ବିଳମ୍ବିତ ରାତି ଯାଏଁ ପାର୍ଟି କରିବା ପଡିଲା ମହଙ୍ଗା । ମୁମ୍ୱାଇରେ ଗିରଫ ହେଲେ କ୍ରିକେଟର ସୁରେଶ ରାଇନା ।

122

କନକ ବ୍ୟୁରୋ : କ୍ରିକେଟରଙ୍କୁ ମହଙ୍ଗା ପଡିଲା ବଲିଉଡ୍ ପ୍ରେମ । ମୁମ୍ୱାଇରେ କୋଭିଡ ନିୟମ ଉଲଂଘନ କରି ବଲିଉଡ୍ ସେଲିବ୍ରିଟିଙ୍କ ପାର୍ଟିରେ ରାତିରେ ଯୋଗ ଦେଇ ଗିରଫ ହୋଇଛନ୍ତି ପୂର୍ବତନ କ୍ରିକେଟର ସୁରେଶ ରାଇନା । ରାଇନାଙ୍କ ସହିତ ମୋଟ୍ ୩୪ ଜଣଙ୍କ ନାଁରେ ମାମଲା ରୁଜୁ କରିଛି ମୁମ୍ୱାଇ ପୋଲିସ । ତେବେ ଗିରଫ ପରେ ଜାମିନରେ ମୁକୁଳିଛନ୍ତି ରାଇନା ।

କ୍ରିକେଟ ପଡିଆରୁ ବଲିଉଡ୍ ସେଲିବ୍ରିଟିଙ୍କ ସହ ଦୋସ୍ତି ଏମିତି ମହଙ୍ଗା ପଡିଯିବ ହୁଏତ ସୁରେଶ ରାଇନା କେବେ ଭାବିନଥିଲେ । କରୋନା କାଳରେ କାଳ ହେଲା ବଲିଉଡ୍ ବନ୍ଧୁଙ୍କ ବାର୍ଥଡେ ପାର୍ଟିରେ ସାମିଲ ହେବା । ସୋମବାର ବିଳମ୍ୱିତ ରାତିରେ ମୁମ୍ୱାଇରେ ଏମିତି ଏକ ପାର୍ଟିରେ ଯୋଗ ଦେଇଥିବା ବେଳେ କୋଭିଡ୍ ନିୟମ ଉଲଂଘନ ଅଭିଯୋଗରେ ରାଇନାଙ୍କୁ ଗିରଫ କରିଥିଲା ମୁମ୍ୱାଇ ପୋଲିସ ।

କରିଶ୍ମା ତନ୍ନା, ସୁଜାନ୍ ଖାନ୍, ଏକତା କପୁର, ଉର୍ବସୀ ରୌଟେଲା, ଡେଜି ଶାହା , ଗୁରୁ ରାନ୍ଧୱାଙ୍କ ପରି ବଲିଉଡ ସେଲିବ୍ରିଟି ସାମିଲ ହେଇଥିଲେ ଏହି କ୍ଲବ ପାର୍ଟିରେ । ବଲିଉଡ୍ ବନ୍ଧୁଙ୍କ ନିମନ୍ତ୍ରଣରେ ମନା କରିନପାରି ସାମିଲ ହୋଇଥିଲେ ରାଇନା । ପୋଲିସର ଅଭିଯୋଗ ପାର୍ଟିରେ କରୋନା ନିୟମର ଉଲଂଘନ ହୋଇଥିଲା । ନା ଥିଲା ସାମାଜିକ ଦୂରତା, ନା ପିନ୍ଧିଥିଲେ ମାସ୍କ । ତେବେ ମୁମ୍ୱାଇ ପୋଲିସ ସେଲିବ୍ରିଟିଙ୍କ ନାଁ ନେବାକୁ ମନା କରିଛି ।

ସୂଚନା ଅନୁସାରେ ସୁରେଶ ରାଇନାଙ୍କ ନାଁରେ ଏପିଡେମିକ୍ ଆକ୍ଟରେ ମାମଲା ରୁଜ୍ଜୁ ହୋଇଛି । ଏହି ଘଟଣା ପରେ ପରେ ସକାଳ ବେଳକୁ ରାଇନା ଜାମିନରେ ମୁକୁଳିଥିଲେ । ହେଲେ କରୋନା କାଳରେ ବାର୍ଥ ଡେ ପାର୍ଟିରେ ଯୋଗ ଦେଇ ରାଇନା ଗିରଫ ହେବା ଖବର କିନ୍ତୁ ବିଜୁଳି ବେଗରେ ଚାରିଆଡେ ଖେଳି ଯାଇଛି ।

ଏହି ଗିରଫଦାରୀ ନେଇ ପ୍ରତିକ୍ର୍ରିୟା ରଖିଛନ୍ତି ସୁରେଶ ରୈନା । ମହାରାଷ୍ଟ୍ରରେ ଲାଗିଥିବା କରୋନା କଟକଣା ସମ୍ପର୍କରେ ସେ ଜାଣିନଥିବା କହିଛନ୍ତି ।

Comments are closed.