କେରଳରେ କାଲିଠାରୁ ଖୋଲିବ ହୋଟେଲ । ଅଡ୍ ଇଭିନ୍ ଫର୍ମୁଲାରେ ୭ ଜିଲ୍ଲାରେ ଗଡିବ ଗାଡି । କରୋନା ସ୍ଥିତି ସୁଧୁରୁଥିବା ଅଂଚଳରେ କୋହଳ ହେଲା କଟକଣା
କନକ ବ୍ୟୁରୋ: କେରଳରେ ସୋମବାର ଠାରୁ ୭ଟି ଜିଲ୍ଲାରେ ଜୀବନଯାତ୍ରା ସ୍ୱାଭାବିକ ହେବାକୁ ଯାଉଛି । ଦେଶର ପ୍ରଥମ ରାଜ୍ୟ ଭାବେ ତାଲାବନ୍ଦ କଟକଣା କୋହଳ କରିବାକୁ ଯାଉଛି କେରଳ । କରୋନା ସଂକ୍ରମଣ ସଂଖ୍ୟା ବୃଦ୍ଧି ନହେବା ଓ ଆକ୍ରାନ୍ତ ସୁସ୍ଥ ହେଉଥିବାରୁ ଗାଡି ଚଳାଚଳ କରିବାକୁ ନିଷ୍ପତି ନେଇଛନ୍ତି କେରଳ ସରକାର । ୨ଟି ଜିଲ୍ଲାରେ ଆସନ୍ତାକାଲିଠୁ ଜୀବନ ଯାତ୍ରା ସ୍ୱଭାବିକ ହେବାକୁ ଯାଉଥିବା ବେଳେ ୫ଟି ଜିଲ୍ଲାରେ କଟକଣାକୁ କୋହଳ କରାଯିବ । କିଛି ରେଷ୍ଟୁରାଂଟ ଖୋଲା ରଖିବା ସହ ଯୁଗ୍ମ ଅଯୁଗ୍ମ ଫର୍ମୂଲାରେ ଘରୋଇ ଗାଡି ବି ଚଳାଚଳ କରିବ ।
Kanak News is now on WhatsApp
Join and get latest news updates delivered to you via WhatsApp
ସଂକ୍ରମଣ ସ୍ଥିତିକୁ ଆଖିରେ ରଖି କେରଳକୁ ୪ଟି ଜୋନରେ ଭାଗ କରି କ୍ରମାନ୍ୱୟରେ ତାଲାବନ୍ଦ ହଟାଇବା ପାଇଁ ରାଜ୍ୟ ସରକାର ଦେଇଥିବା ପ୍ରସ୍ତାବକୁ କେନ୍ଦ୍ର ସରକାର ଗ୍ରହଣ କରିଛନ୍ତି । କେରଳର ୧୪ଟି ଜିଲ୍ଲାକୁ ରେଡ ଜୋନ, ଅରେଞ୍ଜ-ଏ, ଅରେଞ୍ଜ-ବି ଏବଂ ଗ୍ରୀନ ଜୋନରେ ଭାଗ କରାଯାଇ, ତାଲାବନ୍ଦ କୋହଳ କରିବାକୁ ଯାଉଛନ୍ତି କେରଳ ସରକାର । ଆସନ୍ତାକାଲି କୋଟ୍ଟାୟାମ ଓ ଇଦୁକି ଜିଲ୍ଲାରେ ତାଲାବନ୍ଦ ହଟି ସ୍ୱାଭାବିକତା ଆସିବ । ଏହି ଦୁଇ ଜିଲ୍ଲାକୁ ଗ୍ରୀନ ଜୋନରେ ରଖାଯାଇଛି କାରଣ ସେଠାରେ ଏବେ କୌଣସି ଆକ୍ଟିଭ କେସ ନାହିଁ । କୋଟ୍ଟାୟାମ ଓ ଇଦୁକିରେ ସକାଳ ୭ରୁ ସନ୍ଧ୍ୟା ୭ଟା ଯାଏଁ ରେଷ୍ଟୁରାଂଟ ଖୋଲା ରହିବ । ତେବେ ସେଠାରେ ସାମାଜିକ ଦୂରତା ରକ୍ଷା କରିବା ସହ ସାନିଟାଇଜର ବ୍ୟବହାର କରିବାକୁ କଡା ନିର୍ଦ୍ଦେଶ ରହିଛି ।
ଏହାଛଡା ଘରୁ ବାହାରିଲେ ମାସ୍କ ପିନ୍ଧିବାକୁ ଲୋକଙ୍କୁ ପରାମର୍ଶ ଦିଆଯାଇଛି । ଚଷମା ଦୋକାନ, ସେଲୁନ, ମୋବାଇଲ ଫୋନ ଦୋକାନ, କମ୍ପୁଟର ଆଣ୍ଡ ଆସେସରିଜ, ଅଟୋ ୱାର୍କସପ, ବହି ଦୋକାନ ସପ୍ତାହକୁ ୨ ଥର ଖୋଲିବାକୁ ଅନୁମତି ମିଳିଛି । ସେହିପରି ଅରେଞ୍ଜ-ବିରେ ଥିବା ଥିରୁବନନ୍ତପୁରମ, ଆଲାପୁଝା, ଥ୍ରୀସୁର, ପାଲାକ୍କଡ ଏବଂ ୱାୟନାଡ ଜିଲ୍ଲାରେ ତାଲାବନ୍ଦ କଟକଣାକୁ କୋହଳ କରାଯିବ । ଅନ୍ୟପଟେ ଅରେଞ୍ଜ-ଏ ଜୋନରେ ଥିବା ଜିଲ୍ଲାଗୁଡିକରେ କଟକଣା ଅପ୍ରେଲ ୨୪ ତାରିଖରେ କୋହଳ କରାଯିବ ବୋଲି ନିଷ୍ପତି ମିଳିଛି ।