ବ୍ରିଟେନରେ ଆଜିଠାରୁ କୋଭିଡ୍ ଟିକାକରଣ : ଲୋକଙ୍କୁ ଦିଆଯିବ ଫାଇଜର ଟିକା
ଗତ ସପ୍ତାହରେ ଜରୁରୀକାଳୀନ ଅନୁମୋଦନ ଦେଇଥିଲେ ବ୍ରିଟେନ ସରକାର
କନକ ବ୍ୟୁରୋ : ବ୍ରିଟେନରେ ଲୋକଙ୍କୁ ଆଜି ଠାରୁ ଫାଇଜର ଟିକା ଦେବା କାମ ଆରମ୍ଭ ହେବ । ଗତ ସପ୍ତାହରେ ବ୍ୟବହାର ପାଇଁ ଜରୁରୀକାଳୀନ ଅନୁମୋଦନ ଦେଇଥିଲା ବ୍ରିଟେନ ସରକାର । ଆମେରିକାର କମ୍ପାନୀ ଫାଇଜର ଓ ଜର୍ମାନୀର କମ୍ପାନୀ ବାୟୋ-ଏନ- ଟେକ୍ ମିଳିତ ଭାବେ ଏହି ଫାଇଜର ଟିକା ପ୍ରସ୍ତୁତ କରିଛନ୍ତି । କରୋନା ରୋକିବାରେ ଏହା ୯୫ ପ୍ରତିଶତ ଫଳପ୍ରଦ ବୋଲି ଶେଷ ପର୍ଯ୍ୟାୟ ପରିକ୍ଷଣ ପରେ ରିପୋର୍ଟ ପ୍ରକାଶ କରିଥିଲା ଫାଇଜର କମ୍ପାନୀ ।
Kanak News is now on WhatsApp
Join and get latest news updates delivered to you via WhatsApp
କମ୍ପାନୀ ପକ୍ଷରୁ ଦିଆଯାଇଥିବା ତଥ୍ୟ ଅନୁସାରେ ଫାଇଜର, ‘ଏମଆରଏନଏ’ ନାମକ ଏକ ସ୍ୱତନ୍ତ୍ର ପଦ୍ଧତିରେ ଟିକା ପ୍ରସ୍ତୁତ କରିଛି । ଏହି ପଦ୍ଧତିରେ ଜଣଙ୍କ ଦେହରେ କୋଡିଂ କରିଥାନ୍ତି ବିଶେଷଜ୍ଞ । ତାପରେ ଟିକା ଦିଆଯାଇଥାଏ । ଏହା କରୋନା ଭୂତାଣୁ ଦ୍ୱାର ସୃଷ୍ଟି ହୋଇଥିବା ସ୍ପାଇକ୍ ପ୍ରୋଟିନକୁ ନଷ୍ଟ କରେ ଓ ଆଂଟିବଡି ସୃଷ୍ଟି କରିଥାଏ । ଫଳରେ ଟିକା ନେବା ପରେ ଯଦି ଜଣେ କରୋନା ଭୂତାଣୁ ସଂସ୍ପର୍ଶରେ ଆସନ୍ତି, ତେବେ ଶରୀରରେ ସୃଷ୍ଟି ହୋଇଥିବା ଆଂଟିବଡି ଏହାକୁ ମୁକାବିଲା କରିବାରେ ସଫଳ ହୋଇଥାଏ ।
ସେପଟେ ଫାଇଜର ଟିକା ଭାରତରେ ବ୍ୟବହାର ହୋଇପାରିବ କି ନାହିଁ, ଏ ନେଇ ଚର୍ଚ୍ଚା ଲାଗି ରହିଛି । କାରଣ ଏହାକୁୁ ରଖିବା ଓ ପରିବହନ ପାଇଁ ମାଇନସ୍ ୭୦ ଡିଗ୍ରୀ ସେଲସିୟସ୍ ତାପମାତ୍ରା ଆବଶ୍ୟକ । ତେବେ ଟିକାର ଜରୁରୀକାଳୀନ ବ୍ୟବହାର ପାଇଁ ଅନୁମତି ମାଗିଛି ଫାଇଜର ଇଣ୍ଡିଆ ।