ଓଡ଼ିଶାର ସଂକ୍ରମଣ ହାରକୁ ନେଇ ବିଶେଷଜ୍ଞଙ୍କ ଆକଳନ । ସପ୍ତାହେ ପରେ ଆରମ୍ଭ ହୋଇପାରେ ଦୈନିକ ସଂକ୍ରମଣରେ ହ୍ରାସ । ୧୮ ପ୍ରତିଶତକୁ ଖସିଛି ପଜିଟିଭିଟି ରେଟ୍ ।
କନକ ବ୍ୟୁରୋ: ରାଜ୍ୟରେ ଦୁଇଦିନ ପରେ ଦୈନିକ ସଂକ୍ରମଣ ପୁଣି ୧୧ ହଜାର ଟପିଛି । ହେଲେ ୬୦ ହଜାର ୫୧୦ ନମୂନା ପରୀକ୍ଷାରେ ପଜିଟିଭ ହାର ୧୮.୩୪ ପ୍ରତିଶତ ରହିଛି । କିନ୍ତୁ ଉଦବେଗର ବିଷୟ ହେଲା, ଗତ ୨୪ ଘଂଟାରେ ପୁଣି ୨୧ ଜଣ କରୋନାରେ ଆଖି ବୁଜିଛନ୍ତି । ୧୪ଟି ଜିଲ୍ଲାରୁ ୨୧ ଜଣଙ୍କ ମୃତ୍ୟୁ ହୋଇଥିବାବେଳେ କେବଳ ମେ ମାସରେ ୩୩୫ ଜଣ ପ୍ରାଣ ହରାଇଲେଣି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ୭ ଦିନର କରୋନା ସ୍ଥିତି
ତାରିଖ ସଂକ୍ରମିତ ପଜିଟିଭ ହାର ମୃତ
- ୧୯ ମେ ୧୧,୦୯୯ ୧୮.୩୪ ୨୧
- ୧୮ ମେ ୧୦,୩୨୧ ୧୮.୨୦ ୨୨
- ୧୭ ମେ ୧୦,୭୫୭ ୧୮.୪୦ ୨୨
- ୧୬ ମେ ୧୧,୭୩୨ ୨୦.୬୩ ୧୯
- ୧୫ ମେ ୧୧,୮୦୫ ୨୦.୮୫ ୨୧
- ୧୪ ମେ ୧୨,୩୯୦ ୨୨.୦୪ ୨୨
- ୧୩ ମେ ୧୦,୬୪୯ ୨୦.୬୯ ୧୯
ବିଶେଷଜ୍ଞ ଡାକ୍ତରଙ୍କ ମତରେ ରାଜ୍ୟରେ ୧୪ ଦିନିଆ ଲକଡାଉନର ପ୍ରଭାବ ଅନୁଭୂତ ହେଉଛି । ସଂକ୍ରମଣ ଏକ ପ୍ରକାର ସ୍ଥିର ସ୍ଥିତିରେ ରହିଛି । ବିଶେଷଜ୍ଞଙ୍କ କହିବା ଅନୁସାରେ ଆଗାମୀ ୭ରୁ ୧୦ ଦିନରେ ପୁଣି କ୍ରମାନ୍ୱୟରେ ସଂକ୍ରମଣ ସଂଖ୍ୟା ହ୍ରାସ ପାଇବାର ସମ୍ଭାବନା ରହିଛି । ବଡ କଥା ହେଉଛି ପଜିଟିଭିଟି ରେଟ୍ ବା ସଂକ୍ରମଣ ହାର ୨୨ରୁ ୨୦ ଓ ଏବେ ୧୮ ପ୍ରତିଶତକୁ ଖସି ଆସିଛି ।
