କନକ ବ୍ୟୁରୋ: ଦିଲ୍ଲୀ ଓ ମୁମ୍ବାଇରେ ଥିବା ବ୍ରିଟିଶ ବ୍ରୋଡକାଷ୍ଟିଂ କର୍ପୋରେସନ ବା ବିବିସି ଅଫିସରେ ହଲଚଲ ଖେଳିଯାଇଥିଲା । ଅଫିସର କର୍ମଚାରୀଙ୍କୁ ନିଜ ନିଜ ମୋବାଇଲ ଫୋନ ଜମା କରିବାକୁ କୁହାଗଲା । ଆଉ ଏହା ପରେ ଆରମ୍ଭ ହୋଇଥିଲା ଚଢ଼ାଉ ।
Kanak News is now on WhatsApp
Join and get latest news updates delivered to you via WhatsApp
ଦିନ ପ୍ରାୟ ୧୧ଟା ବେଳେ ଆୟକର ବିଭାଗର ଦୁଇଟି ଟିମ୍ ଦେଶର ଦୁଇଟି ସହରରେ ଆରମ୍ଭ କରିଦେଇଥିଲେ ଚଢ଼ାଉ । ଗୋଟିଏ ଟିମ୍ ଦିଲ୍ଲୀର କଲିନା ମାର୍ଗରେ ଥିବା ବିବିସି ଅଫିସ୍ ଓ ଅନ୍ୟ ଟିମଟି ମୁମ୍ବାଇର କଲିନା ସାନ୍ତାକ୍ରୁଜରେ ଚଢ଼ାଉ ଆରମ୍ଭ କରିଦେଇଥିଲା । ବିବିସିର ଭାରତୀୟ ଶାଖାର ଆର୍ଥିକ କାରବାର ନେଇ ଏହି ଚଢ଼ାଉ କରାଯାଉଥିବା କୁହାଯାଇଛି ।
ଗୁଜରାଟ ଦଙ୍ଗାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ବିବିସିର ବିବାଦୀୟ ଡକ୍ୟୁମେଂଟାରୀର କିଛି ସପ୍ତାହ ପରେ ଆୟକର ବିଭାଗର ଏଭଳି ଚଢାଉ କରିଛି । ପୂର୍ବରୁ ଆୟକର ବିଭାଗ ପକ୍ଷରୁ ବିବିସିକୁ ନୋଟିସ୍ ଜାରି କରାଯାଇଥିଲା । ଆନ୍ତର୍ଜାତୀୟ କର ଏବଂ ଅର୍ଥ ନେଣଦେଣ ନେଇ ଆୟକର ବିଭାଗ ଚଢାଉ କରିଥିବା ସୂଚନା ମିଳିଛି । ତେବେ ମୋଦି ସରକାର ବିବିସି ଉପରେ ରାଗ ରଖି ଏଭଳି ପ୍ରତିଶୋଧମୂଳକ ରେଡ୍ କରାଇଛି ବୋଲି ବିରୋଧୀ ଅଭିଯୋଗ କରିଛନ୍ତି । ଏଡିଟର୍ସ ଗିଲଡ୍ ଅଫ୍ ଇଣ୍ଡିଆ ମଧ୍ୟ ଏହି ରେଡକୁ ବିରୋଧ କରିଛି । ବିଜେପି ପକ୍ଷରୁ କୁହାଯାଇଛି ଯେ, ଆୟକର ବିଭାଗ ତା କାମ କରୁଛି ।
ବିବିସି ମୋଦୀଙ୍କ ଉପରେ ଯେଉଁ ଡକ୍ୟୁମେଂଟାରୀ ତିଆରି କରିଥିଲା, ତାହା ଅତି ବିବାଦୀୟ ହୋଇପଡ଼ିଛି । ଏଥିରେ ଜାଣିଶୁଣି ମୋଦୀଙ୍କୁ ଅତି ନକାରାତ୍ମକ ଭାବେ ଚିତ୍ରଣ କରାଯାଇଥିବା ବିଜେପି ଅଭିଯୋଗ କରିଆସୁଛି । ଏପରିକି କେନ୍ଦ୍ର ସରକାର ଏହାର ପ୍ରଦର୍ଶନ ଉପରେ କଟକଣା ଲଗାଇଛନ୍ତି । ତେବେ ଜେଏନୟୁ ଓ କିଛି ବିଶ୍ୱବିଦ୍ୟାଳୟରେ ଏହାର ପ୍ରଦର୍ଶନର ଖବର ଆସିଥିଲା । ଅନ୍ୟପଟେ କାହିଁକି ଏହାକୁ ବ୍ୟାନ କରାଯାଇଛି ଓ ଏହି ଡକ୍ୟୁମେଂଟାରୀର ମୂଳ ତଥ୍ୟ ରଖିବାକୁ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇସାରିଛନ୍ତି ।