ଓଡିଶାରେ କମୁଛି କରୋନା । ୪୨ ଦିନରେ ସବୁଠୁ କମ ଆକ୍ରାନ୍ତ ଚିହ୍ନଟ । ୯ ପ୍ରତିଶତକୁ ଖସିଲା ସଂକ୍ରମଣ । ସେପଟେ ଦେଶରେ ଦୁଇ ମାସରେ ସବୁଠାରୁ କମ୍ ସଂକ୍ରମଣ
କନକ ବ୍ୟୁରୋ: କରୋନାର ଦ୍ୱିତୀୟ ଲହର ପ୍ରଭାବ ଧୀରେ ଧୀରେ ହ୍ରାସ ପାଉଥିବା ବେଳେ ରାଜ୍ୟରେ ଦୁଇ ଦିନ ହେଲା ୧୦ ପ୍ରତିଶତ ତଳେ ରହିଛି ସଂକ୍ରମଣ ହାର । ପ୍ରତିଦିନ ରେଡ୍ ଜୋନରେ ଥିବା ଜିଲ୍ଲା ସଂଖ୍ୟା ମଧ୍ୟ କମିବାରେ ଲାଗିଛି । ୟେଲୋ ଓ ଗ୍ରୀନ ଜୋନ୍ ଜିଲ୍ଲା ସଂଖ୍ୟା ବଢିବାରେ ଲାଗିଛି । ରେଡ୍ ଜୋନରେ ୧୨ଟି ଜିଲ୍ଲା ରହିଛି, ଯେଉଁଠି ଅଢ଼େଇ ହଜାରରୁ ଅଧିକ ସକ୍ରିୟ ସଂକ୍ରମିତ ରହିଛନ୍ତି । ୮ ଜିଲ୍ଲା ଗ୍ରୀନ ଜୋନ୍ରେ ରହିଛନ୍ତି, ଯେଉଁଠି ହଜାରେ ତଳକୁ ରହିଛି ସକ୍ରିୟ ସଂକ୍ରମିତଙ୍କ ସଂଖ୍ୟା ।
Kanak News is now on WhatsApp
Join and get latest news updates delivered to you via WhatsApp
ଜୁନ ମାସ ଆରମ୍ଭରୁ ରାଜ୍ୟରେ ସ୍ଥିତି ସୁଧୁରିବାରେ ଲାଗିଛି । ୭ ଦିନ ହେଲା ପଜିଟିଭିଟି ରେଟ୍ ହ୍ରାସ ପାଇବା ସହ ଦୈନିକ ସଂକ୍ରମଣ ମଧ୍ୟ କମୁଛି । ଜୁନ ୧ ତାରିଖରେ ସଂକ୍ରମଣ ହାର ଥିଲା ୧୪.୦୨ ପ୍ରତିଶତ । ଜୁନ ୪ ତାରିଖ ଦିନ ସଂକ୍ରମଣ ହାର ୧୧.୨୬ ପ୍ରତିଶତକୁ ଚାଲି ଆସିଥିଲା । ୬ ତାରିଖ ଦିନ ୯.୭୨ ପ୍ରତିଶତ ରହିଥିଲା ପଜିଟିଭିଟି ରେଟ୍ । ୭ ତାରିଖ ଦିନ ସ୍ୱାସ୍ଥ୍ୟ ବିଭାଗର ସୂଚନା ଅନୁସାରେ ସଂକ୍ରମଣ ହାର ରହିଛି ୯.୧୧ ପ୍ରତିଶତ ।
ଅର୍ଥାତ୍ ଯଦି ୧୦୦ ଜଣ କରୋନା ପରୀକ୍ଷା କରୁଛନ୍ତି, ସେଥିରୁ ୯ ଜଣ ଆକ୍ରାନ୍ତ ଚିହ୍ନଟ ହେଉଛନ୍ତି । ଗତ ୨୪ ଘଂଟାରେ ୬୭ ହଜାର ୧୭୮ କରୋନା ପରୀକ୍ଷା କରାଯାଇଥିଲା, ସେଥିରୁ ୬ ହଜାର ୧୧୮ ଜଣ ପଜିଟିଭ୍ ଥିବା ଜଣାପଡିଛି । ୭ ଦିନରେ ପ୍ରାୟ ୫ ପ୍ରତିଶତ ସଂକ୍ରମଣ ହାର କମିଛି । ୪୨ ଦିନ ମଧ୍ୟରେ ରାଜ୍ୟରେ ସର୍ବନିମ୍ନ ରହିଛି ଦୈନିକ ସଂକ୍ରମଣ ।
ବାଇଟ୍ : ଡାକ୍ତର ପୂର୍ଣ୍ଣଚନ୍ଦ୍ର ମହାପାତ୍ର, ବରିଷ୍ଠ ଚିକିତ୍ସକ
ଓଡ଼ିଶା କରୋନା ମିଟର
ତାରିଖଟେଷ୍ଟ ଆକ୍ରାନ୍ତ ସଂକ୍ରମଣ ହାର
ଜୁନ ୧ ୬୨,୨୯୩ ୮,୭୩୫୧୪.୦୨%
ଜୁନ ୨ ୬୬,୬୮୩ ୮,୩୯୯୧୨.୫୯%
ଜୁନ ୩ ୭୦,୧୭୮ ୮,୮୩୯୧୨.୫୯%
ଜୁନ ୪ ୬୮,୬୦୪ ୭,୭୨୯ ୧୧.୨୬%
ଜୁନ ୫ ୭୦,୩୧୩ ୭,୩୯୫ ୧୦.୫୧%
ଜୁନ ୬ ୭୧,୯୭୩ ୭,୦୦୨ ୦୯.୭୨%
ଜୁନ୍ ୭ ୬୭,୧୭୮ ୬,୧୧୮ ୦୯.୧୧%
ଦେଶରେ ମଧ୍ୟରେ ତଳମୁହାଁ ହୋଇଛି କରୋନା ଗ୍ରାଫ୍ । ୨୪ଘଂଟାରେ ୧,୦୦,୬୩୬ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ସଂକ୍ରମଣ ହାର ରହିଛି ୬.୩୪ ପ୍ରତିଶତ । ସକ୍ରିୟ ସଂକ୍ରମିତଙ୍କ ସଂଖ୍ୟା ୧୪,୦୧,୬୦୯ ରହିଥିବା ବେଳେ ମୋଟ ମୃତ୍ୟୁ ସଂଖ୍ୟା ୩,୪୯,୧୮୬ କୁ ବୃଦ୍ଧି ପାଇଛି ।