କରୋନା ମୃତ୍ୟୁର ଦୁଇଟି ହୃଦୟ ବିଦାରକ ଚିତ୍ର : ସଂକ୍ରମଣ ଭୟରେ ଆସିଲେନି ସାହିପଡିଶା; ଶଗଡ ଓ ସାଇକେଲ ବୁହାହେଲା ଶବ
କନକ ବ୍ୟୁରୋ : କୋକେଇକୁ ମିଳିନି କାନ୍ଧ । ଶଗଡରେ ବୁହା ହେଲା ଶବ । ଦେବଗଡ ଜିଲ୍ଲାରେ ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି । ଜଣେ କରୋନା ଆକ୍ରାନ୍ତ ବୃଦ୍ଧଙ୍କ ମୃତ୍ୟୁ ପରେ ସଂକ୍ରମଣ ଭୟରେ ପାଖ ମାଡିନଥିଲେ ସାହି ପଡିଶା । ଫଳରେ ସଫେଇ କର୍ମଚାରୀମାନେ ତାଙ୍କୁ ଏକ ଶଗଡରେ ଶ୍ମଶାନକୁ ନେଇଥିଲେ । ତିଲେଇବଣି ବ୍ଲକ ସୁଗୁଡା ଗାଁର ଚନ୍ଦ୍ର ଶେଖବର ସାହୁ, କରୋନା ଆକ୍ରାନ୍ତ ହେବାପରେ ଡାକ୍ତରଙ୍କ ପରାମର୍ଶରେ କିଛିଦିନ ହେଲା ସଂଗରୋଧରେ ରହି ଚିକିତ୍ସିତ ହେଉଥିଲେ ।
Kanak News is now on WhatsApp
Join and get latest news updates delivered to you via WhatsApp
ଗତରାତିରେ ତାଙ୍କ ସ୍ୱାସ୍ଥ୍ୟରେ ଅବନତୀ ହେବାରୁ ପରିବାର ଲୋକେ ତାଙ୍କ ଚିକିତ୍ସା ପାଇଁ କୋଭିଡ ସହାୟତା କେନ୍ଦ୍ରକୁ ସୂଚନା ଦେଇଥିଲେ । କୋଭିଡ କର୍ମଚାରୀ ପହଂଚିଲା ବେଳକୁ ତାଙ୍କର ମୃତ୍ୟୁ ହୋଇସାରିଥିଲା । ସଂକ୍ରମଣ ଭୟରେ ଗାଁ ଲୋକ ପାଖ ମାଡିନଥିବାବେଳେ । ପୌର ପ୍ରଶାସନକୁ ଖବର ଦେବାରୁ ୪ ଜଣ ସଫେଇ କର୍ମଚାରୀ ଆସି ତାଙ୍କୁ ଏକ ଖୋଲା ଶଗଡ ଗାଡିରେ ଶ୍ମଶାନକୁ ନେଇଥିବା ଦେଖିବାକୁ ମିଳିଥିଲା ।
ବାପାର ଶବକୁ ସାଇକେଲରେ ବୋହିଲା ପୁଅ । କରୋନା ଭୟରେ ବନ୍ଧୁ, ସାହି ପଡିଶା ଶବକୁ କାନ୍ଧ ଦେବାପାଇଁ ନ ଆସିବାରୁ ବାଧ୍ୟହୋଇ ପୁଅ, ବାପାର ଶବକୁ ସାଇକେଲରେ ବୋହି ନେଇ ସକ୍ରାର କରିଛି । ଘଟଣାଟି ଘଟିଛି ବଲାଙ୍ଗୀର ଜିଲ୍ଲା ଖପ୍ରାଖୋଲ ଥାନା ଭାଲୁଡୁଙ୍ଗି ଗାଁରେ । ଗାଁର ଅଯୋଧ୍ୟା ସାହୁ କିଛି ଦିନ ତଳେ କରୋନାରେ ଆକ୍ରାନ୍ତ ଥିବାବେଳେ ଗତକାଲି ତାଙ୍କର ମୃତ୍ୟୁ ହୋଇଛି । ସେ ଆକ୍ରାନ୍ତ ଚିହ୍ନଟ ହେବା ପରେ ଘରେ ସଙ୍ଗରୋଧରେ ରହି ଡାକ୍ତରଙ୍କ ପରାମର୍ଶରେ ଚିକିତ୍ସା କରାଉଥିଲେ ।
ତେବେ ଗତକାଲି ତାଙ୍କର ମୃତ୍ୟୁ ପରେ କରୋନା ସଂକ୍ରମଣ ଭୟରେ ସାହି ପଡିଶାରୁ କେହି ବି ଶବକୁ କାନ୍ଧ ଦେବା ପାଇଁ ଆସିନଥିଲେ । ଶେଷରେ ପୁଅ ବାଧ୍ୟ ହୋଇ ବାପାର ଶବକୁ ସାଇକେଲରେ ବୋହିନେଇ ସକ୍ରାର କରିଥିଲେ । କିନ୍ତୁ ଶବ ନେବା ପ୍ରଶାସନର କୌଣସି ସହାୟତା ଲୋଡିନଥିଲେ । ଆମ୍ବୁଲାନ୍ସ କିମ୍ବା ଅନ୍ୟ କୌଣସି ସରକାରୀ ଗାଡି ପାଇଁ ଅନୁରୋଧ କରିନଥିଲେ ବୋଲି ଜଣାପଡିଛି । ଏବେ ଏହି କୋଭିଡ ମୃତ୍ୟୁ ସମ୍ପର୍କରେ ଓ ବାପାର ଶବକୁ ପୁଅ ସାଇକେଲରେ ଶ୍ମଶାନକୁ ନେବା ପ୍ରସଙ୍ଗରେ ପ୍ରଶାସନର ପ୍ରତିକ୍ର୍ରିୟାକୁ ଅପେକ୍ଷା କରାଯାଇଛି ।