ରହସ୍ୟମୟ ହେଉଛି କରୋନାର ଦ୍ୱିତୀୟ ଲହର । ନୂଆ ଭାରିଏଂଟ ପାଇଁ ଦ୍ରୁତ ଗତିରେ ବଢ଼ୁଛି କି ସଂକ୍ରମଣ ? ହେଲେ ହସ୍ପିଟାଲରେ ଭର୍ତ୍ତି ହେଉଛନ୍ତି କମ୍ ଆକ୍ରାନ୍ତ ।
କନକ ବ୍ୟୁରୋ: ସାରା ଦେଶରେ କରୋନା ସଂକ୍ରମଣ ବଢି ବଢି ଚାଲିଛି । ଦେଶର ପ୍ରାୟ ୨୩ଟି ରାଜ୍ୟ ଓ କେନ୍ଦ୍ରଶାସିତ ଅଂଚଳରେ ଏହାର ପ୍ରଭାବ ବେଶ୍ ସ୍ପଷ୍ଟ ଭାବେ ବାରି ହୋଇପଡୁଛି । ଏହାରି ଭିତରେ ଗୋଟିଏ ତଥ୍ୟ ସାମ୍ନାକୁ ଆସିଛି – ପ୍ରଥମ ପର୍ଯ୍ୟାୟ ସଂକ୍ରମଣ ସମୟରେ ସବୁଠୁ ଅଧିକ ଆକ୍ରାନ୍ତ ୨୦୨୦ ସେପ୍ଟେମ୍ବର ୧୭ ତାରିଖରେ ଚିହ୍ନଟ ହୋଇଥିଲେ । ଏହି ଦିନ ମୋଟ ୯୭ ହଜାର ୮୯୪ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଥିଲେ । ଏହାସହ ସେହିି ଦିନ ମୋଟ ୧ ହଜାର ୧୩୨ ଜଣଙ୍କର ମୃତ୍ୟୁ ଘଟିଥିଲା ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଗତ ୨୪ ଘଂଟାରେ ସାରା ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା ୧ଲକ୍ଷ ୧୫ ହଜାର ୭୩୬ ହୋଇଥିବା ବେଳେ ଏହି ସମୟରେ ମୃତକଙ୍କ ସଂଖ୍ୟା ୬୩୦ ରେକର୍ଡ କରାଯାଇଛି । ଏହି ପର୍ଯ୍ୟାୟ ସଂକ୍ରମଣରେ ଆକ୍ରାନ୍ତଙ୍କ ସଂଖ୍ୟା ବଢୁଥିଲେ ମଧ୍ୟ ଗୁରୁତର ଓ ମୃତକଙ୍କ ସଂଖ୍ୟା କମ୍ ରହୁଥିବା ବିଶେଷଜ୍ଞ ମତ ଦେଇଛନ୍ତି । ସମୟ ସହିତ ଭୂତାଣୁ ତାର ରୂପ ପରିବର୍ତନ କରିଥାଏ । କିନ୍ତୁ ନିଜେ ବଂଚିବା ପାଇଁ ହୋଷ୍ଟ ଅର୍ଥାତ ଯାହା ଦେଶରେ ନିଜେ ବଂଚେ, ତାକୁ ମଧ୍ୟ ବଂଚାଇ ରଖିଥାଏ ଭୂତାଣୁ । ତେଣୁ ସଂକ୍ରମଣ ବ୍ୟାପକ ହୁଏ, ହେଲେ ଏହାର ଘାତକତା ହ୍ରାସ ପାଏ।
ଅନ୍ୟପଟେ ରାଜ୍ୟରେ କରୋନା ମୁକାବିଲା ପାଇଁ ଆବଶ୍ୟକ ଭିତ୍ତିଭୂମି ରହିଛି । ତେଣୁ ବର୍ତମାନ ଚାଲିଥିବା ସଂକ୍ରମଣର ମୁକାବିଲା ପାଇଁ ରାଜ୍ୟ ସରକାର ପ୍ରସ୍ତୁତ ଥିବା ସୂଚନା ଦେଇଛନ୍ତି ଡିଏମଇଟି । ତେବେ କେବେ କମିବ କରୋନା କହିବା ମୁସ୍କିଲ । କିନ୍ତୁ ସଚେତନା ଓ ସତର୍କତା ହିଁ ଆମକୁ କରୋନାଠୁ ସୁରକ୍ଷିତ ରଖିପାରିବ ବୋଲି କହିଛନ୍ତି ବିଶେଷଜ୍ଞ ।