ଭୁଶୁଡୁଛି ମାଓ ଦୁର୍ଗ: ୨୦୨୬ ସୁଦ୍ଧା ନକ୍ସଲ ମୁକ୍ତ ହେବ ଭାରତ

କନକ ବ୍ୟୁରୋ : ଲୋପ ପାଉଛି ମାଓବାଦ । ଅସ୍ତ୍ର ତ୍ୟାଗ କରି ଶାନ୍ତି ପଥେ ଆଗେଇ ଆସିଛନ୍ତି ମାଓବାଦୀ । ମାଓ ଇତିହାସର ପ୍ରଥମ କରି ପ୍ରାୟ ୨୦୦ ମାଓବାଦୀ ଅସ୍ତ୍ର ତ୍ୟାଗ କରି ସମାଜର ମୁଖ୍ୟ ଧାରାରେ ସାମିଲ ହେବାକୁ ଯାଉଛନ୍ତି । ଛତିଶଗଡ଼ ଦଣ୍ଡକାରଣ୍ୟ ସ୍ପୋଶାଲ ଯୋନାଲ କମିଟିରୁ ପ୍ରାୟ ୧୪୦ରୁ ଅଧିକ ଏବଂ ଉତ୍ତର ବସ୍ତର ଡିଭିଜନର ୫୦ରୁ ଉର୍ଦ୍ଧ୍ବ ମାଓବାଦୀ ଛତିଶଗଡ ମୁଖ୍ୟମନ୍ତ୍ରୀଙ୍କ ନିକଟରେ ଅସ୍ତ୍ର ତ୍ୟାଗ କରିବେ । ପ୍ରାୟ ୨୦୦ ମାଓବାଦୀ ଆତ୍ମସମର୍ପଣ କରିବେ । ଦିନ ୧୧ଟାରେ ଛତିଶଗଡ଼ର ଜଗଦଲପୁର ଠାରେ ଏକ ବିରାଟ ସାଧାରଣ ସଭାରେ ମାଓବାଦୀମାନେ ଆତ୍ମମର୍ପଣ କରିବାର କାର୍ଯ୍ୟକ୍ରମ ରହିଛି । ଦଣ୍ଡକାରଣ୍ୟ ସ୍ପେଶାଲ ଯୋନାଲ କମିଟି ମୁଖ୍ୟ ରୁପେଶଙ୍କ ସମେତ ୧୪୦ ମାଓବାଦୀ ଅସ୍ତ୍ର ତ୍ୟାଗ କରିବେ ।

ଦିନ ଥିଲା ମାଓବାଦୀଙ୍କ ଆତଙ୍କ ରାଜ୍ୟ ଏବଂ ରାଜ୍ୟ ବାହାରେ ବଢ଼ିବାରେ ଲାଗିଥିଲା । ଜଙ୍ଗଲରେ ଡେରା ଜମାଇଥିଲେ ମାଓବାଦୀ । ସରକାରୀ କାମକୁ ରୋକିବା ସହ କେଉଁଠି କଣ୍ଟ୍ରାକ୍ଟରକୁ ହତ୍ୟା ତ ଆଉ କେଉଁଠି ସେନା ଗାଡ଼ି ଉପରକୁ ଗୁଳିମାଡ଼ କରୁଥିଲେ । ରାସ୍ତାରେ ଲ୍ୟାଣ୍ଡମାଇନ୍ ବିଛାଇ ଅନେକ ଜୀବନ ନେଉଥିଲେ । ସେନା ଯବାନ ଏବଂ ମାଓବାଦୀ ମୁହାଁମୁହିଁ ଫଳରେ ଅନେକ ଯବାନ ସହିଦ୍ ହେଉଥିଲେ । କିନ୍ତୁ ଏବେ ଏହି ମାଓ ଗଡ଼ ଟଳିବାରେ ଲାଗିଛି । ବନ୍ଧୁକ ଛାଡ଼ି ଏବେ ଭଲ ରାସ୍ତାକୁ ଫେରୁଛନ୍ତି ମାଓବାଦୀ ।