ସତର୍କ ନହେଲେ ସଂକ୍ରମଣ ପୁଣି ବଢିବ । ବ୍ରିଟେନ, ଋଷର ଉଦାହରଣ ଦେଇ ବୁଝାଇଲେ ସ୍ୱାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ।
କନକ ବ୍ୟୁରୋ : ଦେଶରେ କରୋନା ସଂକ୍ରମଣ ହ୍ରାସ ପାଇଚାଲିଛି । କଟକଣା ମଧ୍ୟ କୋହଳ ହୋଇଛି । କିନ୍ତୁ ଏହି କୋହଳ କଟକଣା ଭିତରେ ସତର୍କତା ଅବଲମ୍ବନ ନକଲେ ପୁଣିଥିରେ ସଂକ୍ରମଣ ମାଡି ଆସିବ ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ଲବ ଅଗ୍ରୱାଲ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ ଲୋକମାନଙ୍କ ସତର୍କତା ଢିଲା ହେବା ଫଳରେ ବ୍ରିଟେନ, ଋଷିଆ, ବାଂଲାଦେଶରେ ପୁଣି ସଂକ୍ରମଣ ବୃଦ୍ଧି ପାଇଛି । ସେହିପରି ଆମ ଦେଶର କେତେକ ପର୍ଯ୍ୟଟନସ୍ଥଳୀରେ ପ୍ରବଳ ଗହଳି ପରିଲକ୍ଷିତ ହେଉଛି । ଲୋକମାନଙ୍କର ଏପରି କାମ ପୁଣି ବିପଦକୁ ଡାକି ଆଣିବ ।
ସେ କହିଛନ୍ତି ଯେ ଗତ ସପ୍ତାହରେ ଦୈନକ ସଂକ୍ରମଣରେ ୮ ପ୍ରତିଶତ ହ୍ରାସ ପରିଲକ୍ଷିତ ହୋଇଛି । ଦେଶରେ ଏବେ ଦେଖାଦେଉଥିବା ଦୈନିକ ସଂକ୍ରମଣର ୮୦ ପ୍ରତିଶତ ୯୦ଟି ଜିଲ୍ଲାରେ ଚିହ୍ନଟ ହେଉଛି । ଅନ୍ୟପକ୍ଷରେ ଦେଶରେ ଆରୋଗ୍ୟ ହାର ୯୭. ୨ ପ୍ରତିଶତକୁ ବୃଦ୍ଧି ପାଇଛି ବୋଲି ସେ କହିଛନ୍ତି ।
ଏହି ଅବସରରେ ନିତି ଆୟୋଗ ସଦସ୍ୟ ଭି.କେ.ପଲ କହିଛନ୍ତି ଯେ ଗର୍ଭବତୀ, ସ୍ତନ୍ୟପାନ କରାଉଥିବା ମହିଳାମାନେ କରୋନା ଟିକା ନେବା ବେଶ ନିରାପଦ । ଗର୍ଭବତୀ ମହିଳା ଟିକା ନେବା ସମ୍ପର୍କରେ ନିୟମାବଳୀ ଜାରି କରାଯାଇଛି । ଦେଶରେ ଏବେ ଦିଆଯାଉଥିବା ୩ ପ୍ରକାରର ଟିକା ଗର୍ଭବତୀମାନଙ୍କ ପାଇଁ ନିରାପଦ ବୋଲି ସେ କହିଛନ୍ତି ।