କନକ ବ୍ୟୁରୋ : ମଧ୍ୟରାତ୍ରିରେ ଟ୍ରକ ଚୋରି  l ସିସିଟିଭିରେ ସନ୍ଦିଗ୍ଧ ମହିଳା ଓ ପୁଲିସ । ଢେଙ୍କାନାଳ ଓଡ଼ାପଡ଼ା ବ୍ଲକ ମୋଟଙ୍ଗା ଥାନା ଅନ୍ତର୍ଗତ ନିମିଧା ଗାଁରେ ଏକ ଟ୍ରକ ଚୋରି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି  l ଏହି ଗାଁର ପ୍ରିୟବ୍ରତ ତ୍ରିପାଠୀଙ୍କ ହାଇୱା ଟ୍ରକଟି ୨୬ ଅଗଷ୍ଟ ମଧ୍ୟରାତ୍ରରେ ଚୋରି ହୋଇଥିବା ଅଭିଯୋଗ ହୋଇଛି । ପୁଲିସ କର୍ମଚାରୀଙ୍କ ଉପସ୍ଥିତିରେ ଟ୍ରକ ଡୋର୍‌ ଓ ଷ୍ଟିଅରିଂ ଲକ୍‌ ଭାଙ୍ଗିବା ପରେ ଏକ ଟୋଇଂ ଯାନ ସାହାଯ୍ୟରେ ହାଇୱାକୁ ନିଆଯାଇଛି । ସିସିଟିଭିରେ ମହିଳାଙ୍କ ଉପସ୍ଥିତି ରହିଛି । ହାଇୱାଟି ଚୋରି ହେବା ବେଳେ ପ୍ରିୟବ୍ରତ ଘରେ ନଥିଲେ । 

Advertisment

ତେବେ ସିସିଟିଭି ଫୁଟେଜକୁ ଆଧାର କରି ପ୍ରିୟବ୍ରତ ମୋଟଙ୍ଗା ଥାନାରେ ୨୭ ତାରିଖ ଦିନ ଲିଖିତ ଅଭିଯୋଗ କରିଥିଲେ, କିନ୍ତୁ ପୁଲିସ ଏତଲା କରିନଥିବାରୁ ପ୍ରିୟବ୍ରତ ଢେଙ୍କାନାଳ କୋର୍ଟର ଦ୍ବାରସ୍ଥ ହୋଇଛନ୍ତି । ଭୁବନେଶ୍ୱରର ଏକ ଘରୋଇ ଫାଇନାନ୍ସ ସଂସ୍ଥାର ମହିଳା ଅଧିକାରୀ ଏଭଳି କରିଥିବା କୁହାଯାଉଛି । ଫାଇନାନ୍ସ କମ୍ପାନୀ ପାଖରେ ଥିବା ଡୁପ୍ଲିକେଟ ଚାବି ବ୍ୟବହାର ନକରି ହାତୁଡିରେ ଷ୍ଟିଅରିଂ ଲକ୍‌ ଭାଙ୍ଗିବା କ’ଣ ଆବଶ୍ୟକ ଥିଲା ବୋଲି ପ୍ରଶ୍ନ କରିଛନ୍ତି ପ୍ରିୟବ୍ରତ ଓ ତାଙ୍କ ଓକିଲ ।