କେଉଁ ବସୟର ବ୍ୟକ୍ତିଙ୍କ ପାଇଁ କରୋନା ବଢ଼ାଇପାରେ ସମସ୍ୟା? କ’ଣ କଲେ ରୋକି ହେବ ସଂକ୍ରମଣ? ପରିସଂଖ୍ୟାନ ପାଠରେ ପୂରା ସୂଚନା ଦେଲେ ସୁବ୍ରତ ବାଗଚୀ…
କନକ ବ୍ୟୁରୋ: ରାଜ୍ୟରେ କରୋନା ପଜିଟିଭଙ୍କ ସଂଖ୍ୟା ବଢୁଥିବାବେଳେ କେଉଁ ବୟସର ବ୍ୟକ୍ତିଙ୍କ ପାଇଁ କରୋନା ବିପଦ ଆଣିପାରେ, ତାହାର ପରିସଂଖ୍ୟନ ବୁଝାଇଛନ୍ତି ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ ବାଗଚୀ । ଯେଉଁମାନଙ୍କ ବସୟ ୬୦ ବର୍ଷରୁ ଅଧିକ ରହିଛି । କରୋନା ସହ ଲଢୁଥିବା ଅନ୍ୟଦେଶମାନଙ୍କ ଅନୁଭୂତିରୁ ତର୍ଜମା କରାଯାଉଛି ଯେ, ଯଦି ୪୦-୫୦ ବର୍ଷ ବୟସରେ ହଜାର ଜଣ ଆକ୍ରାନ୍ତ ହୁଅନ୍ତି ସେଥିମଧ୍ୟରୁ ୩ ଜଣଙ୍କ ମୃତ୍ୟୁ ଅଶଙ୍କା ରହିଥାଏ । କିନ୍ତୁ ଯଦି ୫୦-୬୦ ବର୍ଷ ବୟସରେ ହଜାର ଜଣ ଆକ୍ରାନ୍ତ ହୁଅନ୍ତି ତାହାହେଲେ ୧୨.୫ ପ୍ରତିଶତ ମୃତ୍ୟୁ ଆଶଙ୍କା ବଢ଼ିଯାଏ ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ଼ କଥା ହେଲା କି, ଯଦି ୬୦ ବର୍ଷ ବୟସରେ ହଜାର ଜଣ ଆକ୍ରାନ୍ତ ହୁଅନ୍ତି ତେବେ ୪୦ ଜଣଙ୍କର ମୃତ୍ୟୁ ଆଶଙ୍କା ରହିଥାଏ । ଆଉ ୭୦-୮୦ ବର୍ଷ ବୟସରେ ଯଦି ହଜାର ଜଣ ଆକ୍ରାନ୍ତ ହୁଅନ୍ତି ସେଥିମଧ୍ୟରୁ ୮୬ ଜଣଙ୍କର ମୃତ୍ୟୁ ଆଶଙ୍କା ରହିଥାଏ । ହେଲେ ସବୁଠାରୁ ଚିନ୍ତାଜନକ ବିଷୟ ହେଲା କି, ଯଦି ୮୦ ବର୍ଷରୁ ଅଧିକ ବୟସ୍କରେ ହଜାର ଜଣ ଆକ୍ରାନ୍ତ ହୁଅନ୍ତି ତାହାହେଲେ ସେଥିମଧ୍ୟରୁ ୧୩୪ ଜଣଙ୍କର ମୃତ୍ୟୁ ଆଶଙ୍କା ରହିଥାଏ । ତେଣୁ ଓଡ଼ିଶାର ଜନସଂଖ୍ୟା ସାଢ଼େ ଚାରି କୋଟି ଏବଂ ସେଥିରୁ ପ୍ରାୟ ୧୦ ପ୍ରତିଶତ ବା ୪୫ ଲକ୍ଷ ବୟସ୍କ ନାଗରିକ ରହିଛନ୍ତି । ଆଉ ରାଜ୍ୟରେ ମୋଟ୍ ୯୪ ଆକ୍ରାନ୍ତଙ୍କ ମଧ୍ୟରୁ ୧୧.୭ ପ୍ରତିଶତ ବୟସ୍କ ବ୍ୟକ୍ତି ଯେଉଁମାନଙ୍କ ବୟସ ୬୦ରୁ ଉଦ୍ଧ୍ୱର୍ ସେମାନଙ୍କ ଦେହରେ କରୋନା ବାହାରିଛି । ହେଲେ ଏମାନଙ୍କ ମଧ୍ୟରେ ଅନେକ ଘରୁ ବାହାରି ନାହାନ୍ତି । କିନ୍ତୁ ଏମାନେ ସଂକ୍ରମଣର ଶିକାର ହୋଇଛନ୍ତି । କେହି ନା କେହି ଘର ଭିତରକୁ କରୋନାକୁ ଡାକି ଆଣିଛି ବୋଲି କହିଛନ୍ତି ସୁବ୍ରତ ।
ତେବେ ଯେଉଁମାନେ ବାହାରୁ ଆସୁଛନ୍ତି ଏଭଳି ସ୍ଥିତିରେ ନିଜ ପରିବାର ଲୋକଙ୍କୁ ବା ବୟସ୍କଙ୍କୁ ସୁସ୍ଥ ରଖିବା ପାଇଁ ନିଜକୁ ସଙ୍ଗରୋଧରେ ରଖନ୍ତୁ । କାରଣ ୬୦ ବର୍ଷରୁ ବୟସ୍କ ବ୍ୟକକ୍ତିଙ୍କ ଦେହରେ ରୋଗ ପ୍ରତିରୋଧକ ଶକ୍ତି କମ୍ ରହିଥାଏ । ଆଉ ୭୦ ବର୍ଷୀୟ ବ୍ୟକ୍ତିଙ୍କ ଦେହରେ ଅନ୍ୟାନ୍ୟ ରୋଗ ଦେଖାଯାଏ । ଏହାଦ୍ୱାରା ହିଁ ଆମ ଘରର ବୟସ୍କମାନଙ୍କୁ ଆମେ ସୁରକ୍ଷିତ ରଖି ପାରିବା । ତେଣୁ ସଚେତନ ହୁଅନ୍ତୁ ଏବଂ ଯଦି ଆପଣ ବାହାରୁ ଫେରିଛନ୍ତି କିମ୍ବା ଆକ୍ରାନ୍ତଙ୍କ ସଂସ୍ପର୍ଶରେ ଆସିଛନ୍ତି ତେବେ ନିଜକୁ କ୍ୱାରେଣ୍ଟିନ୍ ରେ ରଖନ୍ତୁ ।