ଦ୍ରୁତ କରୋନା ସଂକ୍ରମଣ ବଢାଇଲା ଦ୍ୱିତୀୟ ଲହରି ଭୟ : ଶୀଘ୍ର ଟିକାକରଣ ପାଇଁ ୫ରାଜ୍ୟକୁ ଚିଠି ଲେଖିଲେ ସ୍ୱାସ୍ଥ୍ୟମନ୍ତ୍ରାଳୟ ସଚିବ
କହିଲେ ୫ରାଜ୍ୟର ୧୪ ଜିଲ୍ଲାରେ ସ୍ଥିତି ହେଉଛି ଗମ୍ଭୀର; ସ୍ୱାସ୍ଥ୍ୟକର୍ମୀ, ଆଗଧାଡିର କୋଭିଡ ଯୋଦ୍ଧାଙ୍କୁ କମ ସମୟ ଭିତରେ ଟିକା ଦେବାକୁ ନିର୍ଦ୍ଦେଶ
କନକ ବ୍ୟୁରୋ : ଦେଶରେ ୫ଟି ରାଜ୍ୟରେ ପଜିଟିଭ ମାମଲା ବୃଦ୍ଧି ପାଇବା ପରେ କରୋନାର ଦ୍ୱିତୀୟ ଲହରି ଭୟ ଘାରିଛି । ଏନେଇ କେନ୍ଦ୍ର ସରକାର ୫ଟି ରାଜ୍ୟକୁ ଶୀଘ୍ର ଟିକାକରଣ କରିବାକୁ ନିର୍ଦ୍ଦେଶ ଦେଇଛନ୍ତି । କେନ୍ଦ୍ର ସ୍ୱାସ୍ଥ୍ୟମନ୍ତ୍ରାଳୟ ମଙ୍ଗଳବାର ମହାରାଷ୍ଟ୍ର, ମଧ୍ୟପ୍ରଦେଶ, ପଂଜାବ, ଛତିଶଗଡ ଓ ଜାମ୍ମୁକାଶ୍ମୀର ସରକାରଙ୍କୁ ସ୍ୱାସ୍ଥ୍ୟକର୍ମୀ ଓ ସମ୍ମୁଖ କୋଭିଡ ଯୋଦ୍ଧାଙ୍କୁ ଶୀଘ୍ର ଟିକାକରଣ କରିବାକୁ ଚିଠି ଲେଖିିଛନ୍ତି । ଏଥିସହ ୫ରାଜ୍ୟର ୧୪ ଜିଲ୍ଲାରେ ଦ୍ରୁତ ସଂକ୍ରମଣ ହେଉଥିବାରୁ ଜିଲ୍ଲା ପ୍ରଶାସନକୁ ଅଧିକରୁ ଅଧିକ ହେଲଥ ୱାର୍କର, ଫ୍ରଂଟ କୋଭିଡ ୱାରିଅରଙ୍କୁ ଶୀଘ୍ର ଟିକା ଦେବା ପାଇଁ ନିର୍ଦ୍ଦେଶ ଦେବାକୁ ରାଜ୍ୟ ସରକାରଙ୍କୁ କହିଛନ୍ତି । ଦ୍ରୁତ ସଂକ୍ରମଣ ଓ ଦୈନିକ ପଜିଟିଭ ମାମଲା ଚିହ୍ନଟ ଜିଲ୍ଲାଗୁଡିକରେ ସ୍ୱାସ୍ଥ୍ୟକର୍ମୀ ଓ କୋଭିଡ ଯୋଦ୍ଧାଙ୍କୁ ଖୁବ କମ ସମୟ ଭିତରେ କୋଭିଡ ଟିକା ଦେବାକୁ ସ୍ୱାସ୍ଥ୍ୟମନ୍ତ୍ରାଳୟ ଲେଖିଥିବା ଚିଠିରେ ନିର୍ଦ୍ଦେଶ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ମହାରାଷ୍ଟ୍ର ସରକାରଙ୍କୁ ସ୍ୱାସ୍ଥ୍ୟମନ୍ତ୍ରାଳୟ ସଚିବ ମନୋହର ଅଗ୍ନାନି ଚିଠି ଲେଖି କହିଛନ୍ତି, ଗତ କିଛି ଦିନ ଭିତରେ ମହାରାଷ୍ଟ୍ରର ୬ଟି ଜିଲ୍ଲାରେ ପଜିଟିଭ ମାମଲା ବଢିଛି । ପୁଣେ, ନାଗପୁର, ମୁମ୍ବାଇ, ସୁବୁରବାନ, ଅମରାବତୀ, ଥାନେ ଓ ଏକୋଲା ଜିଲ୍ଲାର ସ୍ୱାସ୍ଥ୍ୟକର୍ମଚାରୀ ଓ ସମ୍ମୁଖ କୋଭିଡ ଯୋଦ୍ଧାଙ୍କୁ ପ୍ରାଥମିକତା ଭିତିରେ ଟିକାକରଣ କରିବାକୁ ନିର୍ଦ୍ଦେଶ ଦିଆ ଯାଇଛି । ସେହିପରି ମଧ୍ୟପ୍ରଦେଶ ସରକାରଙ୍କୁ ସ୍ୱାସ୍ଥ୍ୟମନ୍ତ୍ରାଳୟ ତାଗିଦ କରି ଚିଠି ଲେଖି ଜଣାଇଛି, ରାଜ୍ୟର ୩ଟି ଜିଲ୍ଲାରେ କରୋନା ମାମଲା କିଛି ଦିନ ହେଲା ବଢିବାରେ ଲାଗିଛି ।
ଇନ୍ଦୋର, ଭୋପାଳ ଓ ବେତୁଲା ଜିଲ୍ଲାରେ ଦ୍ରୁତ ସଂକ୍ରମଣ ଦେଖିବାକୁ ମିଳିଥିବାରୁ ଯୁଦ୍ଧକାଳୀନ ଭିତରେ ସ୍ୱାସ୍ଥ୍ୟକର୍ମଚାରୀ ଓ ସମ୍ମୁଖ କୋଭିଡ ଯୋଦ୍ଧାଙ୍କୁ ଟିକା ଦେବାକୁ ନିର୍ଦ୍ଦେଶ ଦେଇଛନ୍ତି ସ୍ୱାସ୍ଥ୍ୟମନ୍ତ୍ରାଳୟ ସଚିବ । ସେହିପରି ପଂଜାବର ଏସବିଏସ ନଗର, କପୁରଥଲା ଓ ଶ୍ରୀମୁକ୍ତାସର ସାହିବ ଜିଲ୍ଲାରେ ସଂକ୍ରମଣ ବଢିଛି । ଜାମ୍ମୁକାଶ୍ମୀରର ପୁଲୱାମା ଜିଲ୍ଲା ଓ ଛତିଶଗଡର ରାଜନନ୍ଦଗାଓଁ ଜିଲ୍ଲା ଦ୍ରୁତ ବେଗରେ ସଂକ୍ରମଣ ବଢୁଥିବାରୁ ଜିଲ୍ଲା ପ୍ରଶାସନକୁ ତୁରନ୍ତ ଟିକାକରଣ କରିବାକୁ ନିର୍ଦ୍ଦେଶ ଦେବା ପାଇଁ ରାଜ୍ୟ ସରକାରଙ୍କୁ ଚିଠି ଲେଖିଛି କେନ୍ଦ୍ର ସ୍ୱାସ୍ଥ୍ୟମନ୍ତ୍ରାଳୟ ।