ଇଂଲଣ୍ଡ ଟେଷ୍ଟ ଦଳର କ୍ୟାପଟେନ୍ ପଦ ଛାଡିଲେ ଜୋ ରୁଟ୍ । ୱେଷ୍ଟଇଣ୍ଡିଜ୍ ବିପକ୍ଷରେ ଲଜ୍ୟାଜନକ ପରାଜୟ ପରେ ନେଲେ ବଡ ନିଷ୍ପତ୍ତି ।
କନକ ବ୍ୟୁରୋ: ଇଂଲଣ୍ଡ ଦଳର ଟେଷ୍ଟ କ୍ୟାପଟେନ୍ ପଦ ଛାଡିଲେ ଜୋ ରୁଟ୍ । ୱେଷ୍ଟଇଣ୍ଡିଜ୍ ବିପକ୍ଷରେ ଲଜ୍ୟାଜନକ ପରାଜୟ ପରେ ସେ ଅଧିନାୟକ ପଦ ଛାଡି ଦେଇଛନ୍ତି । ତେବେ ୩୧ ବର୍ଷୀୟ ରୁଟ୍ ୨୦୧୭ ମସିହାରେ ଆଲିଷ୍ଟର କୁକଙ୍କ ପରେ ଇଂଲଣ୍ଡ ଟେଷ୍ଟ ଦଳର ଅଧିନାୟକ ପଦ ସମ୍ଭାଳିଥିଲେ । ହେଲେ ୱେଷ୍ଟଇଣ୍ଡିଜ୍ ବିପକ୍ଷରେ ଇଂଲଣ୍ଡ ୧୦ ୱିକେଟରେ ପରାସ୍ତ ହେବା ଓ ଲଗାତର ୯ମ ପରାଜୟ ଭୋଗିବା ପରେ ରୁଟ୍ ଅଧିନାୟକ ପଦକୁ ବାଏ ବାଏ କହିଛନ୍ତି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଏକ ବୟାନ ଜାରି କରି ରୁଟ୍ କହିଛନ୍ତି, କ୍ୟାପଟେନ୍ ପଦ ଛାଡିବା ପାଇଁ ଏହା ସବୁଠୁ ସଠିକ୍ ସମୟ । ମୋ ଦେଶର ଅଧିନାୟକ ଭାବେ କାମ କରିବା ମୋ ପାଇଁ ବହୁତ ଗର୍ବର ବିଷୟ । ଗତ ୫ ବର୍ଷକୁ ମୁଁ ବେଶ ଗର୍ବ ସହ ଦେଖିବି ।
ସୂଚନାଯୋଗ୍ୟ ଯେ, ଗତ ୫ବର୍ଷ ଧରି ରୁଟ୍ ଇଂଲଣ୍ଡ ଦଳର ଅଧିନାୟକ ରହିଥିଲେ । ତାଙ୍କ ନେତୃତ୍ୱରେ ଇଂଲଣ୍ଡ ମୋଟ ୬୪ଟି ଟେଷ୍ଟ ମ୍ୟାଚ୍ ଖେଳିଥିଲେ । ଏହା ଭିତରୁ ସେ ୨୭ଟିରେ ବିଜୟୀ ହୋଇଥିବାବେଳେ, ୨୬ଟିରେ ପରାଜିତ ହୋଇଥିଲେ । ତେବେ ଗୁରୁତ୍ୱପୂର୍ଣ୍ଣ କଥା ହେଲେ ଗତ ୧୭ଟି ଟେଷ୍ଟ ମ୍ୟାଚରୁ ସେ ମାତ୍ର ଗୋଟିଏ ମ୍ୟାଚରେ ବିଜୟୀ ହୋଇପାରିଥିଲେ । ଯେଉଁ କାରଣରୁ ଅଧିନାୟକ ପଦ ଛାଡିବା ନେଇ ତାଙ୍କ ଉପରେ ଚାପ ରହିଥିଲା ।