କନକ ବ୍ୟୁରୋ : ଢେଙ୍କାନାଳ ଜିଲ୍ଲା ଶରଣ ଶ୍ରୀକ୍ଷେତ୍ରରେ ନୂତନ ଜଗନ୍ନାଥ ମନ୍ଦିର ପ୍ରତିଷ୍ଠା ହେଉଛି । ଏକଘରିଆ ଗାଁରେ ରୀତିନୀତି ଅନୁସାରେ ତିନି ଠାକୁରଙ୍କ ପାଇଁ ଦାରୁ ସଂଗ୍ରହ କରାଯାଇଛି । ଏହି ଅଦିନିଆ ବନଯାଗ ଯାତ୍ରାକୁ ନେଇ ଶ୍ରୀକ୍ଷେତ୍ରର ସେବାୟତ ନିଯୋଗ ତୀବ୍ର ପ୍ରତିକ୍ରିୟା ପ୍ରକାଶ କରିଛି । ସେବାୟତ ନିଯୋଗ ଏନେଇ ସିଂହଦ୍ୱାର ଥାନାରେ ଏତଲା ଦେବା ସହ ପୁରୀ ଜିଲ୍ଲାପାଳ ଓ ଏସପିଙ୍କୁ ଭେଟି କାର୍ଯ୍ୟାନୁଷ୍ଠାନ ନେବାକୁ ଦାବି କରିଛି ।

Advertisment

ଖୋଳ କୀର୍ତିନରେ ଫାଟି ପଡୁଛି ପରିବେଶ । ଶ୍ରଦ୍ଧାଳୁ ସମାଗମ ଓ ଜୟ ଜଗନ୍ନାଥ ନାରାରେ ମୁଖରିତ ହେଉଛି ଅଂଚଳ । ଢେଙ୍କାନାଳ ମୋଟଙ୍ଗା ଥାନା ଅନ୍ତର୍ଗତ ଏକଘରିଆ ଗାଁରେ ଚାଲିଛି ବନଯାଗ ଯାତ୍ରା । ବ୍ରାହ୍ମଣୀ ନଦୀ କୂଳରେ ଥିବା ଶରଣ ଶ୍ରୀକ୍ଷେତ୍ରରେ ତିଆରି ହେଉଛି ନୂଆ ଜଗନ୍ନାଥ ମନ୍ଦିର । ଗତ ୨୨ ତାରିଖରୁ ବିଭିନ୍ନ ରୀତିନୀତି ଅନୁଯାୟୀ ଜଗନ୍ନାଥ, ବଳଭଦ୍ର ଓ ସୁଭଦ୍ରାଙ୍କ ଦାରୁ ସଂଗ୍ରହ କରାଯାଉଛି । ସେପଟେ ଏହାକୁ ଜଗନ୍ନାଥ ପରଂପରା ବିରୋଧୀ କହି ପୁରୀ ସିଂହଦ୍ୱାର ଥାନାରେ ଏତଲା ଦେଇଛି ଦଇତାପତି ନିଯୋଗ । ଅନ୍ୟପଟେ ଶରଣ ଶ୍ରୀକ୍ଷେତ୍ର ପରିଚାଳକ ଚିଣ୍ଟୁ ବାବା କହିଛନ୍ତି. ଜାଣିଶୁଣି କିଛି ଭୁଲ କରାଯାଇନାହିଁ  ।

ଦଇତାପତି ନିଯୋଗ ପ୍ରେସମିଟ କରି ଢେଙ୍କାନାଳରେ ଅଦିନିଆ ନବକଳେବରକୁ ତୀବ୍ର ନିନ୍ଦା କରିଛି । କହିଛି ଶ୍ରୀମନ୍ଦିର ଛଡା ଅନ୍ୟ କୌଣସି ଜଗନ୍ନାଥ ମନ୍ଦିରରେ ନବକଳେବର ହେବାର ପରମ୍ପରା ନାହିଁ । ଢେଙ୍କାନାଳରେ ଯାହା ଚାଲିଛି, ତାହା ଶ୍ରୀଜଗନ୍ନାଥ ପରଂପରାର ବିରୋଧ, ଏହା ମହାପ୍ରଭୁଙ୍କ ପ୍ରତି ଅପମାନ । ସେହିପରି ପୁରୀ ଜିଲ୍ଲାପାଳ ଓ ଏସପିଙ୍କୁ ଭେଟି କାର୍ଯ୍ୟାନୁଷ୍ଠାନ ଦାବି କରିଛି ଦଇତାପତି ନିଯୋଗ ।