ରାଜ୍ୟରେ ଖସୁଛି କରୋନା ମିଟର, କମୁଛି ସଂକ୍ରମଣ । ଆଜି ୧୧.୨୬% ରେ ପହଞ୍ଚିଲା ରାଜ୍ୟର ସଂକ୍ରମଣ ହାର । ୭ଟି ଜିଲ୍ଲାରେ ଦୁଇ ଅଙ୍କ ତଳେ ସଂକ୍ରମିତଙ୍କ ସଂଖ୍ୟା ।
କନକ ବ୍ୟୁରୋ: କରୋନା ଯନ୍ତ୍ରଣା କମିନାହିଁ କିନ୍ତୁ ଆଶା ଦେଖାଦେଇଛି ଯେ ଆଗକୁ ସଂଖ୍ୟା କମିବ । ଆଜି ସଂକ୍ରମଣ ହାର ୧୧.୨୬ ପ୍ରତିଶତ ରହିଛି । ଅର୍ଥାତ୍ ରାଜ୍ୟରେ ୧୦୦ ଜଣଙ୍କ ପରୀକ୍ଷାରେ ୧୧ ଜଣ ପଜିଟିଭ୍ ଆସୁଛନ୍ତି । ମେ ମାସରେ ପଜିଟିଭିଟି ହାର ବା ସଂକ୍ରମଣ ହାର ୨୬ ପ୍ରତିଶତକୁ ପହଁଚି ଯାଇଥିଲ।। ଏବେ ଜୁନ୍ ମାସ ଆରମ୍ଭରେ ଏହା ୧୧.୨୬ ପ୍ରତିଶତକୁ ଖସି ଆସିଛି।
Kanak News is now on WhatsApp
Join and get latest news updates delivered to you via WhatsApp
ମେ’ ମାସରେ ଓଡ଼ିଶାରେ କରୋନା ଦ୍ୱିତୀୟ ଲହରର ବଡ଼ ପ୍ରଭାବ ଦେଖିବାକୁ ମିଳିଥିଲା । ମେ’ ମାସରେ ମୋଟ ୩,୨୦,୮୦୩ ସଂକ୍ରମିତ ଚିହ୍ନଟ ହୋଇଥିଲେ । ମେ’ ମାସରେ ଦୈନିକ ହାରାହାରି ୧୦,୩୪୮ ପଜିଟିଭ୍ ମାମଲା ଆସିଥିଲା । ଆଉ ଏହି ଗୋଟିଏ ମାସରେ ୭୧୧ ଜଣଙ୍କ ମୃତ୍ୟୁ ହୋଇଥିଲା । ସ୍ୱାସ୍ଥ୍ର୍ୟ ବିଭାଗ ହିସାବ ଅନୁଯାୟୀ ମେ’ ମାସରେ ରାଜ୍ୟରେ ହାରାହାରି ୨୨.୯ ଜଣଙ୍କ ମୃତ୍ୟୁ ହୋଇଥିଲା ।
- ରାଜ୍ୟରେ ଖସୁଛି କରୋନା ମିଟର
- ଧୀରେ ଧୀରେ କମୁଛି ସଂକ୍ରମଣ ହାର
ମେ’ ଶେଷ ସପ୍ତାହ ଆରମ୍ଭରେ ରାଜ୍ୟରେ ଦ୍ୱିତୀୟ ଲହରର ସବୁଠୁ ଅଧିକ ପଜିଟିଭ୍ ମାମଲା ସାମନାକୁ ଆସିଥିଲା । ମେ’ ୨୩ ତାରିଖରେ ଚିହ୍ନଟ ହୋଇଥିଲେ ୧୨,୮୫୨ ଆକ୍ରାନ୍ତ । ଏହା ପରେ ଧୀରେ ଧୀରେ ତଳକୁ ଖସିଥିଲା ସଂକ୍ରମଣ ସଂଖ୍ୟା । ଜୁନ ମାସ ଆରମ୍ଭରେ ସଂକ୍ରମଣ ହାର କମିବାରେ ଲାଗିଥିଲା । ଜୁନ ୧ ତାରିଖରେ ସଂକ୍ରମଣ ହାର ୧୪.୦୨ ପ୍ରତିଶତ ହୋଇଥିବା ବେଳେ ଜୁନ ୨ ଓ ୩ ତାରିଖରେ ୧୨.୫୯ ପ୍ରତିଶତ ରହିଥିଲା ସଂକ୍ରମଣ ହାର । ସ୍ୱାସ୍ଥ୍ୟ ବିଭାଗର ସୂଚନା ଅନୁସାରେ ଗତ ୨୪ ଘଂଟାରେ ୬୮ ହଜାର ୬୦୪ କରୋନା ପରୀକ୍ଷା ହୋଇଥିବା ବେଳେ ୭ ହଜାର ୭୨୯ ଆକ୍ରାନ୍ତ ଚିହ୍ନଟ ହୋଇଛନ୍ତି । ଆଉ ସଂକ୍ରମଣ ହାର ରହିଛି ୧୧.୨୬ ପ୍ରତିଶତ । ଆଉ ଏହି ୪ ଦିନରେ ୧୫୮ ଜଣଙ୍କ ମୃତ୍ୟୁ ହୋଇଛି ।
ଓଡ଼ିଶା କରୋନା ମିଟର
ତାରିଖ ଟେଷ୍ଟ ଆକ୍ରାନ୍ତ ସଂକ୍ରମଣ ହାର ମୃ୍ତ୍ୟୁ
ଜୁନ ୧ ୬୨,୨୯୩ ୮,୭୩୫ ୧୪.୦୨% ୩୭
ଜୁନ ୨ ୬୬,୬୮୩ ୮,୩୯୯ ୧୨.୫୯% ୪୦
ଜୁନ ୩ ୭୦,୧୭୮ ୮,୮୩୯ ୧୨.୫୯% ୪୨
ଜୁନ ୪ ୬୮,୬୦୪ ୭,୭୨୯ ୧୧.୨୬% ୩୯
ସେପଟେ ଦେଶରେ ପୁଣି ତଳମୁହାଁ ହୋଇଛି କରୋନା ଗ୍ରାଫ୍ । ଗତ ୨୪ ଘଂଟାରେ ଦେଶରେ ୧,୩୨,୩୬୪ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ସଂକ୍ରମଣ ହାର ୬.୩୮ ପ୍ରତିଶତକୁ ଖସିଆସିଛି ।