କନକ ବ୍ୟୁରୋ: ପ୍ରତିଦିନ ବଢୁଛି ତୈଳ ଦର । ବର୍ଦ୍ଧିତ ତୈଳ ଦର ପ୍ରତି ଦିନ ନୂଆ ନୂଆ ରେକର୍ଡ ସୃଷ୍ଟି କରୁଛି । କେନ୍ଦ୍ର ଓ ରାଜ୍ୟ ସରକାର ତୈଳ ଦରରେ ନେଉଥିବା ଟିକସରେ କାଣ୍ଟଛାଣ୍ଟ କରିବା ପାଇଁ ଦାବି ହେଉଛି । କିନ୍ତୁ ବିଶ୍ୱରେ ଏମିତି କିଛି ଦେଶ ଅଛି ଯେଉଁଠି ପାଣିଠାରୁ ବି ଶସ୍ତା ପେଟ୍ରୋଲ, ଡିଜେଲ ।
Kanak News is now on WhatsApp
Join and get latest news updates delivered to you via WhatsApp
ତୈଳ ଦର କମ ଥିବା ବିଶ୍ୱର ୫ଟି ରାଷ୍ଟ୍ର ଉପରେ ନଜର ପକାନ୍ତୁ…
ବିଶ୍ୱରେ ସବୁଠାରୁ ଶସ୍ତାରେ ତୈଳ ମିଳେ, ଦକ୍ଷିଣ ଆମେରିକୀୟ ଦେଶ ଭାନିଜୁଏଲାରେ । ଏଠାରେ ପେଟ୍ରୋଲ ଲିଟର ପିଛା ଦର ୦.୦୨ ଡଲାର ଅର୍ଥାତ ୧ ଟଙ୍କା ୫୦ପଇସା । ମାଚିସ ଡବା ଠାରୁ ମଧ୍ୟ ଶସ୍ତା ପେଟ୍ରୋଲ । ଯଦି ଆପଣ ଭାନିଜୁଏଲାରେ ଅଛନ୍ତି ତେବେ ୫୦ ଟଙ୍କାରେ ୩୦ ଲିଟର ତୈଳ କିଣିପାରିବେ । ଏଠାରେ ବିଶ୍ୱର ସବୁଠାରୁ ବଡ ତେଳ ଭଣ୍ଡାର ରହିଛି । ଏହି ରାଷ୍ଟ୍ର ଆର୍ଥିକ ମାନ୍ଦାବସ୍ଥା ଦେଇ ଗତି କରୁଥିଲେ ମଧ୍ୟ ତୈଳ ଉପରେ ଲୋକଙ୍କୁ ସବସିଡି ମିଳେ ।
ଭାନିଜୁଏଲା ପରେ ଇରାନରେ ସବୁଠୁ କମ ଦରରେ ମିଳେ ତୈଳ । ଏଠାରେ ପେଟ୍ରୋଲ ଲିଟର ପିଛା ଦର ୦.୦୬ ଡଲାର ଅର୍ଥାତ ୪ ଟଙ୍କା ୫୧ ପଇସା । ଏଠାରେ ୩୫ ଲିଟରରେ ଗାଡିର ତେଲ ଟାଙ୍କି ଭର୍ତି କରିବାକୁ ଆପଣଙ୍କୁ ଦେବାକୁ ପଡିବ ମାତ୍ର ୧୫୭ ଟଙ୍କା ୮୫ପଇସା । ଦିଲ୍ଲୀରେ ଏତିକି ଟଙ୍କାରେ ଦେଢ ଲିଟର ତୈଳ ମଧ୍ୟ ମିଳିବ ନାହିଁ । ଇରାନ ନିକଟରେ ବିଶ୍ୱର ଚତୁର୍ଥ ବୃହତ ତୈଳ ଭଣ୍ଡାର ରହିଛି ।
ଗୃହଯୁଦ୍ଧ ସହ ଲଢୁଥିବା ପଶ୍ଚିମ ଏସିଆର ଦେଶ ସିରିୟାରେ ପେଟ୍ରୋଲ ଦର ୦.୨୩ ଡଲାର ଅର୍ଥାତ ଭାରତୀୟ ମୁଦ୍ରାରେ ୧୭ଟଙ୍କା । ଏଠାରେ ୫୯୫ ଟଙ୍କାରେ ୩୫ ଲିଟର ତୈଳ ମିଳିବ । ଏଠାରେ ସରକାର ଆର୍ଥିକ ସଙ୍କଟ ଦେଇ ଗତି କରୁଥିବା ଯୋଗୁଁ ତୈଳ ଦାମ ବଢାଇଛନ୍ତି ଫଳରେ ଦର ୧୭ଟଙ୍କାରେ ପହଂଚିଛି ।
ଆଫ୍ରିକୀୟ ଦେଶ ଅଙ୍ଗୋଲାରେ ପେଟ୍ରୋଲ ଦର ୨୦ ଟଙ୍କା ରହିଛି । ସୂଚନା ଅନୁସାରେ ଅଙ୍ଗୋଲାରେ ଅଶୋଧିତ ତୈଳର ଭଣ୍ଡାର ରହିଛି । ଯେଉଁଠି ପ୍ରାୟ ୭.୮ ଅରବ ବ୍ୟାରେଲ ଅଶୋଧିତ ତୈଳ ରହିଛି । ଏହା ବିଶ୍ୱର ୧୮ତମ ବୃହତ ତୈଳ ଭଣ୍ଡାର । ଆଉ ଏକ ଆଫ୍ରିକୀୟ ଦେଶ ଅଲଜିରିୟାରେ ପେଟ୍ରୋଲ ଦର ୨୫ଟଙ୍କା ୧୧ପଇସା । ଦେଶରେ ୧୨.୨ଅରବ ବ୍ୟାରେଲର ତୈଳ ଭଣ୍ଡାର ରହିଛି । ଅଲଜିରିୟାରେ ପ୍ରତିଦିନ ୧୧ଲକ୍ଷ ବ୍ୟାରେଲ ତୈଳ ଉତ୍ପାଦନ ହୁଏ । ଏହା ବାଦ୍ କୁୱେତ, ନାଇଜିରିଆ, ତୁର୍କମେନିସ୍ଥାନ, କଜାକସ୍ଥାନ ଓ ଇଥୋଓପିଆରେ ମଧ୍ୟ ତୈଳ ଦର ଲିଟର ପିଛା ଅଧା ଡଲାରରୁ କମ ।