ବୁହାନରୁ ବ୍ୟାପୁଛି କରୋନା ଭୂତାଣୁ । ଚୀନରୁ ୨ ଭାରତୀୟ ଭାଇରସ ନେଇ ଫେରିଥିବା ଆଶଙ୍କା । ସାରା ଦେଶରେ ଛନକା

କନକ ବ୍ୟୁରୋ: ଚୀନରୁ ବ୍ୟାପିଥିବା କରୋନା ଭାଇରସ ସାରା ବିଶ୍ୱରେ କୋକୁଆ ଭୟ ସୃଷ୍ଟି କରିଛି । ବୁହାନ ସହରରୁ ଏହା ଦେଶରୁ ଦେଶକୁ ଡେଇଁବାରେ ଲାଗିଛି । ଏହାରି ଭିତରେ ଚୀନରୁ ଫେରିଥିବା ଦୁଇଜଣ ଭାରତୀୟ, ସାଙ୍ଗରେ ଏହି ମାରାତ୍ମକ ଭୂତାଣୁ ନେଇ ଆସିଥିବା ଆଶଙ୍କା କରାଯାଉଛି । ତେଣୁ ଏମାନଙ୍କୁ ମୁମ୍ବାଇ ଚିଂଚପୋକଲିରେ ଥିବା କସ୍ତୁରବା ହସ୍ପିଟାଲରେ ସ୍ୱତନ୍ତ୍ର ନୀରିକ୍ଷଣରେ ରଖାଯାଇଛି । ଏନେଇ ସ୍ପଷ୍ଟ କରିଛନ୍ତି ବିଏମସିର କାର୍ଯ୍ୟନିର୍ବାହୀ ସ୍ୱାସ୍ଥ୍ୟ ଅଧିକାରୀ ଡାକ୍ତର ପଦ୍ମଜା କେଶକର । ସେ କହିଛନ୍ତି- ‘କରୋନା ଭାଇରସରେ ଆକ୍ରାନ୍ତଙ୍କ ପାଇଁ ବ୍ରିହାନ ମୁମ୍ବାଇ ମ୍ୟୁନିସିପାଲ କର୍ପୋରେସନ ପକ୍ଷରୁ କସ୍ତୁରବା ହସ୍ପିଟାଲରେ ଏକ ସ୍ୱତନ୍ତ୍ର ୱାର୍ଡ କରାଯାଇଛି । ଯେଉଁମାନଙ୍କ ଠାରେ କରୋନା ଭାଇରସ ଥିବା ନେଇ ସନ୍ଦେହ ହେବ ସେମାନଙ୍କୁ ଏଠାରେ ବିଶେଷଜ୍ଞ ଡାକ୍ତରଙ୍କ ସ୍ୱତନ୍ତ୍ର ନୀରିକ୍ଷଣରେ ରଖାଯିବ ।’

ଚୀନର ବୁହାନ ସହରରୁ ଆରମ୍ଭ ହୋଇଥିବା ଏହି ମାରାତ୍ମକ ଭାଇରସ ଏବେ ବିଶ୍ୱର ଅନ୍ୟାନ୍ୟ ସହରକୁ ମଧ୍ୟ ବ୍ୟାପିବାରେ ଲାଗିଛି । ସି-ଫୁଡ ଖାଇବା ଫଳରେ ଏହି ଭୂତାଣୁ ବ୍ୟାପୁଥିବାବେଳେ ଏବେ ରୋଗୀଙ୍କଠାରୁ ଅନ୍ୟମାନଙ୍କୁ ମଧ୍ୟ ସଂକ୍ରମିତ ହେଉଛି ।

