ଭାରତରେ କୋଭିଡ୍ ୧୯ ଭୂତାଣୁର ଗୋଷ୍ଠୀ ସଂକ୍ରମଣ ଆଶଙ୍କା ! ସତର୍କ କଲେ ବିଷେଷଜ୍ଞ; କରୋନା କଟକଣା କୋହଳକୁ କଡା ସମାଲୋଚନା
କନକ ବ୍ୟୁରୋ: ଭାରତରେ କରୋନା ଭୂତାଣୁର ଗୋଷ୍ଠୀ ସଂକ୍ରମଣ ଆଶଙ୍କା କରିଛନ୍ତି ବିଶେଷଜ୍ଞ । ସରକାର ଏ ଯାଏଁ ଗୋଷ୍ଠୀ ସଂକ୍ରମଣ ହୋଇନାହିଁ ବୋଲି କହୁଛନ୍ତି । କିନ୍ତୁ ବିଶେଷଜ୍ଞ କହୁଛନ୍ତି ଦେଶରେ ଗୋଷ୍ଠୀ ସଂକ୍ରମଣ ଆଶଙ୍କା ବଢିଛି ।
Kanak News is now on WhatsApp
Join and get latest news updates delivered to you via WhatsApp
ଭାରତରେ କରୋନା ଭୂତାଣୁର ଗୋଷ୍ଠୀ ସଂକ୍ରମଣ ଆରମ୍ଭ ହୋଇଯାଇଛି ସ୍ବାସ୍ଥ୍ୟ ବିଶେଷଜ୍ଞମାନେ ଚେତାଇ ଦେଇଛନ୍ତି। ସରକାର କିନ୍ତୁ ଏଯାଏ ଗୋଷ୍ଠୀ ସଂକ୍ରମଣ ହୋଇଥିବା କଥାକୁ ସ୍ବୀକାର କରୁନାହାନ୍ତି। ଗୋଟିଏ ପଟେ ସଂକ୍ରମଣ ଦ୍ରୁତଗତିରେ ବଢ଼ି ଚାଲିଥିବାବେଳେ ସରକାର ଏହି ସମୟରେ ଲକଡାଉନ୍ କଟକଣା କୋହଳ କରିଛନ୍ତି। ସରକାରଙ୍କ ଏହି ପଦକ୍ଷେପକୁ ବିଶେଷଜ୍ଞମାନେ କଡ଼ା ସମାଲୋଚନା କରିଛନ୍ତି। କରୋନା ନିୟନ୍ତ୍ରଣ ପାଇଁ ଭାରତୀୟ ଆୟୁର୍ବିଜ୍ଞାନ ଅନୁସନ୍ଧାନ ପରିଷଦ (ଆଇସିଏମ୍ଆର୍) ଗବେଷଣା ଗୋଷ୍ଠୀରେ ସାମିଲ ଥିବା କିଛି ବିଶେଷଜ୍ଞ ମଧ୍ୟ ସରକାରଙ୍କର ଏପରି ପଦକ୍ଷେପକୁ ସମାଲୋଚନା କରିଛନ୍ତି।
ଭାରତୀୟ ଜନ ସ୍ବାସ୍ଥ୍ୟ ସଂଗଠନ, ଇଣ୍ଡିଆନ୍ ଆସୋସିଏସନ୍ ଅଫ୍ ପ୍ରିଭେନ୍ଟିଭ୍ ଆଣ୍ଡ୍ ସୋସିଆଲ୍ ମେଡିସିନ୍ ଏବଂ ଇଣ୍ଡିଆନ୍ ଆସୋସିଏସନ୍ ଅଫ୍ ଏପିଡେମିଓଲୋଜିଷ୍ଟ୍ ଦ୍ବାରା ଜାରି ହୋଇଥିବା ଏକ ମିଳିତ ବିବୃତିରେ କହାଯାଇଛି ଯେ ବର୍ତ୍ତମାନ ସ୍ଥିତିରେ କରୋନା ମହାମାରୀକୁ ସମ୍ପୂର୍ଣ୍ଣ ହଟାଇ ଦେଇହେବ ବୋଲି ସରକାର ଆଶା କରିବା ଅବାସ୍ତବ। ଦେଶରେ ଏବେ ଗୋଷ୍ଠୀ ସଂକ୍ରମଣ ଆରମ୍ଭ ହୋଇସାରିଛି। ସେମାନେ ଆହୁରି କହିଛନ୍ତି, ମାର୍ଚ୍ଚ ୨୫ରୁ ମେ’ ୩୦ ତାରିଖ ଯାଏ ଦେଶରେ ଜାରି ରହିଥିବା ଲକ୍ଡାଉନ୍ ବେଶ୍ ଗୁରୁତ୍ବପୂର୍ଣ୍ଣ ଥିଲା। କିନ୍ତୁ ଏହା ସତ୍ତ୍ବେ ଦେଶରେ ସଂକ୍ରମଣ ବଢ଼ି ବଢ଼ି ଚାଲିଛି। ଅନ୍ୟପକ୍ଷରେ ଦେଶରେ ପ୍ରବାସୀ ସଙ୍କଟକୁ ଯେଉଁଭଳି ମୁକାବିଲା କରାଯାଉଛି ତାହା ଭୂତାଣୁ ନିୟନ୍ତ୍ରଣ ଦିଗରେ ଅଧିକ ଚ୍ୟାଲେଂଜ ସୃଷ୍ଟି କରିଛି ସେମାନେ ବୋଲି ସତର୍କ କରି ଦେଇଛନ୍ତି।