ସଂକ୍ରମଣ ଭିତରେ କରୋନା ପୁଣି ଲେଖିଲାଣି ‘ଶବ ଶ୍ମଶାନର’ କାହାଣୀ । କେଉଁଠି ଶବକୁ ମଶାଣୀ ମିଳୁନି, କେଉଁଠି ସଂସ୍କାର ପାଇଁ ଅପେକ୍ଷା କରିଛି ଶବ…
କନକ ବ୍ୟୁରୋ: ମତେ ନିଆଁ ଟିକେ ଦିଅ, ମତେ ଜାଳିପୋଡି ଦିଅ, ଜୁଇର ଡହଡହ ଜାଳରେ ମୋ ହାଡ ମାଂସକୁ ପୋଡି ପାଉଁଶ କରିଦିଅ । ମୁଁ ଜଳିଯାଏ, ତରଳିଯାଏ । ନା ଥିବ ସଂକ୍ରମଣ ଜନିତ ସନ୍ଦେହ, ନା ଥିବେ କେହି ଘୃଣା କରିବାର ମଣିଷ । ଏଠି ବ୍ୟବସ୍ଥା ବି କରୋନାରେ କବଳିତ । ସବୁ ସରକାରୀ ସୁବିଧାମାନେ ଏଠି ମୋ ପରି ଶବ ପାଲଟିଯାଇଛନ୍ତି । ତାହା ନହୋଇଥିଲେ ଅନ୍ତିମ ସଂସ୍କାର ପାଇଁ କଣ ଧାଡି କରି ଅପେକ୍ଷା କରିବାକୁ ପଡିଥାନ୍ତା । ଶବାଗାରରୁ ନେଇ ଅଳିଆ ଫିଙ୍ଗା ଗାଡିରେ ଫିଙ୍ଗାହେଉ ଥାନ୍ତା । ମଣିଷ ଶବ ପାଲଟିଗଲା ଆଉ ଶବ ସେହି ମଣିଷଠୁ ମୁକ୍ତି ଚାହୁଁଛି, ନିଆଁ ଟିକେ ପାଇଁ ନେହୁରା ହେଉଛି । ମତେ ଜାଳି ଦିଅ, ଜାଳି ଦିଅ ବୋଲି ଚିକ୍ରାର କରୁଛି । ଶବ ଏଠି ଶ୍ମଶାନ ଠିକଣା ଭୁଲିଛି…
Kanak News is now on WhatsApp
Join and get latest news updates delivered to you via WhatsApp
କରୋନାର ୨ୟ ଲହର ଦୁଃଖ ପରେ ଦୁଃଖ ଆଣିଦେଉଥିବା ବେଳେ ବର୍ଷେ ତଳର ସେ କାହାଣୀ ଏବେ ଧିରେଧିରେ ପୁଣି ଆସିବାରେ ଲାଗିଛି । କରୋନା କାଳରେ ଘଟୁଥିବା କରୁଣ ଦୃଶ୍ୟର ଏବେ ପୁନରାବୃତି ହେବାକୁ ଯାଉଛି । ଆଉ ସବୁଠାରୁ ଆଶ୍ଚର୍ଯ୍ୟ କରିଦେଇଛି ଛତିଶଗଡରୁ ଆସିଥିବା ଏ ଦୃଶ୍ୟ । ଯେଉଁଠି କରୋନାରେ ମୃତ୍ୟୁ ହୋଇଥିବା ଲୋକଙ୍କ ଶବକୁ ଅଳିଆବୁହା ଗାଡିରେ ଫିଙ୍ଗା ହୋଇଛି । କରୋନାରେ ସଂକ୍ରମିତ ହୋଇ ୪ ଜଣଙ୍କ ଜୀବନ ଯିବା ପରେ ତାଙ୍କୁ ଅଳିଆ ଭଳି ଫିଙ୍ଗାଯାଇଥିବା ଅଭିଯୋଗ ହେଉଛି । ମୃତ୍ୟୁ ପରେ ଶବକୁ ଏ କି ପ୍ରକାର ସମ୍ମାନ । ଛତିଶଗଡ ରାଜନନ୍ଦଗାଓଁ ଜିଲ୍ଲାରୁ ଆସିଥିବା ଏ ଚିତ୍ର ସାରା ଦେଶର ବ୍ୟବସ୍ଥାକୁ ପ୍ରଶ୍ନ କରିଛି ।
