ପିଶାଚ ପାଲଟିଲା ପରମେଶ୍ବର : ଗର୍ଭବତୀ ପତ୍ନୀ ପାଣି ମାଗିଲା ବୋଲି କୂଅକୁ ଠେଲିଦେଲା ସ୍ବାମୀ

କନକ ବ୍ୟୁରୋ : ମଣିଷ କେତେ କ୍ରୁର ହୋଇପାରେ ଏହାର ଉଦାହରଣ ଦେଖିବାକୁ ମିଳିଛି ରାଜସ୍ଥାନରେ । ଯେଉଁଠି ୯ ମାସର ଗର୍ଭବତୀ ପତ୍ନୀକୁ କୂଅକୁ ଧକ୍କା ଦେଇଛି ସଇତାନ ସ୍ବାମୀ । ସୂଚନା ଅନୁସାରେ ଗର୍ଭବତୀ ପତ୍ନୀ ପିଇବା ପାଇଁ ପାଣି ମାଗିବାରୁ ୬୦ ଫୁଟ ଗଭୀର କୂଅକୁ ଧକ୍କା ଦେଲା ସ୍ବାମୀ । କିନ୍ତୁ କଥାରେ ଅଛି ଯାହାକୁ ରଖିବେ ଅନନ୍ତ କେ କରିପାରେ ବଳବନ୍ତ ଠିକ୍ ସେମିତି ୨୮ ଘଣ୍ଟା ପର୍ଯ୍ୟନ୍ତ କୂଅରେ ଓହଳି ରହିବା ପରେ ସୁରକ୍ଷିତ ଭାବେ ଉଦ୍ଧାର ହୋଇଛନ୍ତି ପତ୍ନୀ । ସମ୍ପୂର୍ଣ୍ଣ ଘଟଣାଟି ହେଉଛି ରାଜସ୍ଥାନ ମାରବାଡ଼ର ବରସା ଗାଁର । ଏଠାରେ ଗର୍ଭବତୀ ପତ୍ନୀକୁ ପ୍ରଥମେ କୂଅକୁ ଠେଲି କାଠ ପକାଇଥିଲା ସଇତାନ ସ୍ବାମୀ । ମହିଳା ଯେତେବେଳେ କୂଅରେ ପଡ଼ିଗଲେ ସୌଭାଗ୍ୟବଶତଃ ତାଙ୍କ ହାତ କୂଅର ଗାତରେ ଫସି ଯାଇଥିଲା । ଯେଉଁ କାରଣରୁ ସେ କୂଅର କାନ୍ଥରେ ୨୮ ଘଣ୍ଟା ପର୍ଯ୍ୟନ୍ତ ଓହଳି ରହିଥିଲେ । ମହିଳା ନିଜକୁ ବଞ୍ଚାଇବା ପାଇଁ ଚିତ୍କାର କରି ଚାଲିଥିଲେ କିନ୍ତୁ କାହା କାନରେ ତାଙ୍କର ଚିତ୍କାର ପଡ଼ିନଥିଲା । ବହୁ ସମୟ ପରେ ଜଙ୍ଗଲରେ କିଛି ଲୋକ ଯିବା ସମୟରେ ମହିଳାଙ୍କ ସ୍ବର ଶୁଣି କୂଅ ପାଖକୁ ଆସିଥିଲେ ଏବଂ ପୁଲିସକୁ ଫୋନ୍ କରି ଜଣାଇଥିଲେ । ଏହାପରେ ଦଉଡ଼ି ସାହାଯ୍ୟରେ ମହିଳାଙ୍କୁ ବାହାରକୁ ବାହାର କରାଗଲା । ୨୧ ବର୍ଷୀୟା ଗର୍ଭବତୀ ମହିଳା କଞ୍ଚନ ଯେତେବେଳେ ବାହାରକୁ ବାହାରିଲେ ଠିକରେ କଥାବାର୍ତ୍ତା ମଧ୍ୟ କରିପାରୁନଥିଲେ ଏବଂ ତାଙ୍କ ଶରୀର ଥରୁଥିଲା । 

ତେବେ ପୁଲିସ ଯେତେବେଳେ ମହିଳାଙ୍କୁ ଏ ବିଷୟରେ ପଚାରିଲେ ସେ କହିଥିଲେ ଯେ ତାଙ୍କ ସ୍ବାମୀଙ୍କ ୨ ଟି ପତ୍ନୀ । କିନ୍ତୁ ସ୍ବାମୀ କୂଅକୁ କାହିଁକି ଧକ୍କା ଦେଲା ସେ ମଧ୍ୟ ଜାଣିନାହାନ୍ତି । ଧକ୍କା ଦେବା ପରେ ସ୍ବାମୀ କହିଥିଲେ ଯେ ପ୍ରଥମ କୂଅରେ ସେ ରୁହନ୍ତୁ ଏବଂ ଆଉ ଗୋଟିଏ କୂଅରେ ଦ୍ବିତୀୟ ପତ୍ନୀ ରହିବେ । ଏପଟେ ଫେରାର ହୋଇଥିବା ସ୍ବାମୀକୁ ଖୋଜୁଛି ପୁଲିସ ।