ରାଜ୍ୟର ବିଭିନ୍ନ ସ୍ଥାନରୁ ଆସିଲା କରୋନାର କରୁଣ ଚିତ୍ର । ଘରେ ଜାଗା ନଥିବାରୁ ଗଛ ମୂଳେ ସଂଗରୋଧରେ ରହିଲେ ଯୁବକ । କରୋନା ସନ୍ଦେହରେ ମୃତ୍ୟୁ ପାଇଁ ପାଖ ମାଡିଲେନି ସାହିପଡିଶା ।
କନକ ବ୍ୟୁରୋ: ମହାମାରୀର ଭୟ ଭିକରେ ମଣିଷ କେମିତି କଲବଲ ହେଉଛି, ଏ କଥା କହିବାର ଆବଶ୍ୟକତା ନାହିଁ । କାରଣ ପ୍ରତିଦିନ କୁଢକୁଢ ଶବ ମଶାଣିକୁ ଯାଉଛି, ଶିଶୁ-ଯୁବକ-ବୟସ୍କ ପ୍ରାୟ ସମସ୍ତେ କରୋନା ଆକ୍ରାନ୍ତ ହେଉଛନ୍ତି । ଆଉ ଟିଭି ପରଦାରେ ଆପଣମାନେ ଦେଖୁଥିବା ଏହି ତିନୋଟି ଚିତ୍ର, ଆତଙ୍କସୃଷ୍ଟି କରିଥିବା କରୋନାର କରୁଣ କାହାଣୀ କହୁଛି ।
Kanak News is now on WhatsApp
Join and get latest news updates delivered to you via WhatsApp
ଗଛ ତଳେ ସଂଗରୋଧ
କଳାହାଣ୍ଡି କୋକସରା ବ୍ଲକ ଛିଲପାମାଲ ଗାଁର କ୍ଷୀରୋଦ ନାୟକ କରୋନା ସଂକ୍ରମିତ ହେବା ପରେ ୩ ଦିନ ଧରି ଏହି ଗଛମୂଳେ ରହିଛନ୍ତି । ଘରେ ସଂଗରୋଧରେ ରହିବାର ସୁବିଧା ନାହିଁ, ତେଣୁ, ପରିବାର ଲୋକଙ୍କୁ ସଂକ୍ରମଣରୁ ସୁରକ୍ଷା ଦେବା ପାଇଁ ଗଛମୂଳେ ଆଶ୍ରୟ ନେଇଥିଲେ ଆକ୍ରାନ୍ତ । ଏ ଖବର ଜଣାପଡିବାର ପରେ ସ୍ଥାନୀୟ ପ୍ରଶାସନ କ୍ଷୀରୋଦଙ୍କୁ ଉଦ୍ଧାର କରି ପର୍ଲା କୋଭିଡ ହସ୍ପିଟାଲକୁ ନେଇଛି ।
ପଦ୍ମପୁର
ବରଗଡ ଜିଲ୍ଲା ପଦ୍ମପୁର ଉପଖଣ୍ଡ ଖୁର୍ସାପାଲି ଗାଁରୁ ଆସିଥିବା ଏହି ଚିତ୍ର, ଭୂତାଣୁକୁ ନେଇ ଲୋକଙ୍କ ମନରେ ଥିବା ଭୟକୁ ଦର୍ଶାଉଛି । ମୃତ ପୁନଉ ମାଝୀଙ୍କୁ କରୋନା ହୋଇଥିଲା କି ନାହିଁ ସେ କଥା କାହାକୁ ଜଣାନାହିଁ, କିନ୍ତୁ କରୋନା ସଂକ୍ରମଣ ଭୟରେ ଶବର ପାଖର ମାଡିଲେ ନାହିଁ ସାହିପଡିଶା । ପ୍ରାୟ ୫ ଘଂଟା ଧରି ଶବ ପଡିରହିବା ପରେ କାନ୍ଧରେ ବୋହି ଶ୍ମଶାନକୁ ନେଲେ ସଂପର୍କୀୟ ।
ହିଞ୍ଜିଳିକାଟୁ
କରୋନା କାଳରେ ମାନବିକତା ମରି ଯାଉଥିବା ବେଳେ, ଗଞ୍ଜାମ ହିଞ୍ଜିଳିକାଟୁରେ ଅଫିସରଙ୍କ ମହାନତା ଦେଖିବାକୁ ମିଳିଛି । ବିଡିଓ, ପୌର ନିର୍ବାହୀ ଅଧିକାରୀ ଓ ତହସିଲଦାର ପିପିଇ କିଟ ପିନ୍ଧି କରୋନା ଆକ୍ରାନ୍ତଙ୍କ ମୃତଦେହ ସକ୍ରାର କରିଛନ୍ତି । ଡି. ଗୋବିନ୍ଦା ନାମକ ଯୁବକଙ୍କ କରୋନା ସଂକ୍ରମିତ ହୋଇ ପ୍ରାଣ ହରାଇବା ପରେ ଶବକୁ ସଂପର୍କୀୟ ଓ ସାଇପଡିଶା ଛୁଇଁନଥିଲେ । ପ୍ରାୟ ୧୦ ଘଂଟା ପରେ ଏହି ୩ ପ୍ରଶାସନିକ ଅଧିକାରୀ, କିଛି ସ୍ୱେଚ୍ଛାସେବୀଙ୍କ ସହାୟତାରେ ଶବ ସକ୍ରାର କରାଇଛନ୍ତି ।