଣ୍ଟରୁ ୪୦ହଜାର ଟଙ୍କା ଉଠାଇ ଚମ୍ପଟ ମାରିଛନ୍ତି ଦୁଇ ଯୁବକ । 

ଲୁଟ୍‌ର ଶିକାର ହୋଇଥିବା ମହିଳା ହେଉଛନ୍ତି ସୁନ୍ଦରଗଡ଼ କିଞ୍ଜିରକେଲା କୁଳମଣି ହାଇସ୍କୁଲର ହଷ୍ଟେଲ ମାଟ୍ରନ ଜୟନ୍ତୀ ଟପ୍ପୋ । ନିଜ ଝିଅର ଚିକିତ୍ସା ପାଇଁ ସୁନ୍ଦରଗଡ଼ ସରକାରୀ ମେଡିକାଲକୁ ଆଣିଥିଲେ । ଦିନ ସାରା ଝିଅର ଚିକିତ୍ସା କରିବା ପରେ ଭୋକିଲା ପରିବାରକୁ କିଛି ଖୁଆଇବା ପାଇଁ ଏଟିଏମ୍‌ରୁ ଟଙ୍କା ଉଠାଇବା ପାଇଁ ହସ୍‌ପିଟାଲ ଛକରେ ଥିବା ଏସବିଆଇ ମୁଖ୍ୟ ଶାଖାର ଏଟିଏମକୁ ଯାଇଥିଲେ । ଏଟିଏମରେ ଭିଡ଼ ଓ ଲାଇନ ବି ଲାଗିଥିଲା । ଜୟନ୍ତୀ ଟଙ୍କା ଉଠାଇବା ପାଇଁ ଚେଷ୍ଟା କରୁଥିବା ବେଳେ କିଛି ଭୁଲ ଟ୍ରାଞ୍ଜାକ୍ସନ କରିଦେଇଥିଲେ । ଏହାର ଫାଇଦା ନେଇ ତାଙ୍କ ପଛରେ ଠିଆ ହୋଇଥିବା ଦୁଇ ଲୁଟେରା ତାଙ୍କ ପାସୱାର୍ଡକୁ ଦେଖି ସିଧାସଳଖ ତାଙ୍କ ଏଟିଏମ କାର୍ଡକୁ ଆଖି ପିଛୁଳାକେ ବଦଳାଇଥିଲେ । ଯାହା ପରେ ଅନ୍ୟ ଏଟିଏମକୁ ଯାଇ ସେଠାରୁ ୪୦ହଜାର ଉଠାଇ ଫେରାର ହୋଇଯାଇଛନ୍ତି ।