ବିବାଦୀୟ ଗାଡିକୁ ନେଇ ବଢ଼ୁଛି ବିବାଦ: କିଏ ଘଟାଇଥିଲା ଦୁର୍ଘଟଣା?

କନକ ବ୍ୟୁରୋ: ଭୁବନେଶ୍ୱର ପାୱାର ହାଉସ ଛକରେ ରେଂଜ ରୋଭର ଦୁର୍ଘଟଣାରେ ଦୁଇଜଣ ମୃତ୍ୟୁ ସହ ସଂଘର୍ଷ କରୁଛନ୍ତି । ଚିକିତ୍ସା ପାଇଁ ଲକ୍ଷାଧିକ ଟଙ୍କା ଦରକାର ପଡୁଛି । କିନ୍ତୁ ଦୁର୍ଘଟଣା ଘଟାଇଥିବା କୋଟି କୋଟି ଟଙ୍କାର ଗାଡି ମାଲିକ ଯେମିତି ପଥର ପାଲଟିଯାଇଛନ୍ତି । ଗାଡିର ମାଲିକ କିଏ ତାହା ଏ ଯାଏଁ ସ୍ପଷ୍ଟ ହୋଇନାହିଁ । ମାଲିକାନା ଝାରସୁଗୁଡାର ଆର୍ମର-ରେ ଭେଂଚର୍ସ ପ୍ରାଇଭେଟ୍ ଲିମିଟେଡ୍ ନାଁରେ ରହିଛି । ପ୍ରଶ୍ନ ଉଠୁଚି, ଗାଡି ଭିତରେ କିଏ ଥିଲେ ଓ ଗାଡି ଚଲାଉଥିଲା କିଏ?

ପାୱାର ହାଉସ ଛକରେ ରେଞ୍ଜ ରୋଭର ଦୁର୍ଘଟଣା ଘଟଣା, ଏବେ ସାରାରାଜ୍ୟରେ ଚାଂଚଲ୍ୟ ଖେଳାଉଛି । ଗାଡି ଦୁର୍ଘଟଣାରେ ଦୁଇ ବାଇକ୍ ଆରୋହୀ ହସ୍ପିଟାଲ ବେଡରେ ଜୀବନ ସହ ସଂଘର୍ଷ କରୁଥିବାବେଳେ, ଚୁପ ବସିଛନ୍ତି ଗାଡି ମାଲିକ । କାହ୍ନୁ ଚରଣ ନାୟକଙ୍କର ଏଭଳି ଅବସ୍ଥା ହୋଇଛି ଯେ ତିନି ଦିନ ହେଲା ତାଙ୍କ ସେନ୍ସ ଫେରୁନି । ସେହିପରି ଲୋପାମୁଦ୍ରା ସାହୁଙ୍କ ବ୍ରେନ୍ ଡେଡ୍ ରହିଛି । ହେଲେ, କୋଟିପତି ଗାଡି ଚଢୁଥିବା ମାଲିକଙ୍କ ହୃଦୟ ତରଳୁ ନାହିଁ । ନା ସହାୟତା ପାଇଁ ହାତ ବଢ଼ାଉଛନ୍ତି ନା ଟିକିଏ ସମବେଦନ ଜଣାଇବାକୁ ହସ୍ପିଟାଲକୁ ଆସୁଛନ୍ତି । ଆଉ ଏହାକୁ ନେଇ ଉଦବେଗ ପ୍ରକାଶ କରିଛନ୍ତି ଦୁର୍ଘଟଣାଗ୍ରସ୍ତଙ୍କ ସମ୍ପର୍କୀୟ ।

ଦୁର୍ଘଟଣା ଘଟାଇଥିବା ଏହି ଗାଡିର ମାଲିକ କିଏ ଏପର୍ଯ୍ୟନ୍ତ ପୋଲିସ ସ୍ପଷ୍ଟ କରିନି । କିନ୍ତୁ ଆରଟିଓର ତଥ୍ୟ ଅନୁସାରେ ରେଞ୍ଜରୋଭର ଗାଡି ନଂ- ଓଡି-୨୩-କେ- ୦୦୦୬ର ମାଲିକାନା ଝାରସୁଗୁଡାର ଆର୍ମର-ରେ ଭେଂଚର୍ସ ପ୍ରାଇଭେଟ୍ ଲିମିଟେଡ୍ ନାଁରେ ରହିଛି । ଏ ହେଉଛି ଝାରସୁଗୁଡା ଆଂଚଳିକ ପରିବହନ କାର୍ଯ୍ୟାଳୟରେ ଉପଲବ୍ଧ ହେଉଥିବା ତଥ୍ୟ । ବଡ କଥା ହେଉଛି,ଏହି କମ୍ପାନୀର ଦୁଇ ଜଣ ନିର୍ଦ୍ଦେଶକ ରହିଛନ୍ତି । ଜଣେ ନିର୍ଦ୍ଦେଶକ ପୂର୍ବତନ ମନ୍ତ୍ରୀ ନବ ଦାସଙ୍କ ପୁଅ ବିଶାଳ ଦାସ ହୋଇଥିବାବେଳେ ଆଉ ଜଣେ ଜଣେ ସ୍ୱରାଜ ଭୋଇ.. ।.. ଏପରିକି ପୂର୍ବରୁ ବିଶାଳ ଏହି ଗାଡିରେ ଯାତାୟତ କରୁଥିବା ଭିଡିଓ ବି ରହିଛି । ବିଶାଳ ଏହି ଗାଡିକୁ ବ୍ୟବହାର କରୁଥିବା ଭିଡିଓରେ ଦେଖିବାକୁ ମିଳିଛି । ତେବେ ଦୁର୍ଘଟଣା ଦିନ ଏହି ଗାଡିକୁ କିଏ ଚଳାଉଥିଲେ ସେ ନେଇ ପ୍ରଶ୍ନ ଉଠାଇଛନ୍ତି ଆହତଙ୍କ ଭାଇ ।

ତେବେ ଦୁର୍ଘଟଣା ସମୟରେ ବିଶାଳ ଓ ସ୍ୱରାଜ ସେହି ଗାଡିରେ ଥିଲେ କି ନାହିଁ ତାହା ସ୍ପଷ୍ଟ ହୋଇନାହିଁ । କିନ୍ତୁ ପୋଲିସ ଏହି ମାମଲାରେ ଜଣଙ୍କ ଗିରଫ କରିଥିବା ସୂଚନା ଦେଇଛି । ହେଲେ, ଗାଡିର ମାଲିକ ଥିଲେ କି ନାହିଁ ତାହା ସ୍ପଷ୍ଟ କରିନାହିଁ । ପ୍ରଶ୍ନ ଉଠୁଛି
– ଦୁର୍ଘଟଣା ସମୟରେ ଗାଡି ଭିତରେ କିଏ ଥିଲେ?
– କିଏ ଚଳାଉଥିଲେ ଗାଡି ?
– ଆହତଙ୍କୁ ସହାୟତାର ହାତ ବଢ଼ାଇବାକୁ କାହିଁକି ଆସୁନାହାନ୍ତି?
– ନ୍ୟାୟ ପାଇବେ ତ ଆହତଙ୍କ ପରିବାର?