କରୋନା ଟିକାର ଦାମ ହେବ ୨୫୦ ଟଙ୍କା ! ଖୁବ୍ ଶୀଘ୍ର ସରକାରଙ୍କ ସହ ହୋଇପାରେ ସେରମ ଇନଷ୍ଟିଚ୍ୟୁଟର ଚୁକ୍ତି ।
କନକ ବ୍ୟୁରୋ : ୨୫୦ ଟଙ୍କାରେ ମିଳିବ କୋଭିଡ୍ ଟିକା । ଖୁବଶୀଘ୍ର କେନ୍ଦ୍ର ସରକାରଙ୍କ ସହ ଚୁକ୍ତି । ଚୁକ୍ତି କରିବ ସେରମ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆ । ଭାରତବାସୀଙ୍କ ପାଇଁ ଏହି ଖବର ଏଥିପାଇଁ ଆଶ୍ୱସ୍ତି ଆଣିଦେଇଛି, କାରଣ ମାତ୍ର ୨୫୦ଟଙ୍କାରେ ମିଳିଯିବ କୋଭିଡ ଟିକାର ଗୋଟିଏ ଡୋଜ । ଯେଉଁ ଟିକା ପାଇବା ପାଇଁ କୋଟି କୋଟି ଭାରତୀୟ ଅପେକ୍ଷା କରି ବସିଛନ୍ତି, ସେହି ମାନଙ୍କ ପାଇଁ ଏହି ଟିକା ଆଣିଦେବ ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆ ।
Kanak News is now on WhatsApp
Join and get latest news updates delivered to you via WhatsApp
ବିଜନେସ ଷ୍ଟାଣ୍ଡାର୍ଡରେ ପ୍ରକାଶ ପାଇଥିବା ରିପୋର୍ଟ ଅନୁସାରେ ବିଶ୍ୱର ସବୁଠାରୁ ଅଧିକ ଟିକା ପ୍ରସ୍ତୁତକାରୀ କମ୍ପାନୀ ସେରମ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆ ଏନେଇ ଖୁବଶୀଘ୍ର କେନ୍ଦ୍ର ସରକାରଙ୍କ ସହିତ ଚୁକ୍ତି ସ୍ୱାକ୍ଷର କରିବାକୁ ଯାଉଛି ।
ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଆଦର ପୁନାୱାଲା ପୂର୍ବରୁ କହିଥିଲେ,
-ଭାରତର ବେସରକାରୀ ବଜାରରେ ଟିକାର ଦାମ ଏକ ହଜାର ଟଙ୍କା ରହିବ ।
-କିନ୍ତୁ ଭାରତ ସରକାର ବହୁତ ପରିମାଣରେ ଟିକା ଦରକାର କରୁଥିବାରୁ ଖୁବ କମ୍ ଦିନରେ ଏହି ଡିଲ୍ ହେବା ନେଇ ସମ୍ଭାବନା ସୃଷ୍ଟି ହୋଇଛି ।
-ପୁନାୱାଲା ଆହୁରି ମଧ୍ୟ କହିଥିଲେ, ଅନ୍ୟ ଦେଶକୁ ଦେବା ପୂର୍ବରୁ ସେରମ୍ ପ୍ରଥମେ ଭାରତରେ ଟିକାକୁ ଜନସାଧାରଣଙ୍କ ପାଖରେ ପହଞ୍ଚାଇବ ।
ସେପଟେ ଜରୁରୀକାଳୀନ ଅନୁମତି ମାଗିଥିବା ୩ଟି ଟିକା ପାଇଁ ଖୁବଶୀଘ୍ର ଆସୁଛି ଖୁସି ଖବର । ନୀତି ଆୟୋଗ ସଦସ୍ୟ ଡକ୍ଟର ଭି.କେ ପଲ କହିଛନ୍ତି, ଲାଇସେନ୍ସ ପ୍ରଦାନ କରିବା ପାଇଁ ଅନୁମତି ମାଗିଥିବା ୩ଟି ଟିକା ନେଇ ଏବେ ବିଚାରବିମର୍ଶ ଚାଲିଛି । ସସସ୍ତଙ୍କୁ କିମ୍ବା ଯେ କୌଣସି ଗୋଟିଏ ଟିକାକୁ ଖୂବଶୀଘ୍ର ଅନୁମତି ମିଳିପାରେ ।
ଅନ୍ୟପକ୍ଷରେ ଭାରତରେ କିପରି ଟିକାର ବଂଟନ ପ୍ରକ୍ରିୟାକୁ ସୁବ୍ୟବସ୍ଥିତ କରାଯାଇପାରିବ ସେନେଇ ପ୍ରକ୍ରିୟା ଆରମ୍ଭ ହୋଇଯାଇଛି । ସମଗ୍ର ଦେଶରେ ସ୍ୱାସ୍ଥ୍ୟ କର୍ମୀମାନଙ୍କ ଏକ ଡାଟାବେସ ପ୍ରସ୍ତୁତ କରାଯାଉଛି । କୋ-ୱିନ ସଫ୍ଟୱେୟାରରେ ଏସମସ୍ତ ଡାଟାବେସ୍ ଅପଲୋଡ କରାଯିବ । ଏହି ଡାଟାବେସକୁ ତନ୍ନ ତନ୍ନ କରି ଯାଂଚ କରାଯିବ । କେବଳ ଏତିକି ନୁହେଁ, ବର୍ତମାନ ଦେଶରେ ପ୍ରସ୍ତୁତ ହୋଇରହିଥିବା କୋଲଡ ଚେନ୍, ପ୍ରଥମ ୩କୋଟି ସ୍ୱାସ୍ଥ୍ୟକର୍ମୀଙ୍କ ପାଇଁ କୋଭିଡ-୧୯ ଟିକାକୁ ସଂରକ୍ଷିତ ରଖିପାରିବାର କ୍ଷମତା ବହନ କରୁଛି ବୋଲି କହିଛନ୍ତି ରାଜେଶ ଭୂଷଣ ।