କନକ ବ୍ୟୁରୋ : ଦେଶରେ କିଛିଦିନ ହେବ କ୍ରମାଗତ ଭାବେ କରୋନା ସଂକ୍ରମଣ କମିବାରେ ଲାଗିଛି । ହେଲେ ଅନ୍ୟ କିଛି ଦେଶମାନଙ୍କରେ ପୁଣି କରୋନାର କରାଳ ରୂପ ଦେଖିବାକୁ ମିଳିଛି । ଏହି କ୍ରମରେ ବିଦେଶରୁ ଭାରତ ଆସୁଥିବା ଯାତ୍ରୀଙ୍କ ପାଇଁ ସ୍ୱାସ୍ଥ୍ୟ ମନ୍ତ୍ରଣାଳୟ ନୂଆ ଗାଇଡ ଲାଇନ ଜାରି କରିଛି । ନୂଆ ଗାଇଡ ଲାଇନରେ କୁହାଯାଇଛି କି ସମସ୍ତ ଅର୍ନ୍ତରାଷ୍ଟ୍ରୀୟ ଯାତ୍ରୀ ବିମାନ ବନ୍ଦରରେ କୋଭିଡ ଟେଷ୍ଟର ନେଗେଟିଭ୍ ରିପୋର୍ଟ ଓ ଆରଟିପିସିଆର ରିପୋର୍ଟ ଦେଖାଇବା ଜରୁରୀ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଘରୋଇ ବିମାନ ଉପରେ କରୋନା ଭୂତାଣୁ ପାଇଁ ଲାଗିଥିବା ସମସ୍ତ କଟକଣା ଅକ୍ଟୋବର ୧୮ ତାରିଖରୁ ଉଠାଇ ଦେଇଛନ୍ତି ସରକାର । ଏହି ନିର୍ଦ୍ଦେଶ ପରେ ଏବେ ଘରୋଇ ବିମାନଗୁଡିକ ୧୦୦ ପ୍ରତିଶତ କ୍ଷମତା ସହିତ ଯାତ୍ରା କରିପାରିବ । ଏହା ପୂର୍ବରୁ ୧୮ ନଭେମ୍ବର ୨୦୨୦ ରୁ ୧୮ ଅକ୍ଟୋବର ୨୦୨୧ ମଧ୍ୟରେ ଘରୋଇ ବିମାନଗୁଡିକୁ ୮୫ ପ୍ରତିଶତ କ୍ଷମତା ସହ ଯାତ୍ରା କରିବାକୁ ଭାରତୀୟ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ନିର୍ଦ୍ଦେଶ ଦେଇଥିଲେ । ଅନ୍ୟପଟେ ମନ୍ତ୍ରଣାଳୟର ନିର୍ଦ୍ଦେଶ ମୁତାବକ ବିମାନ ବନ୍ଦରରେ ପୂର୍ବଭଳି ସମସ୍ତ କୋଭିଡ ଗାଇଡ ଲାଇନ ପାଳନ କରାଯିବ । ଏହାସହ ବିମାନ ଭିତରେ ବି ସମସ୍ତ କୋଭିଡ ଗାଇଡ ଲାଇନ ପାଳନ କରିବାକୁ ମନ୍ତ୍ରଣାଳୟ ନିର୍ଦ୍ଦେଶ ଦେଇଛନ୍ତି ।
କହିରଖୁ କି କରୋନା ସଂକ୍ରମଣ କାରଣରୁ ୨୦୨୦ ମାର୍ଚ୍ଚ ୨୩ ତାରିଖରୁ ସମସ୍ତ ଅର୍ନ୍ତରାଷ୍ଟ୍ରୀୟ ଉଡାଣ ଉପରେ ପ୍ରତିବନ୍ଧକ ଲଗାଯାଇଥିଲା । ମାତ୍ର ୨୦୨୦ ମେ ମାସରେ ‘ବନ୍ଦେ ଭାରତ ମିଶନ’ ଜରିଆରେ ବିଶେଷ ଅର୍ନ୍ତରାଷ୍ଟ୍ରୀୟ ଉଡାଣକୁ ପରିଚାଳନା କରାଯାଇଥିଲା । ଏହା ବ୍ୟତୀତ କିଛି ନିର୍ଦ୍ଧିଷ୍ଟ ଦେଶର ସହ ଦ୍ୱିପାକ୍ଷୀକ ‘ଏୟାର ବବଲ’ ବ୍ୟବସ୍ଥା କ୍ରମରେ ଜୁଲାଇ ୨୦୨୦ ରୁ ଉଡାଣ ପରିଚାଳନା କରାଯାଉଥିଲା ।