ଆଂଶିକ ତାଲାବନ୍ଦ ଅବଧି ସରିବା ପରେ କଟକଣା କୋହଳକୁ ନେଇ ଚର୍ଚ୍ଚା : ଆଜି ଆସିପାରେ ନୂଆ ଗାଇଡଲାଇନ୍; ବଡ ପ୍ରଶ୍ନ, ଖୋଲିବ କି କଟକ-ଭୁବନେଶ୍ୱର

1,380

କନକ ବ୍ୟୁରୋ : କରୋନାର ସଂଘର୍ଷ ଭିତରେ ଅର୍ଥନୀତିର ଅଂଟା ଦୋହଲି ଯାଇଛି, ଜୀବନକୁ ସୁରକ୍ଷା ଦେବାକୁ ଯାଇ ଜୀବିକା ଉଜୁଡ଼ିବାକୁ ବସିଲାଣି । ଜୀବନ-ଜୀବିକାର ଦୋଛକିରେ ଆଗକୁ କ’ଣ ହେବ ? ୧୬ ତାରିଖ ସକାଳେ ସରୁଛି ଆଂଶିକ ତାଲାବନ୍ଦର ଅବଧି । ଏହି ଅବଧି ସରିବା ପରେ ଯଦି ଅର୍ଥନୀତିକୁ ଖୋଲିବା ପାଇଁ ନିଷ୍ପତ୍ତି ନହୁଏ, ତେବେ ଭୂତାଣୁ ଠାରୁ ଅଧିକ ଲୋକ ଭୋକରେ ପ୍ରଭାବିତ ହେବାର ଆଶଙ୍କା ରହିଛି । କାରଣ, କଟକଣା ଭିତରେ କେତେ ଦିନ ଓ କେମିତି ଜୀବିକା ନିର୍ବାହ କରିବ ସାଧାରଣ ମଣିଷ ?

ସଂକ୍ରମଣ ହାରକୁ ଦେଖି ସରକାର ୩୦ଟି ଜିଲ୍ଲାକୁ ଦୁଇ ଭାଗରେ ବିଭକ୍ତ କରିଥିଲେ । ‘କାଟାଗୋରି-ବି’ରେ ଥିବା ୧୦ଟି ଜିଲ୍ଲାରେ ସଂକ୍ରମଣ ଅଧିକ ରହୁଥିବାରୁ କଟକଣା ଅଧିକ ରଖିଥିଲେ । ଏହି ଜିଲ୍ଲାଗୁଡ଼ିକ ମଧ୍ୟରୁ କିଛି ଜିଲ୍ଲାରେ ସଂକ୍ରମଣ ଯଥେଷ୍ଟ କମିଛି । କିନ୍ତୁ ଖୋର୍ଦ୍ଧା, କଟକ, ବାଲେଶ୍ବର ଓ ମୟୂରଭଞ୍ଜ ଜିଲ୍ଲାରେ ସଂକ୍ରମଣ ହାର ଆଶାନୁରୂପ କମୁ ନାହିଁ। ଏଠାରେ ବିଶେଷଜ୍ଞମାନଙ୍କ ଆକଳନ କାମ ଦେଉନି । ଯଦିଓ ଭୁବନେଶ୍ବରରେ ଟିକାକରଣ ସର୍ବାଧିକ ହୋଇଛି, କିନ୍ତୁ ମୋଟ୍‌ ଉପରେ ଖୋର୍ଦ୍ଧା ଜିଲ୍ଲାର ସଂକ୍ରମଣ ରାଜ୍ୟରେ ଅଧିକ ରହୁଛି । ତେଣୁ ‘କାଟାଗୋରି-ବି’ରେ ଥିବା କିଛି ଜିଲ୍ଲାକୁ ‘କାଟାଗୋରି-ଏ’କୁ ଆଣି ସରକାର ସେଠାରେ କଟକଣା କୋହଳ କରିବେ ନା ପୁଣି ‘କାଟାଗୋରି-ବି’ର ସବୁ ଜିଲ୍ଲାରେ କଟକଣା ବଳବତ୍ତର ରଖିବେ, ତାହା ଏବେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି ।

୧୬ ତାରିଖ ପରେ ସରକାର ଯଦି ଆଖିବୁଜା କଟକଣା ଜାରି ରଖନ୍ତି, ତେବେ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି ହେବାର ଆଶଙ୍କା ରହିଛି। କାରଣ ଏହା ମଧ୍ୟରେ ବିଭିନ୍ନ ଜୀବିକାରେ ଥିବା ଲୋକମାନେ ଆନ୍ଦୋଳନକୁ ଓହ୍ଲାଇ ସାରିଲେଣି। ଜୀବିକାକୁ ସ୍ବାଭାବିକ ସ୍ଥିତିକୁ ନ ଆଣିଲେ ବହୁ ଲୋକଙ୍କ ପାଇଁ ଦୁଇ ଓଳି ଖାଇବା ଯୋଗାଡ଼ କରିବା ଅସମ୍ଭବ ‌ହୋଇପଡ଼ିବ। ତେଣୁ ସରକାର ସଂକ୍ରମଣକୁ ମୁକାବିଲା ସହ ଜୀବିକାକୁ ସ୍ବାଭାବିକ କରିବା ପାଇଁ କି ରଣନୀତି ଆପଣାଉଛନ୍ତି, ତାହା ଉପରେ ସବୁ ନିର୍ଭର କରୁଛି।

Comments are closed.