ଚୀନରେ କରୋନା, ତାଳଚେରରେ ପ୍ରଭାବ । ଏଫସିଆଇ ସାର କାରଖନାର ପୁନଃଉଦ୍ଧାର କାମରେ ବାଧା । ଆସୁନାହାନ୍ତି କର୍ମଚାରୀ
ଚୀନର ଇଞ୍ଜିନିୟରିଂ ସଂସ୍ଥା ହାତକୁ ନେଇଛି କାମ
କନକ ବ୍ୟୁରୋ: ଚୀନରେ କରୋନା ଆତଙ୍କ । ତାଳଚେରରେ ସାର କାରଖାନା ପ୍ରଭାବିତ । ତାଳଚେର ଏଫ୍ସିଆଇ ସାର କାରଖାନାର ପୁନଃଉଦ୍ଧାର କାମ ହାତକୁ ନେଇଥିଲା ଚୀନର ଉହାନ ସ୍ଥିତ ଏକ ଇଂଜିନିୟରିଂ ସଂସ୍ଥା । ଯାହାକୁ ନେଇ ଚୁକ୍ତି ମଧ୍ୟ ସ୍ୱାକ୍ଷର ହୋଇଛି । ୧୮ହଜାର କୋଟି ଟଙ୍କାରେ ନିର୍ମାଣ ହେବାକୁ ଥିବା ଏହି ସାର କାରଖାନାର ବେସିକ ଡିଜାଇନ୍ ଠାରୁ ଆରମ୍ଭ କରି ପ୍ରଡକ୍ସନ ପର୍ଯ୍ୟନ୍ତ ସମସ୍ତ କାମ ଚୀନ ଉହାନ ସ୍ଥିତ ଇଂଜିନିୟରିଂ ସଂସ୍ଥା କରିବ ବୋଲି ଚୁକ୍ତିରେ ସ୍ୱାକ୍ଷର ହୋଇଛି । ଏଥିପାଇଁ ଉହାନର ୭୦୦ କର୍ମାଚାରୀ ଆସିବାର ସ୍ଥିର ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ହେଲେ ଉହାନରେ କରୋନା ଭୂତାଣୁ କାରଣରୁ ସ୍ଥିତି ସଙ୍ଗୀନ ହେବା କାରଣରୁ ସେଠାକାର କର୍ମଚାରୀ ତାଲଚେର ସ୍ଥିତ ଏଫ୍ସିଆଇ ସାର କାରଖାନା ନିର୍ଦ୍ଧାରିତ ସମୟରେ ଆସି କାମରେ ଯୋଗ ଦେଇ ପାରି ନାହାଁନ୍ତି । ଫଳରେ ସାର କାରଖାନାର ପୁନଃଉଦ୍ଧାର କାମ ସଠିକ୍ ସମୟ ଭିତରେ ହୋଇପାରିବ କି ନାହିଁ, ସେ ନେଇ ଆଶଙ୍କା ଦେଖାଦେଇଛି ।
୨୦୨୩ ସୁଦ୍ଧା ଚାଇନିଜ୍ ଟେକ୍ନୋଲୋଜି ଜରିଆରେ ସାର କାରଖାନା କାର୍ଯ୍ୟକ୍ଷମ କରାଯିବା ନେଇ ଯୋଜନା କରାଯାଇଥିଲା । ସେପଟେ ଏଫସିଆଇ ପ୍ରୋଜେକ୍ଟ ଦାୟିତ୍ୱରେ ଥିବା କର୍ତୃପକ୍ଷ କହିଛନ୍ତି ବର୍ତମାନ ମାଟି ପରୀକ୍ଷଣ କରାଯାଉଛି । ସଠିକ୍ ସମୟରେ କାମକୁ ତ୍ୱରାନ୍ୱିତ କରାଯିବ ଏବଂ ଚୀନ କର୍ମଚାରୀ ସେଠାରେ ରହି ବେସିକ ଡିଜାଇନ କରିପାରିବେ ବୋଲି ସେ ମତ ଦେଇଛନ୍ତି ।