ବିଦ୍ୟାଭାରତୀଙ୍କ ବିରୋଧରେ ଫାଇଲ ହେଲା ଚାର୍ଜସିଟ : ଅବହେଳା ପାଇଁ ହୋଇଥିଲା ଏସିଏଫ୍ ସୌମ୍ୟରଞ୍ଜନଙ୍କ ମୃତ୍ୟୁ
କ୍ରାଇମବ୍ରାଞ୍ଚ ଏଡିଜି କହିଲେ, ସ୍ୱାମୀଙ୍କୁ ବଂଚାଇବା ପାଇଁ ନେଇନାହାନ୍ତି ଉଚିତ ପଦକ୍ଷେପ
କନକ ବ୍ୟୁରୋ :ଏଏସିଏଫ ସୌମ୍ୟରଂଜନ ମହାପାତ୍ର ମୃତ୍ୟୁ ମାମଲାରେ ପତ୍ନୀ ବିଦ୍ୟାଭାରତୀଙ୍କ ବିରୋଧରେ ଦାଖଲ ହୋଇଛି ଚାର୍ଜସିଟ । ଗତକାଲି ବିଳମ୍ବିତ ରାତିରେ ପାରଳାଖେମୁଣ୍ଡି କୋର୍ଟରେ ବିଦ୍ୟାଭାରତୀଙ୍କ ବିରୋଧରେ ଚାର୍ଜସିଟ ଦାଖଲ କରିଛି କ୍ରାଇମବ୍ରାଂଚ । ଏସିଏଫ ସୌମ୍ୟ ମୃତ୍ୟୁ ଘଟଣାର ତଦନ୍ତ କରୁଥିବା କ୍ରାଇମବ୍ରାଂଚ ଡିଏସପି ଜ୍ଞାନରଂଜନ ମିଶ୍ର ପାରଳାଖେମୁଣ୍ଡି କୋର୍ଟରେ ପହଂଚି ଚାର୍ଜସିଟ ଦାଖଲ କରିଛନ୍ତି । ଏହି ଘଟଣାରେ ୮୦ଜଣଙ୍କୁ ଜେରା କରାଯାଇଛି । ଜେରା କରାଯାଇଥିବା ସମସ୍ତ ବ୍ୟକ୍ତିଙ୍କ କଲ ରେକର୍ଡ ସହ ସୌମ୍ୟଙ୍କ ପୋଷ୍ଟମର୍ଟମ ରିପୋର୍ଟ ଓ ମିଛଧରା ପରୀକ୍ଷା ରିପୋର୍ଟ କୋର୍ଟରେ ଦାଖଲ କରିଛନ୍ତି ତଦନ୍ତାକାରୀ ଅଧିକାରୀ ।
Kanak News is now on WhatsApp
Join and get latest news updates delivered to you via WhatsApp
ସୌମ୍ୟଙ୍କ ଦେହରେ ନିଆଁ ଲାଗିବା ବେଳେ ସେଠାରେ ଉପସ୍ଥିତ ଥିବା ପତ୍ନୀ ବିଦ୍ୟାଭାରତୀ ତାଙ୍କୁ ବଂଚାଇବାକୁ ଉଚିତ ପଦକ୍ଷେପ ନେଇନଥିବା ତଦନ୍ତରୁ ଜଣାପଡିଥିବା କହିଥିଲେ କ୍ରାଇମବ୍ରାଂଚ ଏଡିଜି । ସଂଜୀବ ପଣ୍ଡା କହିଥିଲେ, ସୌମ୍ୟଙ୍କ ମୃତ୍ୟୁ ଏକ ଦୁର୍ଘଟଣା ଥିଲା ତେବେ ତାଂକୁ ବଂଚାଇବା ଦିଗରେ ପତ୍ନୀ ବିଦ୍ୟାଭାରତୀଙ୍କ ଅବହେଳା ସାମ୍ନାକୁ ଆସିଥିଲା । ଏଥିପାଇଁ ତାଙ୍କ ବିରୋଧରେ ଧାରା ୩୦୪-ଏ, ଅର୍ଥାତ ଅବହେଳା ଯୋଗୁଁ ମୃତ୍ୟୁ ଏବଂ ଧାରା ୨୮୫, ଅର୍ଥାତ ନିଆଁ ଲାଗିଥିବା ବେଳେ ଅବହେଳା ପ୍ରଦର୍ଶନ ଚାର୍ଜସିଟ ଦାଖଲ କରାଯାଇଛି । ଏସବୁ ଦଫାରେ ସର୍ବାଧିକ ୨ ବର୍ଷ ପର୍ଯ୍ୟନ୍ତ ଜେଲଦଣ୍ଡର ପ୍ରାବଧାନ ରହିଛି ।