କନକ ବ୍ୟୁରୋ: ସାରା ଦେଶ କରୁଛି କରୋନା ମୁକାବିଲା । ସଂକ୍ରମଣରୁ ଦୂରେଇ ରଖିବାକୁ ପାଇଁ ନୂଆ ନୂଆ ନିଷ୍ପତି ଦେଉଛନ୍ତି କେନ୍ଦ୍ର ସରକାର । ଦେଶରେ କରୋନା ଭାଇରସ ସଂକ୍ରମଣକୁ ରୋକିବାକୁ କେନ୍ଦ୍ର ସରକାର ୨୧ ଦିନ ପାଇଁ ଲକଡାଉନ ଘୋଷଣା ପରେ ଏହାକୁ ଦୃଷ୍ଟିରେ ରଖି ସର୍ବଭାରତୀୟ ପରୀକ୍ଷା ଜେଇଇ(ମେନ) ଓ ଏନଇଇଟି (ୟୁଜି)କୁ ମେ ଶେଷ ସପ୍ତାହ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି । କେନ୍ଦ୍ର ମାନବ ସମ୍ବଳ ବିକାଶ ମନ୍ତ୍ରୀ ରମେଶ ପୋଖରିୟାଲ ଟ୍ୱିଟ କରି ଏ ସଂପର୍କରେ ସୂଚନା ଦେଇଛନ୍ତି ।

Advertisment

ଏହି ଟ୍ୱିଟରେ ସେ କହିଛନ୍ତି ଯେ ଏସବୁ ପରୀକ୍ଷା ଦେବା ପାଇଁ ପିଲା ଓ ଅଭିଭାବକମାନଙ୍କୁ ବିଭିନ୍ନ ପରୀକ୍ଷାକେନ୍ଦ୍ରକୁ ଯିବାକୁ ପଡ଼ିଥାଏ । ବର୍ତ୍ତମାନ ପରିସ୍ଥିତିରେ ପରୀକ୍ଷା ଆୟୋଜନ କରିଥିଲେ ସେମାନେ ସମସ୍ୟାର ସମ୍ମୁଖୀନ ହୋଇଥାନ୍ତେ । ଏହାକୁ ଦୃଷ୍ଟିରେ ରଖି ପରୀକ୍ଷାକୁ ଘୁଞ୍ଚାଇବାକୁ ଜାତୀୟ ପରୀକ୍ଷା ସଂସ୍ଥାକୁ ନିର୍ଦ୍ଦେଶ ଦିଆଯାଇଛି ।

ସୂଚନାଯୋଗ୍ୟ ଯେ, ଜେଇଇ (ମେନ) ପରୀକ୍ଷା ଏପ୍ରିଲ ମାସ ୫ ତାରିଖରେ ହେବାକୁ ଥିବାବେଳେ ମେଡିକାଲ ପ୍ରବେଶିକା ପରୀକ୍ଷା ଏନଇଇଟି ପରୀକ୍ଷା ମେ ୩ ତାରିଖରେ ହେବାର ଥିଲା । ଭାରତରେ କରୋନା ଭାଇରସ ସଂକ୍ରମଣକୁ ରୋକିବା ଲକ୍ଷ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତ ମଙ୍ଗଳବାରଦିନ ୨୧ ଦିନିଆ ଲକଡାଉନ ଘୋଷଣା କରିଥିଲେ । ତେବେ ଏହି ସମୟରେ ଅତ୍ୟାବଶ୍ୟକ ସେବା ଜାରି ରହିବ ।