ବାବୁଙ୍କ ଘରେ ପୁଳା ପୁଳା ଟଙ୍କା; ଘରୁ ମିଳିଲା ନଗଦ ଦେଢ଼ କୋଟି, ଅଧ କେଜି ସୁନା, କିଲେ ରୁପା

କନକ ବ୍ୟୁରୋ : ବାବୁଙ୍କ ଘରେ ପୁଳା ପୁଳା ଟଙ୍କା । ନଗଦ ଦେଢ କୋଟି ଟଙ୍କା, ଅଧ କେଜିର ସୁନା, ୪ କେଜିରୁ ଅଧିକ ରୁପା ଦେଖି ତାଜୁବ ଅଧିକାରୀ । ଜୟପୁର ବନଖଣ୍ଡର ଡେପୁଟି ରେଞ୍ଜର ରାମଚନ୍ଦ୍ର ନେପାକଙ୍କ ଘରୁ ମିଳିଲାଣି ଏତେ ଟଙ୍କା । ଏକକାଳୀନ ୬ଟି ଠିକଣାରେ ଚଢାଉ କରିଛି ଭିଜିଲାନ୍ସ ।

ଜୟପୁରର ପୈତୃକ ଜମି, ଆପାର୍ଟମେଣ୍ଟରେ ଥିବା ୨ଟି ଫ୍ଲାଟ, ସମ୍ବାର ଟୋଟାରେ ଥିବା ଶ୍ବଶୁର ଘର, ଭୁବନେଶ୍ବରରେ ଥିବା ଭାଇ ଘର ସମେତ ତାଙ୍କ ଅଫିସରେ ରେଡ କରିଛନ୍ତି ଅଧିକାରୀ । ଚଢାଉରେ ଭିଜିଲାନ୍ସର ୬ ଡିଏସପି, ୫ଇନ୍ସପେକ୍ଟର, ୯ ଏଏସଆଇ ଏବଂ ଅନ୍ୟ ଅଧିକାରୀ ସାମିଲ ହୋଇଛନ୍ତି । ଫରେଷ୍ଟ ଗାର୍ଡ ଭାବେ ଚାକିରି ଆରମ୍ଭ କରି ଏବେ ଡେପୁଟି ରେଞ୍ଜର ହୋଇଥିବା ରାମଚନ୍ଦ୍ର ନେପାକଙ୍କ ସମ୍ପତି ଦେଖି ତାଜୁବ ହୋଇଛନ୍ତି ଅଧିକାରୀ । ଏତେ ପରିମାଣରେ ଟଙ୍କା ବାହାରିବା ପରେ ୨ଟି ଟଙ୍କାଗଣା ମେସିନ ମଗାଯାଇଥିବା ସୂଚନା ଦେଇଛନ୍ତି ଅଧିକାରୀ ।