ରାଜ୍ୟ ବଜେଟ ଉପରେ ପଡିପାରେ କରୋନା ପ୍ରଭାବ: ୨୦୨୦-୨୧ ଆର୍ଥିକ ବର୍ଷରେ ୨୫%ରୁ ୪୦% ରାଜସ୍ୱ କ୍ଷତି ଆଶଙ୍କା; ଓଡିଶା ଆଲୋଚନା ଚକ୍ର ୱେବନାରରେ ମତପ୍ରକାଶ
ପୂର୍ବତନ ମୁଖ୍ୟ ଶାସନ ସଚିବ କହିଲେ, ଟଙ୍କା ଋଣ କରିବା ଛଡା ରାଜ୍ୟ ସରକାରଙ୍କ ପାଖରେ ଆଉ କିଛି ବିକଳ୍ପ ନାହିଁ
କନକ ବ୍ୟୁରୋ: ରାଜ୍ୟର ବଜେଟ ଉପରେ କରୋନା ମାଡ । କରୋନା ସଂକ୍ରମଣ ଏବଂ ଏହା ଜନିତ ଲକଡାଉନ ବା ତାଲାବନ୍ଦର ସିଧା ପ୍ରଭାବ ପଡିବ ରାଜ୍ୟ ବଜେଟ ଉପରେ । ୨୦୨୦-୨୧ ଆର୍ଥିକ ବର୍ଷରେ ଏହା ୨୫ ପ୍ରତିଶତରୁ ୪୦ ପ୍ରତିଶତ ଲକ୍ଷ ରହିଥିବା ବଜେଟଠାରୁ କମ ହେବ । ଓଡିଶା ଆଲୋଚନା ଚକ୍ର ଦ୍ୱାରା ଆୟୋଜିତ ୱେବନାରରେ ଏହି ମତ ପ୍ରକାଶ ପାଇଛି । ପୂର୍ବତନ ମୁଖ୍ୟ ଶାସନ ସଚିବ ଯୁଗଳ ମହାପାତ୍ର ଏବଂ ଏନଆଇପିଏଫପି ପ୍ରଫେସର ଡକ୍ଟର ତାପସ ସେନ କହିଛନ୍ତି, ଟଙ୍କା ଋଣ କରିବା ଛଡା ଓଡିଶା ସରକାରଙ୍କ ପାଖରେ ଆଉ କିଛି ବିକଳ୍ପ ନାହିଁ । ଋଣ କରିବା ଦ୍ୱାରା ପ୍ରବାସୀ ଶ୍ରମିକଙ୍କ ଆବଶ୍ୟକତା, ସ୍ୱାସ୍ଥ୍ୟ ସେବା ଏବଂ ଅନ୍ୟାନ୍ୟ ଯୋଜନାରେ ଅର୍ଥ ଖର୍ଚ୍ଚ କରିହେବ ।
Kanak News is now on WhatsApp
Join and get latest news updates delivered to you via WhatsApp
ଅକ୍ସଫାମ ଇଣ୍ଡିଆର ପବ୍ଲିକ ଫାଇନାନ୍ସ ଆନାଲିଷ୍ଟ କହିଛନ୍ତି, କରୋନା ସଂକ୍ରମଣ ଏବଂ ତାଲା ବନ୍ଦ କାରଣରୁ ଏପ୍ରିଲ ମାସରୁ ଜୁନ ମାସ ମଧ୍ୟରେ ଅର୍ଥନୈତିକ କାରବାର ମାନ୍ଦା ପଡିଛି । ଏହି ସମୟ ମଧ୍ୟରେ ରାଜ୍ୟ ସରକାର ମାତ୍ର ୬୦ ପ୍ରତିଶତ ରାଜସ୍ୱ ସଂଗ୍ରହ କରିବାରେ ସକ୍ଷମ ହୋଇପାରିଛନ୍ତି । ଯଦି ରାଜସ୍ୱ ସଂଗ୍ରହର ଏହି ପ୍ରକ୍ରିୟା ଏହିପରି ଗତିରେ ଜାରି ରହେ ତେବେ ୨୦୨୦-୨୧ ଆର୍ଥିକ ବର୍ଷରେ ରାଜ୍ୟ ସରକାରଙ୍କ ରାଜସ୍ୱ ୪୯ହଜାର୬୦୦ କୋଟି କମିଯିବ ଯାହାକି ବଜେଟ ଟାର୍ଗେଟ ୧ଲକ୍ଷ ୨୪ହଜାର କୋଟିର ୪୦ ପ୍ରତିଶତ । ତେବେ ପରବର୍ତି ସମୟରେ ଏଥିରେ ସୁଧାର ମଧ୍ୟ ଆସିବ । ଆଶା କରାଯାଉଛି ଅକ୍ଟୋବରରୁ ଡିସେମ୍ବର ମଧ୍ୟରେ ଏହି ସୁଧାର ଆସିବ । ଯାହା ହେଲେ ବି ୧୭ହଜାର କୋଟିର ନିଅଂଟ ଦେଖାଦେବ ବୋଲି ସେ କହିଛନ୍ତି ।