ସେପଟେ ସଂକ୍ରମଣ ଜନିତ ମୃତ୍ୟୁ ଦ୍ରୁତ ଗତିରେ ବଢୁଥିବାରୁ ସାରା ଭାରତରୁ ଆସୁଛି ମୃତ୍ୟୁ ପରର ଭିଜାଭିଜା ଚିତ୍ର । କେଉଁଠି ଶବ, ନିଜ ସଂସ୍କାର ପାଇଁ ଅପେକ୍ଷା କରୁଛି । ତ କେଉଁଠି ଲମ୍ବା ଧାଡିରେ ଶୋଇ ଶବ ଶ୍ମଶାନ ଅପେକ୍ଷାରେ ପଡି ରହୁଛି । ସୁରଟରେ କରୋନା କରାଳରୂପ ଦେଖାଇଥିବା ବେଳେ ମୃତ୍ୟୁ ପରେ ଶବ ପାଇଁ ସ୍ଥାନ ନାହିଁ । ଅନ୍ତିମ ସଂସ୍କାର ପାଇଁ ଘଣ୍ଟା ଘଣ୍ଟା ଅପେକ୍ଷା କରିବାର ଚିତ୍ର ସତରେ ଏ ସମାଜର ଛାତିକୁ ଥରାଇ ଦେଉଛି ।
ଅନ୍ୟପଟେ ଦେଶର ବିଭିନ୍ନ ସ୍ଥାନରୁ ଆସୁଥିବା ଶବ ଓ ଶ୍ମଶାନର କାହାଣୀ ପୁଣି ଥରେ ବିଗତ ବର୍ଷର ହୃଦୟ ବିଦାରକ କଥା ମନେପକାଇ ଦେଉଛି । ମନେପକାନ୍ତୁ ବର୍ଷେ ତଳର ସେ ଲୋମଟାଙ୍କୁରା ଦୃଶ୍ୟକୁ । ଯେତେବେଳେ କରୋନାରେ ଜଣଙ୍କ ମୃତ୍ୟୁ ହେଉଥିଲା ସେତେବେଳେ ଶବକୁ ସମ୍ମାନ ମିଳୁନଥିଲା । ଦାହ ସଂସ୍କାରର ଦୂରର କଥା ଶବକୁ ଛୁଉଁନଥିଲେ ଲୋକେ । ଯାହାର ବି ଅନ୍ୟ ରୋଗରେ ମୃତ୍ୟୁ ହେଉଥିଲା ତାକୁ କରୋନାର ମୃତ୍ୟୁ କହି ଲୋକେ ନାକ ଟେକୁଥିଲେ, ସନ୍ଦେହ କରି ପାଖ ମାଡୁନଥିଲେ । ଏମିତି କି ବାପାର ଶବକୁ ପୁଅ କାନ୍ଧ ଦେଉନଥିଲା । ପିପିଇ କିଟ୍ ପିନ୍ଧି ସ୍ତ୍ରୀ ନିଜ ସ୍ୱାମୀର ଶବରେ ମୁଖାଗ୍ନି ଦେଉଥିଲା ତ କେବେ ଅଳିଆଗଦାରେ ପଡୁଥିଲା ଗରିବର ଶବ । ଏମିତି ଅନେକ ଚିତ୍ର ବର୍ଷେ ତଳେ ହୃଦୟକୁ ବିଦାରି ଦେଇଛି । ଆଉ ଏବେ ବର୍ଷେ ପରେ ପୁଣି ଥରେ ଧିରେଧିରେ ସାମ୍ନାକୁ ଆସୁଛି ସେମିତି କିଛି ସାଙ୍ଘାତିକ ଚିତ୍ର ଯେଉଁଠି ମଣିଷକୁ ଶବ ପଚାରୁଛି ପୁଳାପୁଳା ପ୍ରଶ୍ନ ।