କନକ ବ୍ୟୁରୋ: ଆଭିମୁଖ୍ୟ ବଦଳାଇଲେ ଆମେରିକା ରାଷ୍ଟ୍ରପତି । ହାଇଡ୍ରୋକ୍ସି କ୍ଲୋରୋକ୍ୱିନ ଯୋଗାଣକୁ ନେଇ ଉତକ୍ଷିପ୍ତ ହୋଇଉଠିଥିବା ଡୋନାଲ୍ଡ ଟ୍ରମ୍ପ ଏବେ ପ୍ରଧାନମନ୍ତ୍ରୀ ମୋଦୀଙ୍କୁୁ ପ୍ରଶଂସାରେ ପୋତି ପକାଇଛନ୍ତି । ଟ୍ରମ୍ପ କହିଛନ୍ତି, ପ୍ରଧାନମନ୍ତ୍ରୀ ମୋଦୀ ଜଣେ ମହାନ୍ ନେତା । ଆମେରିକା ପ୍ରାୟ ୩ଲକ୍ଷ ହାଇଡ୍ରୋକ୍ସି କ୍ଲୋରୋକ୍ୱିନ ଡୋଜ୍ ଆମଦାନୀ କରିବ । ଯେଉଁଥିରେ ଅଧିକାଂଶ ଭାରତରୁ ଆସିବ ବୋଲି ସୂଚନା ଦେଇଛି ଆମେରିକା ।
Kanak News is now on WhatsApp
Join and get latest news updates delivered to you via WhatsApp
ଆମେରିକୀୟ ନ୍ୟୁଜ୍ ଚ୍ୟାନେଲ ଫକ୍ସ ନ୍ୟୁଜ୍କୁ ଦେଇଥିବା ପ୍ରତିକ୍ରିୟାରେ ଡୋନାଲ୍ଡ ଟ୍ରମ୍ପ ସମ୍ପୂର୍ଣ୍ଣ ବିବାଦ ଉପରେ ବୟାନ ଦେଇଛନ୍ତି । ଦେଶର ଚାହିଦା ଅନୁଯାୟୀ ପ୍ରଥମେ ହାଇଡ୍ରୋକ୍ସି କ୍ଲୋରୋକ୍ୱିନ ଦେବା ପାଇଁ ଅମଙ୍ଗ ହେଉଥିଲା ଭାରତ । ଯାହାକି ସମ୍ପୂର୍ଣ୍ଣ ଭାବେ ଉଚିତ ଥିଲା ବୋଲି କହିଛନ୍ତି ଆମେରିକା ରାଷ୍ଟ୍ରପତି ।
ମାର୍ଚ୍ଚ ୨୫ତାରିଖରେ ହାଇଡ୍ରୋକ୍ସି କ୍ଲୋରୋକ୍ୱିନ ରପ୍ତାନୀ ଉପରେ ଭାରତରେ କଟକଣା ଲଗାଯାଇଥିଲା । ଯାହାକୁ ପରେ ହଟାଇ ଦିଆଯାଇଛି । ହାଇଡ୍ରୋକ୍ସି କ୍ଲୋରୋକ୍ୱିନ ଦ୍ୱାରା କରୋନା ଭୂତାଣୁ ଆକ୍ରାନ୍ତଙ୍କ ଚିକିତ୍ସା କରାଯାଉଥିବାରୁ ପୂର୍ବରୁ ଏହି ଔଷଧ ଯୋଗାଇବା ପାଇଁ ଭାରତକୁ ନିବେଦନ କରିଥିଲା ଆମେରିକା । ଟ୍ରମ୍ପ କହିଛନ୍ତି, ଭାରତରୁ ଅଧିକ ପରିମାଣର ଔଷଧ ଆମଦାନୀ ନେଇ ପ୍ରଧାନମନ୍ତ୍ରୀ ମୋଦିଙ୍କ ସହ ଆଲୋଚନା ହୋଇସାରିଛି ।
ଏହା ପୂର୍ବରୁ ଆମେରିକାକୁ ଭାରତ ହାଇଡ୍ରୋକ୍ସି କ୍ଲୋରୋକ୍ୱିନ ଯୋଗାଣ ନକଲେ ଏହାର ମୂଲ୍ୟ ଦେବାକୁ ପଡିବ ବୋଲି ଧମକ ଦେଇଥିଲେ ରାଷ୍ଟ୍ରପତି ଟ୍ରମ୍ପ । ଏବେ କିନ୍ତୁ ଔଷଧ ରପ୍ତାନୀ ପାଇଁ ସରକାର ଅନୁମତି ଦେବା ପରେ ନିଜର ଆଭିମୁଖ୍ୟ ବଦଳାଇ ଦେଇଛନ୍ତି ଆମେରିକା ରାଷ୍ଟ୍ରପତି । ବିଶ୍ୱର ସବୁଠୁ ଶକ୍ତିଶାଳୀ ରାଷ୍ଟ୍ର ଆମେରିକା ଏବେ କରୋନା ଭୂତାଣୁ ସହ ସବୁଠୁ ବଡ ଲଢେଇ ଲଢୁଛି । ଆମେରିକାରେ କରୋନା ଆକ୍ରାନ୍ତଙ୍କ ସଂଖ୍ୟା ୪ଲକ୍ଷ ଟପିଥିବା ବେଳେ ମୃତକଙ୍କ ସଂଖ୍ୟା ୧୨ହଜାର ୮ଶହ ଟପିଛି ।