କନକ ବ୍ୟୁରୋ : ପଳାତକ ବ୍ୟବସାୟୀ ବିଜୟ ମାଲ୍ୟାଙ୍କ ଦଣ୍ଡ ଉପରେ ସୁପ୍ରିମ କୋର୍ଟରେ ଡିସେମ୍ବର ୧୮ ତାରିଖରେ ଶୁଣାଣି ହେବ । ମାଲ୍ୟାକୁ ୨୦୧୭ ମସିହାରେ ସୁପ୍ରିମ କୋର୍ଟ ଅବମାନନା ମାମଲାରେ ଦୋଷୀ ସାବ୍ୟସ୍ତ କରାଯାଇଥିଲା । କୋର୍ଟ ଆଜି କହିଛନ୍ତି କି ଦୋଷୀ ଦେଶକୁ ଫେରୁ କି ନଫେରୁ ଦଣ୍ଡ ଉପରେ ନିଷ୍ପତ୍ତି କୁ ଆଉ ଅପେକ୍ଷା କରାଯାଇପାରିବ ନାହିଁ । ଜଷ୍ଟିସ ୟୁ ୟୁ ଲଳିତଙ୍କ ଅଧ୍ୟକ୍ଷତାରେ ଗଠିତ ହୋଇଥିବା ୩ ଜଣିଆ ଖଣ୍ଡପୀଠ କହିଛନ୍ତି କି ଦୋଷୀ ବିଜୟ ମାଲ୍ୟା ନିଜ ଓକିଲଙ୍କ ସହାୟତାରେ ନିଜ ପକ୍ଷ ରଖିପାରିବେ । କୋର୍ଟ ତରଫରୁ ବରିଷ୍ଠ ଓକିଲ ଜୟଦୀପ ଗୁପ୍ତାଙ୍କୁ ଏହି ମାମଲାରେ ଏମିକସ କ୍ୟୁରୀ ଭାବେ ନିଯୁକ୍ତ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ବ୍ୟାଙ୍କମାନଙ୍କରୁ ହଜାର ହଜାର କୋଟି ଟଙ୍କା ଠକେଇ କରି ଦେଶରୁ ପଳାଇଯାଇଥିବା ବ୍ୟବସାୟୀ ବିଜୟ ମାଲ୍ୟାକୁ ସୁପ୍ରିମ କୋର୍ଟ ୨୦୧୭ ମଇ ୯ ତାରିଖରେ କୋର୍ଟ ଅବମାନନା ମାମଲାରେ ଦୋଷୀ ସାବ୍ୟସ୍ତ କରିଥିଲେ । ତାଙ୍କୁ ନିଜ ପିଲାଙ୍କ ନାମରେ ବିଦେଶୀ ବ୍ୟାଙ୍କରୁ ୪୦ ମିଲିୟନ ଡଲାର ଟ୍ରାନ୍ସଫର କରିବା ଓ ସମ୍ପତ୍ତିକୁ ଠିକ୍ ଭାବେ ପରିଚାଳନା ନକରିବା ମାମଲାରେ କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିଥିଲେ । ଏହାସହ ଏନେଇ ମାଲ୍ୟାଙ୍କ ଓକିଲଙ୍କ ତରଫରୁ ପୁର୍ନବିଚାର ମାମଲା ବି କୋର୍ଟର୍ ଖାରଜ କରିଦେଇଥିଲେ ।
ଏହା ପୂର୍ବରୁ ୨୦୨୦ ଅକ୍ଟୋବର ୫ ତାରିଖରେ ଏହି ମାମଲା କୋର୍ଟରେ ପଡିଥିଲା । ସେହିଦିନ ଜର୍ଜ ଆଶ୍ଚର୍ଯ୍ୟ ହୋଇ କହିଥିଲେ କି ୟୁକେ କୋର୍ଟରେ ପ୍ରତ୍ୟାର୍ପଣ ମାମଲା ହାରିବା ପରେ କିଭଳି ମାଲ୍ୟ ଦେଶକୁ ନଫେରି ସେଠାରେ ରହିଛନ୍ତି ।
ଅନ୍ୟପଟେ ବିଜୟ ମାଲ୍ୟାଙ୍କୁ ଦେଶକୁ ଫେରାଇ ଆଣିବା ମାମଲାରେ କେନ୍ଦ୍ର ସରକାରଙ୍କ ଓକିଲ କହିଛନ୍ତି କି ପ୍ରତ୍ୟାର୍ପଣ ମାମଲାରେ ସମସ୍ତ ଆଇନ ପ୍ରକ୍ରିୟା ଶେଷ ହୋଇଛି । କେବଳ ୟୁକେରେ କିଛି ଗୁପ୍ତ ଆଇନ ପ୍ରକ୍ରିୟା ବାକି ରହିଛି । ଏହି ମାମଲାରେ ଭାରତ ସରକାରଙ୍କୁ ପକ୍ଷଭୂକ୍ତ କରାଯାଇନାହିଁ । ଏଣୁ ଜଣାପଡୁନାହିଁ କି ୟୁକେରେ ଚାଲିଥିବା ଗୁପ୍ତ ଆଇନ ପ୍ରକ୍ରିୟା କେତେଦିନ ଲାଗିବ ।