କରୋନା ଭାଇରସ ଆକ୍ରାନ୍ତଙ୍କ ଠାରେ ଥଣ୍ଡା, କାଶ, ଗଳା ଦରଜ ଓ ଜ୍ୱର ଭଳି ଲକ୍ଷଣ ଦେଖାଯାଉଛି । ହେଲେ ଦୀର୍ଘଦିନ ଧରି ଜ୍ୱର ଭଲ ନହେବା ସହିତ ଏହା ନିମୋନିଆ ଭଳି ସାଂଘାତିକ ସ୍ୱାସ୍ଥ୍ୟ ସଂକଟ ମଧ୍ୟ ସୃଷ୍ଟି କରୁଛି । ଏପରିକି ବୃକକ ଜନିତ ଜଟିଳତା କାରଣରୁ ରୋଗୀର ଜୀବନ ଚାଲିଯିବା ଆଶଙ୍କା ରହିଛି । ତେଣୁ ରୋଗୀଙ୍କୁ ସ୍ୱତନ୍ତ୍ର ନୀରିକ୍ଷଣରେ ରଖିବା ଜରୁରୀ ହୋଇପଡିଛି । ବାୟୁବାହିତ ଭୂତାଣୁ ହୋଇଥିବାରୁ ରୋଗୀଙ୍କୁ ଅନ୍ୟମାନଙ୍କ ଠାରୁ ଦୂରେଇ ରଖିବା ଆବଶ୍ୟକ । ରୋଗୀ ଛିଙ୍କିଲେ କିମ୍ବା କାଶିଲେ ଏହା ସଂସ୍ପର୍ଶରେ ଆସୁଥିବା ବ୍ୟକ୍ତିଙ୍କୁ ମଧ୍ୟ ସଂକ୍ରମଣ ହୋଇପାରେ । ସାଉଦି ଆରବରେ କାର୍ଯ୍ୟରତ ଥିବା କେରଳର ଜଣେ ନର୍ସ କରୋନା ଭାଇରସରେ ଆକ୍ରାନ୍ତ ହୋଇଥିବା ଜଣାପଡିଛି ।

ସାଉଦି ଆରବର ଅଲ ହାୟତ ନ୍ୟାସନାଲ ହସ୍ପିଟାଲରେ କାମ କରୁଥିବା ଏହି ନର୍ସ ଜଣେ ରୋଗୀଙ୍କୁ ସେବା କଲାବେଳେ କରୋନା ଭାଇରସ ଆକ୍ରାନ୍ତ ହୋଇଥିବା ଜଣାପଡିଛି । ଫିଲିପାଇନ୍ସର ଜଣେ ବ୍ୟକ୍ତିଙ୍କ ସେବା କରି ସେ ଭାଇରସ ଆକ୍ରାନ୍ତ ହୋଇଛନ୍ତି । ଏହାପରେ ଭାରତର ଅନ୍ୟ ୨୦ଜଣ ନର୍ସଙ୍କୁ ମଧ୍ୟ ଅନ୍ୟଏକ ହସ୍ପିଟାଲରେ ସ୍ୱତନ୍ତ୍ର ଡାକ୍ତରୀ ନୀରିକ୍ଷଣରେ ରଖାଯାଇଥିବା ଜଣାପଡିଛି । ୧୦୦ ଜଣ ଭାରତୀୟ ନର୍ସଙ୍କ ସ୍ୱାସ୍ଥ୍ୟ ପରୀକ୍ଷା ମଧ୍ୟ କରାଯାଇଛି । ଏହି ଭୟାବହ ଭାଇରସର ମୁକାବିଲା ପାଇଁ ମୁଖ୍ୟମନ୍ତ୍ରୀ ପନିରାୟୀ ବିଜୟନ କେନ୍ଦ୍ରକୁ ଚିଠି ଲେଖି ସହାୟତା ମାଗିଛନ୍ତି ।

ଚୀନରେ କାମ କରୁଥିବା ଭାରତୀୟମାନେ ଭାଇରସ ଆକ୍ରାନ୍ତ ହୋଇଥିବା ଆଶଙ୍କାରେ ସ୍ୱତନ୍ତ୍ର ପଦକ୍ଷେପ ମାନ ନିଆଯାଉଛି । ବନ୍ଦର ଓ ବିମାନବନ୍ଦର ଦେଇ ଆସୁଥିବା ଭାରତୀୟଙ୍କୁ ଥର୍ମାଲ ସ୍କ୍ରିନିଂ କରାଯାଉଛି । ଦିଲ୍ଲୀ, ମୁମ୍ବାଇ, କୋଲକାତା, ଚେନ୍ନାଇ, କୋଚିନ ବିମାନ ବନ୍ଦରରେ ଏହାକୁ କଡାକଡି କରାଯାଇଛି ।