ମେ’ ପହିଲାରୁ ସିଧାସଳଖ ଟିକା କିଣିପାରିବେ ରାଜ୍ୟ ଓ ଘରୋଇ ହସ୍ପିଟାଲ । ରାଜ୍ୟ ପାଇଁ ଗୋଟିଏ ଡୋଜର ଦାମ ୪୦୦ ଓ ଘରୋଇ ହସ୍ପିଟାଲ ପାଇଁ ୬୦୦ ଟଙ୍କା ।
କନକ ବ୍ୟୁରୋ: ସାରାଦେଶରେ ମେ’ ୧ ତାରିଖରୁ ଜୋରଦାର ହେବ ଟିକାକରଣ । କାରଣ ୧୮ ବର୍ଷରୁ ଅଧିକ ସମସ୍ତଙ୍କ ଟିକାକରଣ ପାଇଁ ଘୋଷଣା କରିଛନ୍ତି କେନ୍ଦ୍ର ସରକାର । ହେଲେ ରାଜ୍ୟଗୁଡିକରେ ଟିକାର ଅଭାବ ନେଇ ହେଉଥିବା ଅଭିଯୋଗକୁ ଦେଖି ଏବେ କେନ୍ଦ୍ର କହିଛି, ରାଜ୍ୟଗୁଡିକୁ ସିଧାସଳଖ ଟିକା ଉତ୍ପାଦକଙ୍କଠାରୁ ଟିକା କିଣିପାରିବେ । ସେହିପରି ଘରୋଇ ହସ୍ପିଟାଲ ଓ ଅଧିକୃତ ଟିକା କେନ୍ଦ୍ର ମଧ୍ୟ ଟିକା ଆଣିପାରିବେ ।
Kanak News is now on WhatsApp
Join and get latest news updates delivered to you via WhatsApp
ସରକାରଙ୍କ ଏହି ନିଷ୍ପତି ପରେ ଟିକା ଦର ଧାର୍ଯ୍ୟ କରିଛି ଦେଶର ସର୍ବାଧିକ ଟିକା ଉତ୍ପାଦନ କରୁଥିବା ସେରମ ଇନଷ୍ଟିଚ୍ୟୁଟ ଅଫ ଇଣ୍ଡିଆ । ସଂସ୍ଥା ପକ୍ଷରୁ ରାଜ୍ୟ ସରକାର ଓ ଘରୋଇ ହସ୍ପିଟାଲ ଗୁଡିକ ପାଇଁ ଅଲଗା ଅଲଗା ଦର ଧାର୍ଯ୍ୟ କରାଯାଇଛି । ରାଜ୍ୟଗୁଡିକ ପାଇଁ ଗୋଟିଏ ଡୋଜି ଟିକାର ଦାମ ୪୦୦ ଟଙ୍କା ଓ ଘରୋଇ ହସ୍ପିଟାଲ ପାଇଁ ୬୦୦ ଟଙ୍କା ଧାର୍ଯ୍ୟ କାରାଯାଇଛି । ଏବଂ ଟିକାକେନ୍ଦ୍ର ଗୁଡିକୁ ପୂର୍ବ ପରି ୧୫୦ ଟଙ୍କାରେ ଟିକା ଯୋଗାଇ ଦେବ ସେରମ ଇନଷ୍ଟିଚ୍ୟୁଟ୍ ।
ଏଠାରେ ସ୍ପଷ୍ଟ କରିବାକୁ ଚାହିଁବୁ ଯେ, ଟିକା ଖୋଲା ବଜାରରେ ଉପଲବ୍ଧ ହେବନାହିଁ । ଅର୍ଥାତ ମେଡିସିନ ଦୋକାନରେ ଏବେ ଟିକା ମିଳିବ ନାହିଁ । କେବଳ ରାଜ୍ୟ ସରକାର, ଘରୋଇ ହସ୍ପିଟାଲ ଓ ଅଧିକୃତ ଟିକା କେନ୍ଦ୍ର ହିଁ ସିଧାସଳଖ ଟିକା ଉତ୍ପାଦକଙ୍କଠାକୁ ଟିକା କିଣି ପାରିବେ । ଏହାରି ଭିତରେ ବଡ ପ୍ରଶ୍ନ ହେଉଛି ରାଜ୍ୟଗୁଡିକର ଚାହିଦା ମୁତାବକ ଟିକା ଯୋଗାଇ ପାରିବେ ତ ଟିକା ଉତ୍ପାଦକ । କାରଣ ଏବେ ଟିକା ଅଭାବରୁ ଏକାଧିକ ଟିକା କେନ୍ଦ୍ର ବନ୍ଦ ଥିବାର ଖବର ସାରାଦେଶରୁ ସାମ୍ନାକୁ ଆସିବାରେ ଲାଗିଛି ।