କୋଭିଡ କମାଉଛି ସିମେନ କ୍ୱାଲିଟି। ଗବେଷଣାରୁ ଆସିଲା ଚିନ୍ତାଜନକ ତଥ୍ୟ।
କନକ ବ୍ୟୁରୋ: ଦୀର୍ଘ ୩ ବର୍ଷ ହେଲା କୋଭିଡ ମହାମାରୀ ସାରା ବିଶ୍ୱରେ ତାଣ୍ଡବ ରଚିଚାଲିଥିବା ବେଳେ ଏହାର ଦୂରଗାମୀ ପ୍ରଭାବ ନେଇ ଗବେଷଣା ଜାରି ରହିଛି । ଜଣେ ରୋଗୀ କୋଭିଡରେ ଆକ୍ରାନ୍ତ ହୋଇ ଭଲ ହୋଇଗଲା ପରେ ଯେ ସମ୍ପୂର୍ଣ୍ଣ ମୁକ୍ତ ହୋଇଗଲା, ଏକଥା ଭାବିବା ଭୁଲ । କାରଣ କୋଭିଡ୍ ଆକ୍ରାନ୍ତଙ୍କ ପାଖରେ ଏହାର ପ୍ରଭାବ ଲମ୍ବା ସମୟ ପର୍ଯ୍ୟନ୍ତ ରହୁଛି । ଏବେ ଗବେଷଣାରୁ ଯେଉଁ ନୂଆ ତଥ୍ୟ ସାମ୍ନାକୁ ଆସିଛି, ତାହା ଯେତିକି ସାଂଘାତିକ, ସେତିକି ଚିନ୍ତାଜନକ । କୋଭିଡ ଯୋଗୁଁ ପୁରୁଷଙ୍କ ମଧ୍ୟରେ ସିମେନ ବା ବୀର୍ଯ୍ୟର ଗୁଣବତା କମିଯାଉଛି । ପାଟନା ଏମ୍ସର ଗବେଷଣା ଏହା ସ୍ପଷ୍ଟ କରିଛି ।
Kanak News is now on WhatsApp
Join and get latest news updates delivered to you via WhatsApp
୩୦ ଜଣ କୋଭିଡ ଆକ୍ରାନ୍ତ ପୁରୁଷଙ୍କ ସିମେନକୁ ନେଇ ଗବେଷଣା କରାଯାଇଥିଲା ବେଳେ ଏମାନଙ୍କ ବୟସ ୧୯ରୁ ୪୩ ବର୍ଷ ମଧ୍ୟରେ ରହିଥିଲା । ଏହି ରୋଗୀମାନେ ଏମ୍ସ ପାଟନାରେ ଅକ୍ଟୋବର ୨୦୨୦ ଏବଂ ଏପ୍ରିଲ ୨୦୨୧ ମଧ୍ୟରେ ଚିକିତ୍ସିତ ହୋଇଥିଲେ ।
ଏହି ଗବେଷଣାରୁ ମିଳିଥିବା ତଥ୍ୟ କହୁଛି ଯେ,
• ପ୍ରଥମ ନମୁନା ପରୀକ୍ଷଣରେ ସିମେନ ସ୍ୱାଭାବିକ ତୁଳନାରେ କମ୍ ଥିଲା
• ୪୦ % ରୋଗୀଙ୍କ ପାଖରେ ଏହି ସମସ୍ୟା ଦେଖିବାକୁ ମିଳିଲା
• ସାଧାରଣ ଭାବେ ଶୁକ୍ରାଣୁର ପରିମାଣ ଦେଢ଼ ମିଲି ଲିଟରରୁ ୫ ମିଲିଲିଟର ଭିତରେ ରହିବା କଥା
• ହେଲେ ୧୦ ଜଣ କୋଭିଡ ଆକ୍ରାନ୍ତଙ୍କ ପାଖରେ ଶୁକ୍ରାଣୁ ପରିମାଣ ଦେଢ଼ ମିଲିଲିଟରରୁ କମ୍ ଥିଲା
• ପ୍ରଥମ ନମୁନାର ୭୪ ଦିନ ପରେ ଦ୍ୱିତୀୟ ନମୁନା ନିଆଯାଇଥିଲା
• ଦ୍ୱିତୀୟ ନମୁନା ପରୀକ୍ଷଣରେ ମଧ୍ୟ ଏହି ସମସ୍ୟା ଦେଖାଗଲା
• ସେତେବେଳେ ୧୦% ରୋଗୀଙ୍କ ଶୁକ୍ରାଣୁ ପରିମାଣ ସ୍ୱାଭାବିକ ଠାରୁ କମ୍ ଥିଲା
• ସମସ୍ତ ରୋଗୀଙ୍କ ସିମେନ କୋଭିଡ ମୁକ୍ତ ଥିଲା
ସିମେନ ଉପରେ କୋଭିଡର ପ୍ରଭାବ ନେଇ ଗବେଷଣା ରିପୋର୍ଟେ “କ୍ୟୁରିୟସ୍ ଜର୍ଣ୍ଣାଲ ଅଫ୍ ମେଡିକାଲ ସାଇନ୍ସ’ରେ ପ୍ରକାଶ ପାଇଛି । ଏଥିରେ ଶୁକ୍ରାଣୁ ସଂରକ୍ଷଣ ସୁବିଧା ଉପରେ ଗୁରୁତ୍ୱ ଦିଆଯାଇଛି ।