ସେପଟେ ଗତ ୩ ଦିନ ହେଲା ଦେଶରେ ୩ ଲକ୍ଷ ତଳକୁ ରହିଛି କରୋନା ସଂକ୍ରମଣ । ହେଲେ ବୁଧବାର ମୃତ୍ୟୁର ଅଲୋଡା ରେକର୍ଡ କରିଛି ଭାରତ । କରୋନା ସଂକ୍ରମଣ ଆରମ୍ଭ ହେବା ଦିନରୁ ପ୍ରଥମଥର ପାଇଁ ଗୋଟିଏ ଦିନରେ ସାଢେ ୪ ହଜାରରୁ ଅଧିକ ମୃତ୍ୟୁ ହୋଇଛି । ଗତ ୨୪ ଘଂଟାରେ ଦେଶରେ ୨ ଲକ୍ଷ ୬୭ ହଜାର ୩୩୪ ନୂଆ ମାମଲା ଚିହ୍ନଟ ହୋଇଥିବାବେଳେ, ୪ ହଜାର ୫୨୯ ଜଣଙ୍କ ମୃତ୍ୟୁ ହୋଇଛି ।
୩ ଦିନରେ ଦେଶରେ କରୋନା ସ୍ଥିତି
ତାରିଖ ଆକ୍ରାନ୍ତ ମୃତ
- ୧୯-୦୫-୨୦୨୧ ୨,୮୩,୨୪୮ ୪,୫୨୯
- ୧୮-୦୫-୨୦୨୧ ୨,୬୩,୫୩୩ ୪,୩୨୯
- ୧୭-୦୫-୨୦୨୧ ୨,୮୧,୩୮୬ ୪,୧୦୬
ବିଭିନ୍ନ ରାଜ୍ୟରେ ଲକଡାଉନ ଓ ସଟଡାଉନର ପ୍ରଭାବ ଦେଖିବାକୁ ମିଳୁଛି । ସେଥିପାଇଁ ସଂକ୍ରମଣ ହ୍ରାସ ପାଉଥିଲେ ମଧ୍ୟ ମୃତ୍ୟୁ ସଂଖ୍ୟା ଅଧିକ ରହୁଛି । ଯେହେତୁ ଗାଁକୁ ସଂକ୍ରମଣ ବ୍ୟାପୁଛି ଏବଂ ଗ୍ରାମାଂଚଳରେ ସ୍ୱାସ୍ଥ୍ୟ ଭିତିଭୂମି ଦୁର୍ବଳ ଥିବାରୁ ମୃତ୍ୟୁ ମାମଲା ବଢୁଥିବା କୁହାଯାଉଛି । ମେ ୬ ତାରିଖରେ ୪ ଲକ୍ଷ ୧୪ ହଜାରରୁ ଅଧିକ ସଂକ୍ରମିତ ଚିହ୍ନଟ ହୋଇଥିବାବେଳେ ବୁଧବାର ଏଥିରେ ୪୦ ପ୍ରତିଶତ ହ୍ରାସ ଦେଖାଯାଇଛି । ତଥାପି ଦୈନିକ ସଂକ୍ରମଣ ଦୃଷ୍ଟିରୁ ଭାରତ ଢେର ଆଗରେ ରହିଛି ।
ଦୈନିକ ସଂକ୍ରମଣରେ ଭାରତ ବହୁ ଆଗରେ
- ୪୦ ହଜାର ୯୪୧ ଦୈନିକ ସଂକ୍ରମଣ ସହ ବ୍ରାଜିଲ ବିଶ୍ୱରେ ଦ୍ୱିତୀୟ
- ଆମେରିକାରେ ଗୋଟିଏ ଦିନରେ ମାତ୍ର ୧୭ ହଜାର ୯୮୪ ସଂକ୍ରମିତ
- ଡବ୍ଲୁଏଚଓ ଅନୁସାରେ ଆର୍ଜେଂଟିନାରେ ୧୬,୩୫୦ ମାମଲା ଚହ୍ନଟ
- କଲମ୍ବିୟାରେ ଗୋଟିଏ ଦିନରେ ୧୫, ୦୯୩ ସଂକ୍ରମିତ ଚିହ୍ନଟ
- ବିଶ୍ୱର ଅନ୍ୟ କୌଣସି ଦେଶରେ ୧୫ ହଜାରରୁ ଅଧିକ ମାମଲା ଆସିନାହିଁ